Rofyor Roi Ḇemun Nkur Au

”Nkoḇoryae kaku kukro roi ḇebor nkoḇena kam napromes rofyor saprop ya namsiser ma war ya isyap.”—Andrew, ḇeraker Sierra Leone.

”Wam doḇer ya myun raposa, nkokaḇer ḇe rum nkoḇeja. Roi oso isya ḇaḇeri. Nkawos wos oḇa. Binkbor ayeja kyain wepur ḇe sop ḇo kyanes.”—David, ḇeraker Aimando Virgin.

ROFYOR mkoḇye ro roi ḇemun na ido, imbude na wafawi rosai snonkaku ḇesesya sakkara na, raris: simkak kawan, sikyar ḇa, sikmom, sefisfyas, ma smafu famfnome. Snonkaku sibor sismai roi ḇeradine ido, siḇor famfnom ma simor rawo skara fa simar monda.

Rofyor roi ḇemun nkur Au ḇo roi ḇebor Bena kam napromes ido, na waḇoryae ma wamkak ker. Imbude kwara wamewer wakenem werdi. Mboi, Refo doḇe kenem ḇepyum syadi ro ras ḇarpon iyama naisi.

WOS ḆERO REFO NBUK SNEPREI ḆE AU

Pengkhotbah 7:8 doḇe, ”Ipyum syadi papupes ro roi oso ḇardibur ro ḇepon ya.” Fafisu insape swambraḇ ro roi ḇekur Au na, imbude kwara kenem Bedi ḇe ḇarpon rya naser payamyum oḇa. Mboi, wawaf monda ḇo swewar fa swambraḇ wer ido, roi nakam nari napyum kaḇer.

Refo doḇe fafisu oso isya ”ro diwa nari sipok fa srower wer mkarem kankanes ḇaido kankanes sneso oḇa.” (Yesaya 65:19) Roi ḇemun ḇekur ko nari naisya ḇa kwar. Roi ḇefnai fa koduf ma komkak kawan nari napromes isof fyoro-fyoro. Ine nari ndariri rofyor supswan ine fyadwer ḇe firdaus ḇero papoik Allah Karajan Ḇyedi. (Mazmur 37:11, 29) Manseren Allah, Manḇepoik koḇedi doḇe, ”Roi ḇebor ḇekwar na nari siswarepen na wer ḇa kwar, ḇaido nsae ro sisnesna wer ḇa.”—Yesaya 65:17.

Kwarapan: Sinan ḇeba ḇefrur konya, fyasos kwar fa ḇyuk ras ḇesnai ma saneraro ro fafisu iyama ḇe ko, isoine kankenem ḇefo aski ro papoik Allah Karajan Ḇyedi. (Yeremia 29:11) Wafawi kakaku ro Wos Refo ine kwar, inja wakyar na wasmai payamyum kaker ro kenem ine ke? Sally, ḇero randak fawar ine, ikofen ḇo doḇe, ”Snar yawasen muraro rosai nari Karajan Allah ifrur ro ras ḇarpon iyama, nane nafrur aya fa yasambraḇ ro samswen ḇekur aya na.”

Inja, wamarisen fa wafawi nabor wer rosai nari Karajan Allah ifrur ḇe snonkaku koine ke? Wafrur roi ine kada, rofyor roi ḇemun nkur Au, wakyar kaku na wasmai payamyum kaker ro fafisu ine kako. Rarirya, na waryaḇ fa wawaf fafisu ḇepyum ro ras ḇarpon iyama isoine nari wamkei ro roi ḇemun na. Refo naser anun ḇepyum nari ḇefnoḇek Au fa swambraḇ rofyor roi ḇemun nkur Au. Kwarapan fawar ḇeḇeso ḇerama nane.

Mnuk ro Refo Ḇefnoḇek Au

Wenef pyum.

”Ipyum syadi mnaisu kermkun ḇardibur ro fararur marḇak kuker ḇramin risuru ma sasewar wam ya.”—Pengkhotbah 4:6.

Snonkaku ḇemamkarkir sya soḇe rofyor roi ḇemun nkur snonkaku oso ido, na ismai samswen syadi. Ma denef pyum ḇa ido nari imsor fasawsaw. Inja, fandun fa wenef pyum.

Fawar rosai kwara na faro snonkaku ḇesesya.

”Makakwarek ro snonkaku sneri nafrur fa sneri ikar, mboi wos ḇepyum nafrur fa sneri iryaḇ.”—Amsal 12:25.

Wafar rosai kwara na faro karyer ḇefanam Bansi oroḇaido bati Bedi. Na srower Au monda ḇa, mboi na sḇuk wos anun ḇepyum ma sifnoḇek Au.a

Wawasen muraḇe fafisu ḇepyum ro ras ḇarpon iyama.

”Ḇape kowaf nanki ḇebabo ma supswan ḇebabo Allah ḇyeasas kwar, ma ro diwa, snonkaku syakam nari sifrur roi ḇekaku ḇesya kwar.”—2 Petrus 3:13, NW.

a Oso ipok ḇa kwar ḇaido sneri ikar ma imkak kawan kaku ido, ipyum ya sia sun si ḇe dokter.