Ulubali 8—Ukutungulula Amasambililo ya Baibolo Ayalunduluka
Ukutungulula Abasambi ku Kuteyanya
1. Mulandu nshi cawamina ukusambilishako musambi icishinka cimo pa kuteyanya kwa kwa Yehova cila mulungu pe sambililo lya Baibolo?
1 Ubuyo bwesu ubwa kutungulula amasambililo ya Baibolo te kusambilisha fye ifyo twasuminamo, lelo no kwafwa abasambi ukuba ulubali lwa cilonganino ca Bwina Kristu. (Seka. 8:23) Broshuwa wa Inte sha kwa Yehova—Ni Bani? Finshi Basuminamo? kuti yatwafwa ukulenga abasambi ukuba ulubali lwa kuteyanya. Peeleni umusambi wa Baibolo umupya uyu broshuwa no kumukoselesha ukuibelenga. Mu kulundapo, cila mulungu bomfyeni amaminiti ayanono pe sambililo lya Baibolo ukusambilishako umusambi icishinka cimo pa kuteyanya kwa kwa Yehova.
2. Kuti mwakoselesha shani abasambi ba Baibolo ukusangwa ku kulongana?
2 Ukulongana kwa pa Cilonganino: Inshila ikalamba iyo abasambi ba Baibolo bengatashishamo ukuteyanya kwa kwa Lesa ni lintu balesangwa pamo na ifwe pa kulongana kwa cilonganino. (1Kor. 14:24, 25) E ico, kuti mwalenga abasambi benu aba Baibolo ukwishiba ukulongana kwa pa cilonganino kusano pa ku balondolwela ukulongana kumo na kumo pa nshita imo. Bebeni umutwe we lyashi lya ku cintubwingi ilikakonkapo. Balangisheni ifyebo mukasambilila pe Sambililo lya Ulupungu lwa kwa Kalinda ne Sambililo lya Citabo. Londololeni ukulongana kwe Sukulu lya Butumikishi ilya Bulesa no Kulongana kwa Mulimo. Nga mwapeelwa ilyashi mwi sukulu, nalimo kuti mwapitulukamo pamo na bo. Bebeniko ifishinka fyacipulamo pa kulongana. Bomfyeni ifikope fyaba mu mpapulo shesu ukubafwa ukwelenganya ificitika ku kulongana. Balaalikeni ukusangwa ku kulongana umuku uwa kubalilapo wine mwasambilila na bo.
3. Ni mbali nshi isha kuteyanya isho twingalanshanyapo?
3 Ilyo Icibukisho, ukulongana kukalamba, no kutandala kwa kwa kangalila wa muputule kwapalama, lubuleniko amaminiti yanono ukulondolola no kulenga umusambi akafwaishe ukusangwako. Panono panono asukeni amepusho pamo nga ya: Mulandu nshi twitilwa Inte sha kwa Yehova? Mulandu nshi twitila amayanda yesu aya kupepelamo ukuti Amayanda ya Bufumu? Milimo nshi baeluda na babomfi batumikila babomba mu cilonganino? Umulimo wa kushimikila ne fifulo fya kushimikilamo fyapekanishiwa shani? Impapulo shesu shipangwa shani? Ni kwi ukuteyanya kufumya indalama? Milimo nshi iofesi lya musambo ne Bumba Litungulula bakwata mu kutungulula umulimo?
4, 5. Ni shani fintu amavidio yesu yengalenga abantu ukumfwikisha no ukutasha ukuteyanya?
4 Amavidio Yalasambilisha: Inshila imbi iyo umusambi wa Baibolo engaipakisha ubusuma bwa kuteyanya kwa kwa Yehova, kupitila mu kutamba amavidio yesu. Kuti batamba amavidio pamo nga To the Ends of the Earth, iyi vidio ilangisha umulimo wesu uwa kushimikila mwi sonde lyonse, vidio ya Our Whole Association of Brothers ilangisha bumunyina bwa mwi sonde lyonse kabili vidio wa United by Divine Teaching ilangisha ifyo fwe Nte sha kwa Yehova twaikatana. Umwanakashi umo uwapokelele bamagazini besu ne mpapulo shimbi pa myaka isano aponeshe ifilamba ilyo atambile vidio ya Jehovah’s Witnesses—The Organization Behind the Name. Alicetekele baNte abalemutandalila, lelo pa numa ya kutamba ilya vidio, ayumfwile ukuti alingile ukucetekela no kuteyanya kwine. Isambililo lyalitendekwe kabili umulungu wakonkelepo asangilwe ku kulongana pa Ng’anda ya Bufumu.
5 Ukulalanshanya no musambi wesu amaminiti ayanono cila mulungu ukubomfya impapulo shapayanishiwa, kuti twatwalilila ukutungulula umusambi wa Baibolo ku kuteyanya kweka fye uko Yehova alebomfya pali lelo.