Mulebomfya Akatabo ka Ifyaba mu Cebo ca kwa Lesa Ilyo Muleshimikila
1. Katabo nshi akapya ako twapokelela aka kubomfya pa kushimikila?
1 Ku ntendekelo ya Baibolo iya mu ciNgeleshi iya Amalembo ya Calo Cipya iyo bapitulukamo, mwaliba icipande icitila, “Ifyaba mu Cebo ca kwa Lesa.” Mu ndimi shimo, ici cipande balicipilibula no kupangamo akatabo. Nomba kuti twabomfya shani aka katabo ilyo tulepekanya ifya kulanshanya na bantu ilyo tuleshimikila? Aka katabo kuti kamwafya sana ukutendeka ukulanshanya na bantu, pantu amalembo baliyabika pe lyashi limo na limo ilya mu Baibolo nga filya fyaba icitabo ca Ukupelulula.
2. Bushe kuti mwabomfya shani akatabo katila Ifyaba mu Cebo ca kwa Lesa ilyo muleshimikila?
2 Nalimo kuti mwabomfya icipusho calenga 8. Kuti mwatila: “Tulelanda na bena mupalamo besu pa cipusho abantu abengi bepusha ica kuti ‘Bushe Lesa e walenga ukuti abantu balecula?’ [Mu cende shimo, cilawama ukulanga umwine wa ng’anda icipusho.] Bushe imwe mwaishiba shani? [Lekeni basuke.] Baibolo yalyasuka bwino ici cipusho.” Belengeni no kulanshanya ilembo limo nelyo ukucilapo pa malembo ayalipo. Nga ca kuti umwine wa ng’anda alefwaya ukwishibilapo na fimbi, kuti mwamulanga amepusho yonse 20 ayaba pa ntendekelo ya aka katabo no kumweba ukuti asalepo icipusho ico engatemwa ukuti mukalanshanye nankwe umuku ukakonkapo. Nelyo kuti mwamupeela ulupapulo ulo tubomfya pa kusambilila na bantu Baibolo umwaba ifyebo ifingi pa lyashi mwacilalanshanya nankwe.
3. Kuti twabomfya shani akatabo ka Ifyaba mu Cebo ca kwa Lesa ilyo tuleshimikila mu cifulo umwaba abantu abashili Bena Kristu?
3 Icipusho calenga bune ne fipusho ifyalenga 13 ukufika ku 17 kuti fyayafwa abashimikila mu ncende umwaba abantu abashili Bena Kristu. Ku ca kumwenako, kuti mwabomfya ifyaba pa cipusho calenga 17. Kuti mwatila: “Tuletandalila ababa ne ndupwa. Bushe na imwe mulesumina ukuti mu ndupwa ishingi mwaliba amafya? [Lekeni basuke.] Ababa mu fyupo abengi balitemwa aya mashiwi: “Umukashi na o abe na katiina ku mulume wakwe.” [Nomba tamufwile ukulanda ukuti aya mashiwi yafumine pa Abena Efese 5:33. Nga mulelanda no mwanakashi, nalimo kuti mwalanda amashiwi yaba pa Abena Efese 5:28.] Bushe mulemona ukuti ukukonka uku kufunda kuti kwalenga mwalaikala bwino na bena mwenu?”
4. Finshi mwingacita pa numa ya kupwisha ukulanshanya no muntu uushili Mwina Kristu?
4 Nga mwapwa ukulanshanya, panganeni ilyo mwingabwelelako pa kuti mukatwalilile ukulanshanya. Nalimo kuti mwapangana ukuti mukalanshanye ilembo limbi ilili pa cipusho mwacilanshanyapo. Pa nshita yalinga, kuti mwaeba umwine wa ng’anda ukuti ifyebo mulanshanya nankwe fifuma muli Baibolo. Ukulingana ne fyo mwalanshenye umuku wafumineko e lyo ne fyo uyo muntu atontonkanya pali Baibolo, kuti mwamupeela ulupapulo ulo mulemona ukutila kuti lwa mwafwa.—Moneni ica mukati ica mu Ubutumikishi Bwesu Ubwa Bufumu ubwa December 2013.