Afweni Abashaishiba Ukwiluka
1 Mu mulimo wa kupanga abasambi, tusambilisha bambi fintu Lesa afwaya kuli bene. (Mat. 28:19, 20) Ukucila pa Nte amamilioni yasano balepilikita ukubomba uyo wine mulimo mwi sonde lyonse. Te ku maawala ayo tubomba, impapulo isho tushalika, nelyo amasambililo ya Baibolo ayo tutendeka tumwena ukuti tuletunguluka. Tufika pa buyo bwesu lintu abantu bailuka cintu balesambilila no kubombelapo.
2 Ukwaafwa bambi lwa ku mupashi kusanshamo “ukulenga [abashaishiba, NW] ukwiluka.” (Ilu. 119:130) Ni lyeka fye lintu abantu ‘bailuka’ e lyo imitima yabo icilimushiwa no kukuntwa. (Mat. 15:10) Ilyo umulimo wesu uletanunuka no kuluminako, tulacila napo ukutesekesha ukuti tukabila ukulanda no kusambilisha mu nshila yayanguka. Uyo e mulandu Sosaite yasabankanishisha broshuwa wa kuti Cinshi Cintu Lesa Afwaya Kuli Ifwe? Mwaba kosi wa kusambilila uwapaka uyo alondolola ifisambilisho fya kutendekelako ifya Baibolo. Amasambililo yaba ayepi, amashiwi tayapikana, na makambisho yalyanguka ukukonkamo, ukulenga uyu broshuwa ukucebusha abantu abengi.
3 Uyu broshuwa akashalikwa capamo na bamagazini mu mweshi wa April na May. Ciletubululwa ukuti lintu muletantika imibombele yenu iya cila mulungu, mutantike ukutambika bamagazini pa Fibelushi lelo broshuwa kuti mwamutambika mu butumikishi bwenu mu nshiku shimbi isha mu mulungu. Twaleni broshuwa ku bantu abo kale kale bapokelela impapulo. Ibukisheni ukuti uyu broshuwa kuti aba uwa kwaafwa ukucilisha mu kusambilisha abana, abantu abalanda ululimi lwa cilendo, na bashibelenga bwino.
4 Bomfyeni Inshila Yayanguka: Lintu muletambika broshuwa wa Cintu Lesa Afwaya, losheni kwi bula 2, apo alondolola ukuti “uno broshuwa apekanishiwe ukuba kosi wa kusambilila Baibolo.” Alukileni kuli paragrafu 3 pe bula 3 ukulanga umulandu umuntu alekabila ukusambilila Baibolo. Bomfyeni imitwe imo iya masambililo iyo yalondolola icine ca Baibolo icayanguka, pa kuti mwingabalamuna ubuseko bwa muntu. Langilileni fintu uyu broshuwa alenga ukusambilila ukuba icintu ca kuipakisha, kabili ipeelesheni ukumwaafwa.
5 Tungululeni Isambililo Ililunduluka: Ubuyo bwesu bwalicila pa kutungulula fye isambililo—tufwaya ukupanga abasambi abakafwilisha ukupepa kwa cine mu kukosa. Broshuwa kuti asambililwa mu milungu fye kabili alingile ukutungulula kwi sambililo lya mu citabo ca Ukwishiba. (Moneni utulembo twa mwi samba pe bula 31.) Ukufuma fye pa kutendeka, afweni umusambi ukwishiba ukuteyanya kwa kwa Yehova. (Moneni icitabo ca Ukupelulula, amabula 377-8.) Komaileni pa bucindami bwa kulongana kwa cilonganino, kabili londololeni ukuti ukusangwako kutulenga ukwiluka apakalamba ifya kubelesha ukupepa kwa cine.—Heb. 10:24, 25.
6 Ukubombako uyu mulimo mu kufikapo mu April na May mu kushininkisha kuti kwatulenga ukuba aba buseko pa mulandu wa kwafwilisha abafumaluka ‘ukunonko mucetekanya’ uyo utungulula ku mweo.—Amapi. 4:5.