Ukwaafwa Bambi Ukwishiba Ififwaikwa fya Kwa Lesa
“Umucikilisha walimfininina. Kalanda kuli ine, nga nshibila mbila nsuma!”—1 ABENA KORINTI 9:16.
1, 2. (a) Mulimo nshi uwa mbali shibili untu Yehova afwaya ifwe ukubombako? (b) Cinshi cintu abantu ba mitima ya bufumacumi bafwile ukwishiba pa kuti bengaba abatekwa ba Bufumu bwa kwa Lesa?
YEHOVA alikwatila umutundu wa muntu imbila nsuma. Alikwata Ubufumu, kabili afwaya abantu konse konse ukumfwa pa lwa bwene! Lintu twaishiba iyi mbila nsuma, Lesa afwaya ukuti twebeko bambi. Uyu mulimo wa mbali shibili. Intanshi, tufwile ukubilisha imbila nsuma iya Bufumu bwa kwa Lesa. Mu busesemo bwakwe pa lwa “kupwa kwa pano isonde,” Yesu atile: “Imbila nsuma iyi ya bufumu ikabilwa ku fyalo fyonse ku kubo bunte ku nko shonse; e lyo impela ikesa.”—Mateo 24:3, 14.
2 Ulubali lwa bubili ulwa uyu mulimo lubimbamo ukusambilisha abalesumina Ubufumu bulebilishiwa. Pa numa ya kubuushiwa, Yesu aebele ibumba likalamba ilya basambi bakwe ukuti: “E ico kabiyeni, kalengeni aba nko shonse ukuba abasambi, mulebabatishisha mwi shina lya kwa Tata ne lya Mwana ne lya Mupashi wa mushilo: mulebasambilisha ukubaka fyonse ifyo namwebele. Kabili, moneni, ine nakulaba na imwe ukufika na pa kupwa kwa nshita.” (Mateo 28:19, 20) ‘Ifyo Kristu alandile’ tafyafumine kuli wene; asambilishe bambi ukubaka amafunde ya kwa Lesa, nelyo ififwaikwa. (Yohane 14:23, 24; 15:10) Ukusambilisha bambi ‘ukubaka ifyo Kristu alandile’ kanshi kubimbamo ukubaafwa ukwishiba ififwaikwa fya kwa Lesa. Abantu ba bufumacumi bafwile ukufika pa fifwaikwa fya kwa Lesa pa kuti bengaba abatekwa ba Bufumu bwakwe.
3. Ubufumu bwa kwa Lesa cinshi, kabili cinshi bukapwishishisha icilenga ubukombe bwa Bufumu ukuba imbila nsuma?
3 Ubufumu bwa kwa Lesa cinshi? Kabili cinshi cintu buli no kupwishishisha icilenga ubukombe bwa ubu Bufumu ukuba imbila nsuma? Ubufumu bwa kwa Lesa bwaba buteko bwa ku muulu. Bwalyumo mutengo ku mutima wa kwa Yehova, pantu bwaba e nshila iyo akashishishamo ishina lyakwe, ukufumyapo umuseebanya onse. Ubufumu bwaba e cibombelo ico Yehova akabomfya ku kulenga ukufwaya kwakwe ukucitwa pano nse nga mu muulu. E mulandu wine Yesu atusambilishishe ukupepela Ubufumu bwa kwa Lesa ukwisa no kubutangishako mu bumi bwesu. (Mateo 6:9, 10, 33) Bushe mwamona umulandu cabela icacindama kuli Yehova ukuti tusambilisheko bambi pa lwa Bufumu bwakwe?
