Farkor Romawa Bansya ḇekur Fararur Farḇuk ya

ROI ḆEDWAREK

Fafisu iwara, sinan sya siso ḇepon kaku ḇena swaf fa sawawos kuker romawa sesi ḇekur fararur farḇuk ḇaido seks ine. Bisa sawos yoḇ si imnis umur ma roi sfandun kaku na.

Ḇape kirinema iḇese kwar. Syap The Lolita Effect ikofen, ”Rowama sya bisa smam roi ḇefesepen kuker fararur farbuk fyor sibaḇa kaker, ma roi nabor ḇero internet sfasos faro romawa mkun sya kako naser fararur farbuk na.” Roi ḇeradine nafnoḇek romawa sya ke nafrur samswen si?

ROI FANDUN FA WAFAWI NA

Sonin, fasfas, ma vidio ḇeser pornografi naisya nabore. Ro syap Talk to Me First, Deborah Roffman fyas bo doḇe ”awawos, iklan, felem, syap, dow, ḇaido acara ḇero TV, SMS, farfnak game, HP, ma komputer nafo kaku kuker wos, ḇaido farfnak ḇefrur fa ḇebor sya [romawa babo, insape ḇesur muryase, ma roma mkun sya] na skara, ḇaido sifawibos kaku, snar seks . . . roi ḇefandun diri”.

Beḇoḇ roi annane siso ḇesasar ya. Ḇefrur iklan ma ḇeboḇ sya na sfasnai ma sifrur sansun ḇemnis ḇa faro romawa kasun sya, ma sfarkor si fa sna mamam ḇesyadadi ḇekur moḇ sisnai raya. Syap So Sexy So Soon ikofen snar ”sonin ma vidio ḇefasnai fararur farbuk sifrur na insama romawa sya sikowes ker roi ḇebabo na”.

Sifawi monda nasrow ḇaime. Kofawi snonggaku ḇena fawawi ḇekur oto na iḇese kuker snonggaku ḇefawi ḇeyunpyum oto ro sampak na. Rarirya kako, kona fawawi ḇekur fararur farḇuk iḇese kuker kobuk fawawi anna fa kofrur snemuk ḇepyum na.

Farkarkor ya: Imnis ra ḇepondi ḇa, kirine fandun fa wafnoḇek romawa besi fa sna fawawi ḇepyum insama bisa ”sifawi smambir kwar roi ḇeḇye ma roi ḇeḇarḇor”.​—Ibrani 5:⁠14.

ROI FANDUN FA WAFRUR NA

Auso ḇekofen beri ḇe roma inai Bedi. Roi ine samswene, ḇape Au iso ḇesyus kaku fa wawos ḇekur seks ine faro romawa ḇesi. Wamgak awer ḇo wafrur na.​—Wos farkin ro Refo: Amsal 22:6.

Wawos ḇepon roi ḇesena resari. Ḇardibur wawos roi nakam ḇekur seks ine faro roma inai Bedi, ipyum ya swewar swaf ḇesrow sape wawos na, imbude mgoisya ro marandan ya ḇaido mgoisya mgofararur ro rum. Insama imarisen fyawar roi ḇyabir na, ipyum ya wafuken kakara ḇyena ḇekur roi ani. Rupa ra, ”Wamarisen iklan ḇemnis radirya ke?” Ipyum ya wafuken i radine, ”Kwara ido, rosai ḇefnai fa ḇefrur iklan sya sepake sonin ḇemnis radirya fa sbukiboḇ roebor sena?” Kyarem fakfuken ya kwar ido, mura wafuken ḇe i, ”Moḇsa wakkara roi anna rai?”​—Wos farkin ro Refo: Ulangan 6:​6, 7.

Mam umur ḇyedi resari. Faro romawa mgun sya, farkor si fa sap kuker nyan ḇemnis rofmar sena ma moḇ smamwarek manggunsi ro snonggaku nari imbe ḇeraro si. Fyor siba muryas, farkor si ḇekur moḇ snon ma bin suna romawa rai. Fafisu seromawa babo kwar, farkor si fa sfawi roi ḇero baken sena ma kenem ḇepyum ḇekur seks na.

Wafarkor si fa sfawi kenem ḇepyum na. Fyor sibaḇa mgun kaker, farkor si insama sanggarkar awer, sisouser, ma sfasnai syowi. Inja, nari nwa samambraḇ fa wawos ma wafarkor si fa sfawi kenem ḇepyum ḇekur seks ine. Ḇape, mam insama Au kako nwa kenem ḇepyum na. Imnis raris, wamarisen ḇa snon ma bin suḇarek kayamyam fyor sufarḇuk ḇaim ido wakofen bos kaku roi ḇeradirya ḇe roma inai Bansi. Wakofenḇair ḇe si rosai ḇefnai kenem ḇeradiryama naḇye ḇa kaku. Syap Beyond the Big Talk ikofen, ”Romawa babo sya imḇude na sifrur fararur farḇuk ḇa, fyor sifawi sinan sesi sayin kaku roi ani.”

Fasnai nyan ḇepyum. Sinan mgoya iḇye kada mgona kenem ḇepyum imnis mgofarkor kwar na ḇe romawa mgoḇesi. Rupa radine, na mgombrif rofyor mgorower farfyar ḇefrur kamambrif snar sawos roi ḇemamas na ke? sisansun sansun ḇemnis ḇa na ke? sembuk snon ḇaido bin ke? Kenem ḇeradiryama nafrur roi ḇekaku imbe farkor na ḇe roma ḇansi rya nun royoḇa.​—Wos farkin ro Refo: Roma 2:​21

Nwa kakara ḇepyum pdef. Seks ima roi ḇepyum ḇeramuma ro Allah diri, ma ine bisa nun marisen faro ḇefarbuk kwar sya. (Amsal 5:​18, 19) Wakofen ḇe roma inai Bedi insama ifawi snar ras oso insape daksmai marasrisen ro fararur farḇuk ya, mboi wamewer ḇyesneso ḇaido nya makakwarek snar ifrur fararur farḇuk fyor ḇye snonswa ḇaido binswa ḇaim.​—1 Timotius 1:​18, 19.