Rosai Nari Allah Ifrur Na Ro Ras Ḇarpon Iyama?

Allah imnis ra bati ḇefrur pyum. Inja, rofyor wasmai samswen wakyar na ifnoḇek au. Nwa bati ḇefrur pyum ido, nari ifrur rarirya. Ḇape, snonkaku ḇebor sikofen Allah ima bati ḇepyum ḇa snaro ifnoḇek snonkaku sya ḇa. Ḇape kakuya, Allah ifnoḇek snonkaku ḇebor sya kwar. Syadiwer Allah na ipyos samswen ma ḇaḇekandera koḇena. Rariso nyan ya?

ALLAH NA IPYOS ROI ḆEḆARḆOR NAKAM

Ḇerandak ya, na ipyos yaiso knam ro ḇaḇeḇarḇor na. Refo ikofen ḇe ko, ”Supswan ḇesiper ine isya ro papoik Ibirisya.” (1 Yohanes 5:19) Inja knam ro ḇaḇeḇarḇor ine iso Ibiris ya. Yesus ikofen iso ’ḇepoik supswan ine’. (Yohanes 12:31) Snaro Ibiris awyae ḇyenaine inja supswan ine nafo kuker ḇaḇeḇarḇor. Rosai na Allah ifrur ya?

Roro Yesus Kristus i, Allah Yahwe na ipyos Ibiris fararur ḇyenakam. (Ibrani 2:14; 1 Yohanes 3:8) Refo doḇe Ibiris mankundi ifawi snar, ”fafisu ḇyedi fyanam kwar.” Inja kero wer nari ismai samamyai. (Fasasna Faro Yohanes 12:12) Allah I kako na myunpres snonkaku ḇeḇarḇor sya.​—Mazmur 37:9; Amsal 2:22.

ALLAH NA IFRUR SUPSWAN INE ḆYEFIRDAUS

Fafisu snonkaku ḇeḇarḇor sya seḇemunpres ro supswan, Allah Yahwe na ifrur roi ḇebor insama snonkaku sya sḇarek ro supswan ine. Barakas rosai na kosmai na?

Supwan ine ifo kuker aski ma payamyum. ”Snonkaku ḇena sne ḇemayar sya siso nari ḇena supswan, nari sismai kaku marasrisen ḇeba snar ḇaḇeaski ḇebor.”​—Mazmur 37:11.

Roḇean naisya nabor. ”Mor ḇesur nabor nari nasya ro supswan; bonkor urek bon na nasya nabor kaku.”​—Mazmur 72:16.

Snonkaku syakam sna rum ma fararur. ”Sḇawes rum ma sḇarek ro na; na sifrur yaf anggur ma san bon na. . . . snonkaku yakinfir sya na siso ḇesmai marisen ro fararur sena.”​—Yesaya 65:21, 22.

Wamarisen faro asas naine ke? Na kerower asas anna kam ndarirya.

ALLAH NA IPYOS DAFDUF MA MARMAR

Kirine kokam koduf ma komar. Ḇape ro ras ḇarpon iyama na koduf ma komar werḇa. Roro farsarser fasaspar Yesus i, ’snonkaku ḇekyar faroi sya sroḇa, mboi sisma kankenem fyoro’. (Yohanes 3:16) Rosai fainda ro farsarser fasaspar Yesus ḇyedi faro ko?

Dafduf na naisya werḇa. ”Snonkaku osoḇaḇeri ḇeḇarek rodiwa nari ikofen, ’Yadufe.”​—Yesaya 33:24.

Marmar ya nari ḇyepoik faro snonkaku sya werḇa. ”Nari doren marmar ya isof fioro-fioro, ma Tuan Bena Papoik Yahwe I nari ipyos ḇeri mkarui ro snonkakusya kam mka sena.”​—Yesaya 25:8.

Snonkakusya na simar werḇa. Allah na ḇyuk ”kankenem ḇekain fyoro-fyoro fnoḇek Yesus Kristus.”​—Roma 6:23.

Snonkaku na sikenem fyoro-fyoro. ”Nari aḇiḇer ya isya faro snonkaku ḇeḇor ḇemar sya, iḇye snonkaku ḇenapes sya ma ḇenapes ḇa sya.” (Farfyar ro Manwawansya 24:15) Ineiso fakamaman ḇeba kaku ro Allah.

Rariso Allah ifrur kaku asas Ḇyenane?

ALLAH IFRUR KARAJAN ḆEPYUM OSO

Allah na ifrur kaku asas Ḇyena fa ndarirya faro snonkaku ma supswan roro Karajan Ḇyedi ro nanki. Ma Yesus Kristus na ḇe Manḇepoik. (Mazmur 110:1, 2) Yesus iwan manfamyan ḇyesi fa sḇenadi faro Karajan ani imnis radine, ”Kma nkobedi ro boiyaswa. . . [Karajan] Ḇedi ryama kada.”​—Matius 6:9, 10.

Karajan Allah na ḇyepoik ma ipyos ḇaḇekandera ma samswen ro supswan ine bori. Karajan ine ipyum syadi faro snonkaku sya! Iso ḇefnai fa Yesus mankundi ḇyensewar fa ḇyaryas, ’Ankankinem Ḇeḇye ro Karajan ine.’ Ro fafisu fararmyan ḇyedi ro supswan ma iwan manfamyan ḇyesya kako fa sakfrur rarirya.​—Matius 4:23; 24:14.

Snaro Yahwe iswar kaku snonkaku sya, Ḇyeasas nari ifrur roi ḇepyum nakame faro si. Na wamarisen mamḇir I ma wafanam syadi kuker I ke? Wafanam kuker I ido, fainda rosai na wasmai ya? Artikel ḇeuser na nari fyasnaiḇairna.