Mulimo Wakosa Lelo Tawayafisha
4. Cilangililo nshi cingapeelwa ku kulangilila ukuti ukukakililwako kwesu ukwa kushimikila imbila nsuma takwayafisha?
4 Bushe cintu cayafisha ukushimikila iyi mbila nsuma? Awe iyo! Ku kulangilila: Umulume alikakililwako ku kupayanishisha ulupwa lwakwe ifya ku mubili. Ukufilwa ukucite co kwalingana fye no kukaana icitetekelo ca Bwina Kristu. Umutumwa Paulo alembele ukuti: “Lelo umuntu nga tasunga abantu bakwe, pali bufi aba mu ŋanda yakwe, ninshi nakaana icitetekelo, kabili abo mubi ukucisha uushatetekela.” (1 Timote 5:8) Bushe uko kukakililwako kwaliba ukwayafisha ku mwaume wa Bwina Kristu? Takwayafisha nga ca kuti alitemwa ulupwa lwakwe, pantu alafwaisha ukubapayanishisha.
5. Nangu cingati twalikakililwako ku mulimo wa kushimikila no kupanga abasambi, mulandu nshi tulingile ukubela abacankwa pa kubombako uyu mulimo?
5 Mu kupalako, umulimo wa kushimikila imbila nsuma no kupanga abasambi, cintu twakakililwako ukubomba, waba cintu icifwaikwa apashimpwa ubumi bwesu bwine. Paulo alumbulwile ati: “Umucikilisha walimfininina. Kalanda kuli ine, nga nshibila mbila nsuma!” (1 Abena Korinti 9:16; linganyeniko Esekiele 33:7-9.) Nangu cibe fyo, icitukunta ukushimikila caba kutemwa, te mu kuti fye twalikakililwako. Intanshi twalitemwa Lesa, lelo na kabili twalitemwa abanensu, kabili twalishiba fintu cabe cacindama ukuti bomfwe imbila nsuma. (Mateo 22:37-39) Ibapeela isubilo lya nshita ya ku ntanshi. Ubufumu bwa kwa Lesa nomba line fye buli no kupwisha ulufyengo lonse, ukufumyapo umutitikisha onse, no kubwesha umutende no kwikatana—fyonse ifikaba lipaalo lya muyayaya ku banakila imitekele ya buko iyalungama. Bushe tatucankwa, ee ukucincimushiwa, ukwebako bambi imbila nsuma iya musango yo?—Ilumbo 110:3.
6. Mulandu nshi umulimo wa kushimikila no kupanga abasambi uletelako ubwafya bwine bwine?
6 Pa nshita imo ine, uyu mulimo wa kushimikila no kupanga abasambi ulaletako ubwafya bwine bwine. Abantu balipusanapusana. Te bonse batemwa fimo fine kabili te bonse balamuka mu nshila imo ine. Bamo balisoma nga nshi, ilintu bambi tabafika apatali mu masomo. Ukubelenga—uko nshita imo kwali ni mulesha citendwe uwatemwikwa—lelo pali nomba kumonwa ilingi line ukuti ni ncito. Ubunaŋani bwa kubelenga, ubwalondololwa ukuti caba “kwishiba ukubelenga lelo ukukanakwata ubuseko bwa kucite fyo,” buli bwafya bulekulilako, nangu fye ni mu fyalo ifyo fiilumba ukuti abantu babo abengi balishiba ukulemba no kubelenga. Ni shani lyene, fintu twingaafwa abantu aba fikulilo na mabuseko ifyalekanalekana muli uyu musango ukwishiba ififwaikwa fya kwa Lesa?—Linganyeniko 1 Abena Korinti 9:20-23.
Abapangashiwa Bwino ku Kwaafwa Bambi
7. Ni shani fintu “umusha wa cishinka kabili uwashilimuka” atupangasha ku kwaafwa bambi ukwishiba ififwaikwa fya kwa Lesa?
