FARKARKOR 37
Anun ro Refo ḇekur Fararur ma Pipi
Ras oso wamgak na nwa fararur ḇaido pipi oḇa ke? Kaku ḇa bo, na samswen fa komam fandun koḇena ro ras-ras ma samsyom koḇena ḇe Yahwe I fa sumbran kayame. Imboi, Refo ya isya byuk wos anun ḇepyum ḇe ko.
1. Rosai Refo ikofen ḇekur fararur na?
Manseren Allah imarisen insama kosmai marasrisen ro fararur koḇena. Refo ya doḇe, ”Roi ḇepyum syadi faro snonggaku isoine . . . ismai marasrisen ro fararur marḇak ḇyena.” (Pengkhotbah 2:24) Manseren Yahwe manggundi fyararur marḇak. Kakso nyan Ḇyena kuker kofararur myaren ido, nari imarisen ma manggunko kakmarisen.
Kofandun fararur ḇae. Ḇape, komam awer na ḇe roi ḇefandun syadi rawo kofarander samsyom koḇena ḇe Yahwe I. (Yohanes 6:27) Yahwe doḇe kosewar ḇepon marisen Ḇyena ro kenem koḇena ido, nari myam fandun koḇena ro ras-ras na.
2. Rariso kona mamam ḇemnis faro pipi ya?
Refo ya doḇe pipi na nakadaunwarek ko, ḇape doḇe imbe komarisen ido kofandun pipi ya derer ḇa. (Pengkhotbah 7:12) Inja, Refo danunepen ko fa koswar syadi awer pipi na mboi ’kokenem imnis kuker rosai isya faro ko’ kwar. (Kowasya Ibrani 13:5.) Komarisen faro roi kosmai kwar na kada, nari koḇoryae ḇa. Kukro kokara ker roi kosmai na nasrow ḇaim ido, nari kosmai marisen oḇa. Rarirya, koḇenyaki ḇa insama kobukikowes roi kofandun manggun ḇa na. (Amsal 22:7) Oso wer ido, koḇinggwan ro roi ḇedenem ko raris farfnak judi ma fararur ḇefrowes ko fa kona pipi na nabor fasaw.
3. Moḇsa kofasnai frur pyum ro kobuk kumpan na?
Yahwe ima Allah ḇefasnai frur pyum, ma kakfrur raris I kuker ’kobuk ma korwas’ roi kosmai na. (1 Timotius 6:18) Kofasnai frur pyum kuker kobuk kumpan koḇena fa koksaramper fararur ro sidang ma kofnoḇek snonggaku ḇefandun sya, ḇepon syadi iso naek srar koḇesya. Kobuk nabor ke roḇa yo, Yahwe myam ro na ḇa, mboi Yahwe myam rosai ḇedif ko fa kobuk ya. Kobuk kuker sne ḇesiper ido, na komarisen ma Yahwe I kako na dakmarisen.—Kowasya Farfyar 20:35.
SWEWAR KAKU WER
Nari kawos roi ḇepyum rosai nari wasmai snar nwa mamam ḇepyum faro fararur Bena ma wamarisen faro rosai wasmai kwar na.
4. Fasnai syowi ḇe Yahwe I ro moḇ wafararur raya
Wis koḇena kuker Yahwe I na nasnai ro moḇ kofrur fararur koḇena raya. Komam VIDIO, raimnai kawos fakfuken suine.
Ro vidio insanja, rosai ḇefrur fa wamanen Jason kenem ḇyena ma moḇ fyararur raya?
Rosai ifrur fa nya mamam ḇepyum faro fararur ḇyena?
Kowasya Kolose 3:23, 24, raimnai kawos fakfuken ine:
Rosai ḇefnai fa moḇ komam fararur koḇena ima roi ḇefandun kaku?
Kofandun fararur ḇae. Ḇape, komam awer na ḇe roi ḇefandun syadi rawo kofarander samsyom koḇena ḇe Yahwe I
5. Komarisen faro roi kosmai kwar na kada na kosmai payamyum
Snonggaku ḇebor sisewar marmar kaku fa sismai pipi nabor syadi. Ḇape Refo danunepen ko fa kofrur roi ḇese. Kowasya 1 Timotius 6:6-8, raimnai kawos fakfuken ine:
Rosai Refo danun ḇe ko fa kofrur ya?
Kona pipi nabor ḇa yo, bisa komarisen. Komam VIDIO, raimnai kawos fakfuken na.
Ro vidio insanja, kina ansine sna pipi nabor ḇa, fama rosai ḇefrur si fa simarisen?
Kona pipi nabor kwar mboi kokara nasrow ḇaim ido ryariso? Yesus ikofenḇair fawar oso ḇefasnai roi ḇeradine nari dun samswen ḇe ko. Kowasya Lukas 12:15-21, raimnai kawos fakfuken ine:
Farkarkor rosai wun ro Yesus fawar ḇyenane?—Mam mnuk ḇe 15.
Kowasya ma kokara Amsal 10:22 ma 1 Timotius 6:10. Raimnai kawos fakfuken nane:
Kwara ido rosai ḇefandun syadi ya, nwa wis ḇepyum kuker Yahwe I ke nwa pipi nabore? Kwarem rarirya kukro?
Swewar syadi pipi na ido, samswen rosai nari wasmai ya?
6. Yahwe nari fyasos fandun koḇena
Swaf fa kofasnai kokyar ḇe Yahwe iso fafisu samswen fa kosmai fararur ḇaido pipi koḇena nabor kuf ḇa. Komam VIDIO, raimnai kawos fakfuken na.
Ro vidio insanja, samswen rosai mambesrar ani ismai na?
Rosai monda ifrur fa myam samswen anna?
Kowasya Matius 6:25-34, raimnai kawos fakfuken ine:
Rosai Yahwe ikofen nari ifrur faro snonggaku ḇesewar ḇepon marisen Ḇyena?
SIA SOḆE: ”Yafararur marḇak mande, bisa yafasos fandun ro rum nggoḇena. Iso ḇewar fa yaso ari ro minggu nakam ḇa.”
Mnuk ro Refo minsai ḇefrur fa wakyar mam ḇepon samsyom ḇe Yahwe ima nyan ḇepyum nairi?
FARKARKOR ḆYENA
Kofandun fararur ma pipi ḇae, mboi komam awer roi nane nadwarek samsyom koḇena ḇe Yahwe I.
Waswarepen Kaḇer
Rosai na ḇefnoḇek Au fa nwa mamam ḇepyum faro fararur Bena?
Wamarisen faro roi wasmai kwar na kada, payamyum rosai nari wasmai ya?
Yahwe ikofen kwar nari fyasos kawasa Ḇyesi fandun sena. Inja moḇsa fasnai Auma wakyar faro Yahwe wos Ḇyenane rai?
SWEWAR NABOR WER
Refo doḇe kona pipi ima syasar ke?
”Roi Ḇeḇarḇor Nakam Ndramuma ro Pipi ya Ke?” (Fasfas ro situs jw.org)
Wawasya moḇsa kobuk roi kosmai na ḇe ḇesesya raris moḇ Allah imarisen raya.
”Rosai Refo Ikofen ḇekur Kobuk ḇe Snonggaku Ḇesesya?” (Fasfas ro situs jw.org)
Komam rosai ḇefnoḇek snon oso fa imnai ifnak judi ma kyarawraw wer ḇa.
”Yamanen Kaku Yafnak Judi Balap Kuda” (Syap Baryas 1 November 2011)