Bomfyeni Amatrakiti pa Kushimikila Imbila Nsuma
1. Bushe ababomfi ba kwa Lesa ukufuma na kale babomfya shani amatrakiti?
1 Abantu ba kwa Yehova balibomfya amatrakiti ayalanda pali Baibolo mu kusabankanya imbila nsuma. Mu 1880, Munyinefwe C. T. Russell na banankwe batendeke ukupulinta amatrakiti ayo baleita ati, Bible Students’ Tracts, kabili balepeela abalebelenga Ulupungu lwa kwa Kalinda pa kuti balesabankanya ku bantu. Amatrakiti yali ayacindama sana ica kuti, mu 1884 ilyo Munyinefwe C. T. Russell alembeshe akabungwe akashali ka bunonshi ku buteko, pa kuti balebomfya amatrakiti mu kutwala pa ntanshi umulimo wa Bufumu, ishiwi “trakiti” balilibikilemo mwi shina lya kuti, Zion’s Watch Tower Tract Society, nomba iyitwa ati Watch Tower Bible and Tract Society of Pennsylvania. Ilyo umwaka wa 1918 walefika, Abasambi ba Baibolo balishalike amatrakiti ukucila pali 300 milioni. Amatrakiti yalitwalilila ukubomfiwa sana mu kushimikila imbila nsuma.
2. Mulandu nshi amatrakiti yawamina?
2 Umulandu Yawamina: Amatrakiti yalamoneka bwino. Ifyebo ifinono ifyaba muli aya matrakiti filomfwika bwino kabili abantu balasambililako. Abengi abomfwa ubunang’ani ukubelenga magazini nelyo icitabo kuti batemwapo ukubelenga trakiti. Nangu fye ni bakasabankanya abapya nelyo abacaice cilabangukila ukushalika amatrakiti. Na kabili, amatraki yanono ica kuti tayafya ukusenda.
3. Shimikeni ifyamicitikile nelyo ifyalembwa ifilelangilila ifyo amatrakiti yacindama.
3 Amatrakiti yalilenga abantu abengi ukusambilila icine. Ku ca kumwenako, umwanakashi umo ku Haiti amwene trakiti mu musebo. Aliitolele no kubelenga, kabili alitemenwe no kutila, “nasanga icine!” Mu kuya kwa nshita, aile ku Ng’anda ya Bufumu kabili alitendeke ukusambilila Baibolo na pa numa alibatishiwe. Icalengele ni trakiti abelengele umwaba Icebo ca kwa Lesa ica maka.
4. Cinshi tukalafwaisha ukucita nga amatrakiti yali pa mpapulo shakushalika mu mweshi?
4 Ku Ng’anda ne Ng’anda: Apo amatrakiti yalatwafwa ukushimikila bwino, yakalaba e mpapulo tukalashalika mu myeshi imo imo ukutendeka mu November. Ico tukalafwaisha sana kulanshanya na bantu te kusha fye amatrakiti pantu basumina ukubashiila. Nga ca kuti batemwa ifyo twalanshanya nabo umuku wa kubalilapo twalanda nabo nelyo ilyo twabwelelako, kuti twatendeka isambililo lya Baibolo mu citabo ca Ico Baibolo Isambilisha nelyo mu lupapulo lumbi ulwa kusambililamo. Kuti twashalika shani amatrakiti ilyo tuleshimikila ku ng’anda ne ng’anda? Amatrakiti twakwata yaba ayapusanapusana, kanshi tufwile ukwishiba ifya kushalika ayo tuleshiila abantu muli uyo mweshi.