7 Umulimo wakosa ulanguka ukubomba nga ca kuti namukwata ifibombelo fyalinga nelyo ifisolobelo. Icibombelo icili icalinga ku mulimo umo pali ndakai kuti pambi cawamishiwa nelyo fye ukupyanikwapo ku ntanshi pa mulandu wa kukabila kuleteuluka. E fyo caba na ku mulimo wesu uwa kubilisha ubukombe bwa Bufumu bwa kwa Lesa. Pa myaka iingi, “umusha wa cishinka kabili uwashilimuka” alitupayanishisha ifibombelo fyalinga bwino bwino, impapulo ishapekanishiwa mu kulungatika ku kubomfiwa mu kutungulula amasambililo ya Baibolo. (Mateo 24:45) Muli fyo twalipangashiwa ukwaafwa abantu abafuma ku “luko lonse ne mikowa ne . . . ndimi” ukwishiba ififwaikwa fya kwa Lesa. (Ukusokolola 7:9) Mu nshita mu nshita, ifibombelo fyalundwako fyalipayanishiwa ifilingene no kukabila kuleteuluka mwi bala lya pano isonde ponse. Natulangulukeko ifya kumwenako finono.
8. (a) Lubali nshi luntu icitabo ca kuti “Lekeni Lesa Abe Uwa Cine” cabombele mu kulundulula amasomo ya Baibolo? (b) Cibombelo nshi ica kusambililamo Baibolo icapayanishiwe mu 1968, kabili ni nshila nshi iyaibela intu capekanishiwemo? (c) Ni shani fintu icitabo ca Icine cayafwilishe mu mulimo wa kupanga abasambi?
8 Ukufuma mu 1946 ukufika mu 1968, icitabo “Lekeni Lesa Abe Uwa Cine” calibomfiwe pamo nga icibombelo ca maka ica masomo ya Baibolo, kabili ifyapulintilwe fimo 19,250,000 fyalisabankanishiwe mu ndimi 54. Icine Icitungulula ku Bumi bwa Ciyayaya icafumine mu 1968, pa myaka iingi calibomfiwe bwino mu kusambilila Baibolo na balesekelela. Kale, cali cintu caseeka kuli bamo ukulasambilila ne Nte sha kwa Yehova imyaka iingi ukwabula ukuti babatishiwe. Lelo ici cibombelo cipya capekanishiwe ku kubimbamo umusambi, ukumukoselesha ukubomfya cintu aalesambilila. Cinshi cafuminemo? Icitabo ca Jehovah’s Witnesses—Proclaimers of God’s Kingdom cilondolola ukuti: “Pa myaka ya mulimo itatu ukutendeka pa September 1, 1968, no kupwa pa August 31, 1971, abantu bonse pamo 434,906 balibatishiwe—ukucila imiku ibili pa mpendwa ya babatishiwe mu myaka itatu iyabangilileko!” Ukutula pantu cafumiine, icitabo ca Icine calyananishiwa nga nshi—ukucila pali 107,000,000 mu ndimi 117.
9. Lubali nshi ulwaibela luntu icitabo ca Ikala Kuli Pe na pe cabombele, kabili ni shani fintu cayambukile ukufulilako kwa bakabilisha ba Bufumu?
9 Mu 1982 icitabo ca Kuti Waikala Kuli Pe na pe muli Paradise Pe Sonde caishileba e citabo cikalamba ica kutungulwilamo amasambililo ya Baibolo. Ici cibombelo cakwata ifikope ukucila pali 150, cimo na cimo mu kuba na mashiwi ya kulondolola cene ayalembwa bwino kabili ayo mu kwipifya yebekesha icishinka ifikope filesambilisha. Ubutumikishi Bwesu Ubwa Bufumu bumo bwalondolwele ukuti: “Pa myaka mupepi na 20 iyo icitabo ca ‘Lekeni Lesa Abe Uwa Cine’ cali e citabo cikalamba ica kusambililamo (ukufuma mu 1946 ukufika pa kati ka ba 1960) bakabilisha ba Bufumu abapya abacilile pali 1,000,000 balilundilweko ku mabumba yesu. Lyene bakasabankanya na bambi 1,000,000 balilundilweko lintu Icine Icitungulula ku Bumi bwa Ciyayaya caishileba e citabo cesu icikalamba ica kusambililamo pa numa lintu cafumine mu 1968. Ukupitila mu kubomfya icitabo cesu ica kusambililamo icipya ica Kuti Waikala Kuli Pe na pe muli Paradise Pe Sonde, bushe tuli no kumono kulunduluka kwapalako mu mabumba ya bakasabankanya ba Bufumu? Mu kushininkisha e fyo cikaba, nga cili kufwaya kwa kwa Yehova!” Cilemoneka kwati cali kufwaya kwa kwa Yehova, pantu ukufuma mu 1982 ukufika mu 1995, abantu ukucila pali 2,700,000 balilundilweko ku mabumba ya bakabilisha ba Bufumu!
