Langeni Ukuti Mulasakamana Abantu—Pa Kulanda pa Fibakumine
1 Umutumwa Paulo alelanda sana ifyalekuma abantu abo aleshimikila imbila nsuma. Alemona ifyo baba ne fyo batontonkanya. (1 Kor. 9:19-23) Na ifwe e fyo tufwile ukulacita. Nga twapekanisha libela imitubululo iba mu Ubutumikishi Bwesu Ubwa Bufumu kuti twaibomfya bwino ku kulanda pa fyo abantu mu cifulo tushimikila balekabila ukumfwa. Ilyo tulefika pa ng’anda kuti twamonako fimo ifingatwafwa ukwishiba ifyo umwine wa ng’anda atemwa no kulanda pali fi mu kulanshanya kwesu. Lelo, kuli na cimbi ico twingacita pa kuti tulande ifikumine abo tuleshimikila.
2 Lanshanyeni pa fyo Basosa: Ilyo tulebila imbila nsuma, ilingi tulepusha abene ba ng’anda icipusho pa kuti balandepo. Bushe mucita shani nga bayasuka? Bushe musuminisha fye ukwabula ukubikako amano no kutwalilila ukulanda ifyo mupekenye? Nelyo bushe ifyo mulanda filalanga ukuti namubika amano ku fyo abene ba ng’anda bacisosa? Nga mulebikako amano ku fyo bambi basosa, kuti mwabepusha ifipusho na fimbi ifisuma pa kuti mwishibe ifili mu mutima wabo. (Amapi. 20:5) Nga mwacite fyo, kuti camwangukila ukulanda pa bukombe bwa Bufumu ubo bengatemwa ukumfwa.
3 Ne cingatwafwa ukucite ci, kulafwaya ukulanda na pa fintu fimbi, te pali filya fye twacipekanya ukuti e fyo twalalanshanya na bantu. Nga ca kutila pa kutendeka twalanda pa bwafya bulembelwe mu nyunshipepala, e lyo umwine wa ng’anda ena alanda pali fimbi ificitike uko ekalila atemwa alanda pa cintu cimbi icimusakamike, tukalanshanya nankwe ifyo Baibolo isosa pa cimusakamike, nga cine cine tulefwaya ukumwafwa.—Fil. 2:4.
4 Bafweni Ukwishiba Ifyo Baipusha: Umwine wa ng’anda nga aipusha icipusho, napamo kuti cawama twaisakonkanyapo ukulanshanya inshita imbi ilyo twafwailapo ifyebo na fimbi pa fyo alefwaya ukwishiba. Kuti twamushiila ne mpapulo ishilelanda sana pa co aipusha. Ifi fyonse filanga fye ukuti tulafwaya sana ukwafwa bambi ukwishiba Yehova.—2 Kor. 2:17.