5. Kuti twacita shani pa kushalika amatrakiti ilyo tuleshimikila ku ng’anda ne ng’anda?
5 Ilyo tuleshimikila, kuti tuleyalula ifya kulanda ukulinga na trakiti tukwete e lyo ne cifulo tuleshimikilamo. Pa kutendeka ukulanshanya no muntu, kuti twamupeela fye trakiti. Icikope caba pa ntendekelo nalimo kuti calenga umuntu ukufwaya ukumfwilapo na fimbi. E lyo limbi kuti twalanga abo tulelanda nabo amatrakiti ayo tukwete pa kuti basalapo iyo bengatemwa ukubelenga. Nga tulebombela mu cifulo umo abantu batiina ukwiswila icibi abo bashaishiba, tulingile ukwikata bwino trakiti pa kuti abene ba ng’anda baimona bwangu, nangu kuti twabepusha nga kuti twapusha trakiti mwi samba lya cibi no kubeba ukuti tulefwaya batwebeko ifyo baletontonkanya pali trakiti twabapeela. Nga ca kuti pali trakiti pali icipusho, kuti twabepusha ukuti batwebe ifyo bengasuka ico cipusho. Nangu kuti twabepusha icipusho cimbi icingalenga bafwaya ukuti tulanshanye nabo. Lyena kuti twababelengelako fimo muli trakiti, apo twasanga icipusho ilyo tulebelenga kuti twaleka ba-asuka. Belengeniko na malembo ayalelanda sana pa mutwe wa trakiti. Pa numa yakulanshanya nabo, panganeni ilyo mukabwelelako. Nga ca kutila mu ncende mushimikila mulasha impapulo pa mayanda apashili abantu, kuti mwasha trakiti kulila fye mwabika apa kuti abapita nshila te kuti baimone.
6. Kuti twabomfya shani amatrakiti ilyo tuleshimikila mu musebo?
6 Ukushimikila mu Musebo: Bushe mwalibomfyapo amatrakiti lyo muleshimikila mu musebo? Abapita nshila bamo balaba abapamfiwa ica kuti te kuti tulanshanye nabo. E co kuti cayafya ukwishiba nga kuti batemwa ukulanshanya nabo. Kanshi kuti cawama ukubapeela fye trakiti pantu te kuti twishibe nga baleyabelenga magazini tulefwaya ukubapeela. Apo trakiti ilamoneka bwino kabili mwaba fye ifyebo ifinono, abo twapeela kuti bafwaya ukuibelenga ilyo bakwatako inshita. Lelo ilyo tulebapeela nga nabakwatako akashita, apo pene kuti twalanshanya nabo fimo ifili muli trakiti.
7. Landeni pa fyo bamo bashimikiile ilyo balelanda fye ilyashi na bambi ukubomfya amatrakiti.
7 Ukushimikila Ilyo Mulelanda fye Ilyashi: Calyanguka ukushimikila ilyo mulelanda fye ilyashi ukubomfya amatrakiti. Munyinefwe umo alasendako amatrakiti mwi tumba lya ca kufwala konse uko aleya. Alapeela umuntu onse uo akumanya, ku ca kumwenako, nga asanga uushitisha mwi tuuka alepusha nga kuti atemwa ukubelengako trakiti. Nga asumina, ninshi alamushiila. Ilyo munyinefwe umo no mwina mwakwe baleipekanya ukuya mu kutamba ififulo ku musumba umo, balishibe ukuti bakalakumanya abantu abafuma ku fyalo ifyalekanalekana, e ico basendele akatabo ka Good News for People of All Nations e lyo na matrakiti mu ndimi ishalekanalekana. Nga baumfwa uuleshitisha mu musebo nelyo uwikele mupepi nabo mu parka nangu umo baliila ifya kulya alelanda mu lulimi lwa ku calo cimbi, balemupeela trakiti iya mu lulimi alelanda.
8. Bushe amatrakiti yaba shani nge mbuto?
8 ‘Tandeni Imbuto Shenu’: Kuti twapashanya amatrakiti ku mbuto. Ilyo shibulimi aletanda imbuto, alatanda ishingi pantu teshiba ishikamena. Pali Lukala Milandu 11:6 Baibolo itila: “Ulucelo tanda imbuto shobe ukufika icungulo wileka ukuboko kobe kutuushe; pantu tawishibe ishikamena, ishi napamo shilya, nangu nga shonse shikaba ishisuma.” E ico kanshi, natutwalilile ukubomfya bwino amatrakiti pa kuti ‘tulesalanganya ukwishiba.’—Amapi. 15:7.
[Amashiwi pe bula 3]
Apo amatrakiti yalatwafwa ukushimikila bwino, yakalaba e mpapulo tukalashalika mu myeshi imo imo ukutendeka mu November