10. Cibombelo nshi icipya icapayanishiwe mu 1995, kabili mulandu nshi cili no kulengela abasambi ba Baibolo ukulunduluka lwa ku mupashi mu kwangufyanyako?
10 “Ukulobolola kwena kukalamba, lelo ababomfi nabacepa,” e fyasosele Yesu. (Mateo 9:37) Mu cine cine, ukulobolola kukalamba. Kuciliko ifingi ifya kucita. Mu fyalo fimo abantu balalembwa pa mutande ukulalolela aba kubasambilisha Baibolo. E co pa kufwaya ukusalanganya ukwishiba Lesa mu kwangufyanya, mu 1995 “umusha wa cishinka kabili uwashilimuka” apayenye icibombelo cipya, icitabo ca mabula 192 ica mutwe wa kuti Ukwishiba Uko Kutungulula ku Mweo wa Muyayaya. Ici cibombelo cakatama tacilanda sana pa fisambilisho fya bufi. Cilondolola icine ca mu Baibolo mu nshila iisuma. Cilesubilwa ukuti cili no kwaafwa abasambi ba Baibolo ukulunduluka lwa ku mupashi mu kwangufyanyako. Icitabo ca Ukwishiba kale kale cilebomba mwi bala apantu ifitabo 45,500,000 fyalipulintwa mu ndimi 125 kabili kuli indimi shalundwako 21 ishicili shilepilibulwa.
11. Cibombelo nshi ica maka icapayanishiwe ku kwaafwa ukusambilisha abashaishiba ukubelenga nelyo abashibelenga bwino, kabili ni shani fintu cabomba bwino ku kulundulula programu wesu uwa kushimikila mwi sonde lyonse?
11 Mu nshita mu nshita, “umusha wa cishinka” alipayanya ifibombelo ifyapekanishiwilwa ibumba lya kulungatika, nelyo ilinono fye. Ku ca kumwenako, ni shani fintu abantu abengakabila ukwaafwa kwaibela pa mulandu wa cikulilo cabo ica fya ntambi nelyo ifya mipepele bengasakamanwa? Ni shani fintu twingabafwilisha ukwishiba ififwaikwa fya kwa Lesa? Mu 1982 twapokelele ico twalekabila fye—broshuwa wa mabula 32 Ipakishe Ubumi pe Sonde Kuli Pe na Pe! Ulu lupapulo lwaisulamo ifikope lwaliba cibombelo ca maka mu kusambilisha abashaishiba ukubelenga nelyo abashibelenga bwino. Uyu broshuwa alondolola ifisambilisho fya kutendekelako ifya mu Malembo mu nshila yayanguka ukumfwa. Ukutula pantu afumine, broshuwa wa Ipakishe Ubumi alyaafwa nga nshi ukulundulula programu wesu uwa kusambilisha kwa mwi sonde lyonse. Uyu broshuwa alipulintwa ukucila pali 105,100,000 balipulintwa mu ndimi 239, icalenga yene ukuba e lupapulo lwacishapo kupilibulwa pa mpapulo shonse isho Watch Tower Society yasabankanya ukufika pali lelo!
