ABACAICE BEPUSHA UKUTI
Kuti Nacita Shani pa Kuti Nilanaka Sana?
Bushe ulanaka sana? Nga ulanaka sana, cino cipande calakwafwa!
Icilenga ukunaka sana
Ukukwata ifya kucita ifingi. Umukashana uwe shina lya kuti Julie atile: “Muli fyonse ifyo tucita, batweba ukulabombesha, ukutwalilila ukucita bwino, no kulapanga ukucita ifyacila pa fyo tucita no kulabomba bwino. Ici cilalenga ifintu fileyafya!”
Ifya kupangapanga. Tulaba lyonse pa mafoni, pa matabuleti, na pa fintu fimbi kabili ifi kuti fyalenga twalanaka sana mu kupita kwa nshita.
ukukanalaala. Umukashana uwe shina lya kuti Miranda atile: “Abacaice abengi balacelela ukubuuka kabili tabalaala bwangu pantu balakwata ifya kucita ifingi, balaya ku masukulu, ku ncito e lyo no kwangalako, kabili cimoneka kwati takwaba mwa kulosha.”
Umulandu cacindamina
Baibolo ikoselesha ukulabombesha. (Amapinda 6:6-8; Abena Roma 12:11) Na lyo line taikoselesha ukucishamo ukubomba ica kuti mwalafilwa no kulabika amano ku fintu fimbi pamo nga ubumi bwenu.
“Nalilwike ukuti nshalelya akasuba konse pa mulandu wa kuti nabikile sana amano ku milimo iingi iyo nalebomba. Nalisambilile ukuti tacaba bwino ukulasumina fye imilimo yonse iyo bampeela pantu kuti fyakuma ubumi.”—E fyalandile Ashley.
Baibolo iitila: “Imbwa ya mweo yena yawama ukucila inkalamo iyafwa.” (Lukala Milandu 9:4) Nga ulebombesha, pa nshita iinono kuti walamona kwati walikwata amaka nge nkalamo. Lelo nga walanaka sana ubumi bobe te kuti bebe bwino.
Ifyo wingacita
Ulekaanako fimo. Baibolo itila: “Abafuuka e ba mano.” (Amapinda 11:2) Abantu abafuuka baleshiba ifyo bashingacita ne fyo bengacita kabili tabasumina ukucita ifyo bashingaba na maka ya kucita.
“Umuntu uunaka sana ni ulya uusumina fye ukucita fyonse ifyo bamweba, uufwaya ukubomba imilimo yonse iyo bamupeela. Uucita ifi ninshi tafuuka. Kabili mu kupita kwa nshita alanaka sana.”—E fyalandile Jordan.
Ukulatushako. Baibolo itila: “Ukutuusha panono kwawama ukucila ukucishamo ukubombesha no kuuma fye umwela.” (Lukala Milandu 4:6) Batila utulo twaba nge fya kulya fya kuli bongobongo, lelo abacaice abengi tabalaala amaawala 8 ukufika kuli 10.
“Nga ca kuti ninkwata ifya kucita ifingi sana, ishikwata inshita iikalamba iya kulaala. Nomba nshita shimo ndalaala bwangu pa kuti ubushiku bukonkelepo naba ne nsansa ilyo ndebomba.”—E fyalandile Brooklyn.
Uleipekanya. Baibolo itila: “Amapange ya wacincila yamulenga ukubomba bwino.” (Amapinda 21:5) Nga waishiba ifya kubomfya bwino nshita ne fya kubomba bwino imilimo ukulabomba bwino mu bumi bobe bonse.
“Te kuti ulebombesha nga ca kuti nauipekanya bwino. Nga ca kuti ilyo ulebomba naukwata ipepala apo watantika ifyo ulingile ukubomba, cilanguka ukuteuluka kabili takuba ukunaka sana.”—E fyalandile Vanessa.