3. Mulepekanya no Kusunga Bwino Ifya Kulya
MU ISRAELE, mwali umuntu uwaipike ifya kulya ukwabula ukubikako amano. Asabile imyungu ya mpanga iyo ‘taishibe bwino’ no kuisaakanya mu fya kulya aleipika. Abalilemo balitiinine ukuti ifya kulya fyalabakola. E calengele bapunde ati: “Muli imfwa mu mpoto.”—2 Ishamfumu 4:38-41.
Nga fintu twamona, tatufwile ukulya ifya kulya ifyo bashipike bwino pantu kuti twalwala nelyo ukufwa. Kanshi pa kuicingilila ku malwele yafuma ku fya kulya ifishili bwino, mulepekanya no kusunga bwino ifya kulya. Natulande pa fintu fine ifingamwafwa:
● Ifya kusungulula inama.
Akabungwe kalolekesha pa bulimi na pa fitekwa aka ku U.S.A. katile: “Nga mwafumya inama mu furiji mulya italala sana ica kuti yakosa no kuibika apashitalele, ilatendeka ukusunguluka. Lelo ilyo ileyailesunguluka, ku nse kuti kwaba utushishi tuleta amalwele nangu ca kuti mu kati icili iyakosa. Nga yasunguluka sana, utushishi tulasanda bwangu.” Kanshi nga mulefwaya ukusungulula ifya kulya ifili mu furiji, mulefifumya mulya fikosa no kufibika mulya umo fitalala fye ukwabula ukukosa nelyo mulefisungulula mu menshi ayatalala, kulila fye fili mu pulastiki nelyo mu cipe umo amenshi yashingengila.
● Muleleka ifya kulya fyapya sana.
Akabungwe ka World Health Organization katile: “Nga mwaleka ifya kulya fyapya sana, tunono sana utushishi utuleta amalwele utuba ku fya kulya utushingafwa.” Nga muleipika ifya kulya, maka maka inama, muleleka yapya ica kuti yanaka.a Bamo balaputula akamupusa pa kati pa kuti bamone nga naipya sana.
● Lyeni ilyo line.
Ifya kulya ifyaipikwa tafifwile ukwikala inshita iitali nga tafili mu furiji. Kanshi mulelya ifya kulya ilyo line fye mwafipika pa kuti tafyonaike. Ifya kulya ifyo tulya ifyatalala fifwile ukusungilwa umo fingekala ifyatalala. E lyo ifyo tulya ifyakaba na fyo tufwile ukufisungila umo fingekala ifyakaba. Nga mwaipika inama, kuti mwaisha pa mulilo nangu pa citofu apali icikabilila icinono fye.
● Ifya kulya nga fyashalapo, mulefisunga bwino.
Ba Anita, abekala ku Poland, bacita nga bapwisha fye ukwipika, baita no lupwa ukuti balye. Batile: “Ifya kulya nga nafifula, ndabikako fimo mu furiji, lelo mbika finono finono pa kuti nga fyakosa fikashupa ukusungulula.” Ifya kulya nga fyashalapo e lyo mwafibika mu furiji, mwilaleka fyaikalamo ukucila pa nshiku shine.
Kuti mwacingilila shani ulupwa lwenu nga mwaya mu kuliila uko bashitisha ifya kulya, apo bantu bambi abepika?
[Futunoti]
a Ifya kulya fimo pamo nga inkoko, fifwile ukwipikwa pa mulilo uwingi nangu pa citofu icikabile sana.
[Akabokoshi pe bula 16]
SAMBILISHENI ABANA BENU: “Abana bandi nga baleipika ifya kulya, ndabeba ukubelenga no kukonka ifyo balanda pa fya kwipika ifyo ifya kulya.”—Ba Yuk Ling, aba ku Hong Kong