12, 13. (a) Ukutula 1990, ni nshila nshi iipya intu “umusha wa cishinka” apayanyako ku kufika pa bantu abengi nga nshi? (b) Ni shani fintu twingabomfya bavidio ba Sosaite mu butumikishi bwesu ubwa mwi bala? (c) Cibombelo nshi icipya icapayanishiwe nomba line ku kwafwilisha umulimo wesu uwa kupanga abasambi?
12 Ukulunda pa mpapulo shapulintwa, ukutendeka mu 1990 “umusha wa cishinka” alitupayanishisha inshila ya kusambilishishamo iyaba iipya icine cine iya kufikilamo pa bantu abengi nga nshi—bakaseti ba vidio. Mu October ya ulya mwaka, vidio wa baminiti 55 uwa mutwe wa kuti Jehovah’s Witnesses—The Organization Behind the Name alifumine—vidio wa kubalilapo ukupangwa na Watch Tower Society. Vidio ashaiwamina, uwaisulamo ifyebo fya kufunda, uwaba mu ndimi mupepi na 35, alanda pa kuteyanya kwa mu kusaalala kwa calo ukwa bantu ba kwa Yehova abaipeelesha abalefikilisha ikambisho lya kwa Yesu ilya kubilisha imbila nsuma mwi sonde lyonse. Vidio apangwa ukucilisha ku kwaafwilisha umulimo wesu uwa kupanga abasambi. Bakasabankanya ba Bufumu tabaikete na ku cani ukukuma ku kubomfya ici cibombelo cipya mu butumikishi bwa mwi bala. Bamo baleisenda mu fyola fyabo, abaiteyanya ukutambisha abalesekelela nelyo ukubaashimako. Mu kwangufyanya pa numa yafumine, kangalila enda alembele ukuti: “Bavidio basangwike e nshila ya mu mwanda wa myaka uwalenga 21 iya kufika pa mintontonkanya ne mitima ya mamilioni ya bantu, e co tulesubila ukuti uyu vidio aali fye e wa kubalilapo pali bavidio abo Sosaite ikabomfya ku kulundulula umulimo wa Bufumu.” Mu cine cine, bavidio balundwako balipayanishiwa, ukusanshako aba mutwe wa kuti The Bible—A Book of Fact and Prophecy no wa kuti Jehovah’s Witnesses Stand Firm Against Nazi Assault. Nga ca kuti bavidio ba Sosaite e ko baba mu lulimi luntu mumfwa, bushe mwalibabomfyapo mu butumikishi bwenu ubwa mwi bala?a
13 Nomba line icibombelo cipya, broshuwa aleti Cinshi Cintu Lesa Afwaya Kuli Ifwe?, alipayanishiwe ku kwaafwa mu mulimo wesu uwa kupanga abasambi. Mulandu nshi asabankanishiwilwe? Ni shani fintu engabomfiwa?
Ukubebeta Icibombelo Cipya
14, 15. Ni bani bantu broshuwa wa Cintu Lesa Afwaya apekanishiwilwa, kabili finshi fyabamo?
14 Ulupapulo lupya Cinshi Cintu Lesa Afwaya Kuli Ifwe? lwapekanishiwilwa abantu abasumina kale muli Lesa no kucindika Baibolo. Bakangalila benda pamo pene na bamishonari bakanshiwa mwi sukulu lya Gileadi ababomba imyaka iingi mu fyalo ifipiina balyafwileko mu kupekanya uyu broshuwa. Mwaba isambililo lyakumanina, ililanda pa fisambilisho fya kutendekelako ifya Baibolo. Imilembele yaba iya cikabilila, iyayanguka, kabili iya kulungatika. Pa nshita imo ine, ifyebo tafyaba ifyacishamo ukwanguka. Pa mbali ya kupayanya “ishiba” uyu broshuwa na kabili alapayanya “ifilyo ifyakosa” ukufuma mu Cebo ca kwa Lesa mu nshila iyo abantu abengi bengomfwikisha.—AbaHebere 5:12-14.
15 Mu myaka ya nomba line bakasabankanya ba Bufumu mu fyalo fyalekanalekana balilomba ulupapulo lwa musango yo. Ku ca kumwenako, iofesi lya Watch Tower Society mu Papua New Guinea lyalembele ukuti: “Ifisambilisho fya mipepele ifipinkana fyalifulunganya abantu. Balekabila ubulondoloshi bwa kulungatika ubwa cine, ubuletungililwa na malembo ayafulilako ayo bengaimwena abene muli baBaibolo babo. Balekabila ubulondoloshi bwaumfwika kabili ubwa kulungatika ubwa cintu Lesa afwaya ku Bena Kristu ba cine kabili ne myata ne fibelesho ifyo ashifwaya.” Broshuwa wa Cintu Lesa Afwaya e cintu fye tulekabila ku kwaafwa abantu ba musango yo ukwishiba ififwaikwa fya kwa Lesa.
16. (a) Ni bani na kucilisha bali no kumwenamo mu bulondoloshi bwayanguka ubusangwa muli broshuwa mupya? (b) Ni shani fintu ababa mu cifulo cenu ica kubombelamo bengamwenamo muli broshuwa wa Cintu Lesa Afwaya?
16 Ni shani fintu mwingabomfya ici cibombelo cipya? Intanshi, kuti abomfiwa ku kusambilila na bantu abashibelenga bwino nelyo abashatemwisha ukubelenga.b Abantu ba musango yo kuti bamwenamo mu bulondoloshi bwayanguka ubwa muli broshuwa. Pa numa ya kupituluka muli broshuwa uwatuminwe kuli bene mu kubangilila, amaofesi ya Watch Tower yalembele ifyakonkapo: “Broshuwa ali no kubomba bwino mu mbali ishingi isha calo umo abantu bashatemwa ukubelengesha.” (Brazil) “Kwalibako abafuma ku fyalo fimbi abengi abashibelenga ululimi lwabo kabili abashilaishibisha ukubelenga iciFrench. Uyu broshuwa kuti pambi abomfiwa nge ca kwaafwa mu kusambilila na ba musango yo.” (France) Bushe kuti mwatontonkanyako abantu abali bonse mu cifulo cenu ica kubombelamo abenganonkelamo muli broshuwa wa Cintu Lesa Afwaya?
17. Ni mu nshila nshi muntu broshuwa mupya engabelamo uwa kwaafwa mu fyalo ifingi, kabili mulandu nshi?
17 Ica bubili, mu fyalo ifingi uyu broshuwa kuti abomfiwa mu kutampa amasambililo ya Baibolo ku bantu abatiina Lesa te mulandu na pantu baafika mu fya masambililo. Kwena, kulingile ukubako ukubombesha ukutampa isambililo mu citabo ca Ukwishiba Uko Kutungulula ku Mweo wa Muyayaya. Lelo kuli bamo kuti pambi cabe cayangukapo ukutampa isambililo muli broshuwa. Lyene pa nshita yalinga, kuti mwayalukila ku citabo ca Ukwishiba, ica kwaafwa ukusambilila icikalamba kabili icasalwa ukubomfiwa. Ukukuma ku kubomfya muli iyi nshila broshuwa wa Cintu Lesa Afwaya, amaofesi ya Watch Tower yalembele ukuti: “Ukutampa amasambililo ya Baibolo kwalyafya, kabili ifintu filamoneka ukubako eyefilya ukukuma ku kutampa amasambililo lintu bakasabankanya batampila muli broshuwa.” (Germany) “Uyu musango wa broshuwa uli no kubomba bwino nga nshi mu kutampa amasambililo ya Baibolo ayapya, ayo lyene yengatwalilila ukutungululwa mu citabo ca Ukwishiba.” (Italy) “Nangu cingati abena Japan balisoma ukufikako apatali, abengi baishiba fye ifinono pa lwa Baibolo ne fisambilisho fya iko ifya kutendekelako. Uyu broshuwa alingile ukuba pa kutanukila apasuma ukuya mu citabo ca Ukwishiba.”—Japan.
18. Cinshi cintu tulingile ukwibukisha pa lwa kufika pa fifwaikwa fya kwa Lesa?
18 Amaofesi ya Sosaite ukushinguluke calo conse yalilomba uyu broshuwa, kabili yalisuminishiwa ukupilibula wene mu ndimi 221. Shi ulu lupapulo lupya nalube ulwa kwaafwa nga nshi mu kututungilila lintu tuleafwilisha bambi ukwishiba cintu Yehova Lesa afwaya bene ukucita. Kumfwa kuli ifwe, shi natwibukishe ukuti ukufika pa fifwaikwa fya kwa Lesa, ukusanshako ikambisho lya kushimikila no kupanga abasambi, kutupeela ishuko lyaumo mutengo ilya kulangilamo Yehova ifyo twamutemwa. Ee, cintu Lesa afwaya kuli ifwe tacayafisha. E nshila yawamisha iya kwikalilamo!—Ilumbo 19:7-11.
[Amafutunoti]
a Icitabo ca Jehovah’s Witnesses—Proclaimers of God’s Kingdom citila: “Bakaseti ba vidio tabalepyana nakalya pa cifulo ca mpapulo shapulintwa nelyo pa kushimikila kuntu tuya mu kushimikila fwe bene. Impapulo sha Sosaite shicili shilebomba ulubali lwakatama mu kwananya imbila nsuma. Umulimo wa ku ŋanda ne ŋanda uwa Nte sha kwa Yehova uletwalilila ukuba ulubali lwashimpwa nga nshi mu Malembo ulwa butumikishi bwabo. Nangu cibe fyo, bakaseti ba vidio pali nomba balesailisha pali ishi nshila pamo nge fibombelo fyakatama ifya kulundulwilamo icitetekelo mu malayo ya kwa Yehova ayaumo mutengo no kulenga abantu ukutasha pa co alecita pe sonde mu kasuba kesu.”
b Nga mulefwaya ubulondoloshi bwa fyo mwingatungulula isambililo muli broshuwa wa Cintu Lesa Afwaya, moneni icipande cileti “Icibombelo Cipya ku Kwaafwa Abantu Ukwishiba Ififwaikwa fya kwa Lesa,” pa mabula 16-17.
Bushe Kuti Mwalondolola?
Mulimo nshi uwa mbali shibili uo Yehova afwaya ababomfi bakwe ukubombako?
Mulandu nshi ukukakililwako kwesu ukwa kushimikila no kupanga abasambi kushabela ukwayafisha?
Fibombelo nshi fintu “umusha wa cishinka kabili uwashilimuka” apayanya ifya kubomfya mu mulimo wesu uwa kushimikila no kupanga abasambi?
Ni bani bantu broshuwa wa Cintu Lesa Afwaya apekanishiwilwa, kabili ni shani fintu twingaibomfya mu butumikishi bwesu?
[Icikope pe bula 24]
Umulimo wesu uwa kushimikila no kupanga abasambi tawayafisha
[Ifikope pe bula 26]
“Lekeni Lesa Abe Uwa Cine” (1946, capitulwikwemo mu 1952): 19,250,000 mu ndimi 54
“Icine Icitungulula ku Bumi bwa Ciyayaya” (1968): 107,000,000 mu ndimi 117 (Icilangilwe ca mu ciFrench)
“Kuti Waikala Kuli Pe na pe muli Paradise Pe Sonde” (1982): 80,900,000 mu ndimi 130 (Icilangilwe ca mu ciRussian)
“Ukwishiba Uko Kutungulula ku Mweo wa Muyayaya” (1995): 45,500,000 mu ndimi 125 (Icilangilwe ca mu ciGerman)