!Lav We i Gat Moa Paoa i Bitim Wan Hariken!
Tufala hariken ya, Katrina mo Rita, tufala i kilim ol ples long Yunaeted Stet, we oli stap klosap long solwota blong Galf blong Meksiko. Tufala i spolemgud plante samting mo plante man oli lusum laef blong olgeta. Plante taosen Witnes blong Jeova tu oli kasem trabol long tufala hariken ya.
Sam komiti we i givhan long ol man long taem blong ol disasta, we branj ofis blong ol Witnes blong Jeova long Yunaeted Stet i lidim, oli tekem aksen kwiktaem blong givhan long ol man. Long Louisiana, oli mekem 13 ples we ol komiti oli stap long hem blong lidim wok ya blong givhan long ol narafala, mo oli stanemap 9 dok, mo 4 stesen blong karem bensin. Komiti ya i wok long wan eria we i kavremap 80,000 kilometa skwea. Klosap 17,000 Witnes blong Jeova long olgeta ples blong Yunaeted Stet mo blong 13 narafala kantri, oli kam blong wok olsem ol volontia, mo blong bildim bakegen ol haos we hariken i spolem. Frut we i kamaot i soem se Kristin lav i gat moa paoa i bitim ol strong samting olsem hariken mo graon we i seksek.—1 Korin 13:1-8.
Ol volontia ya oli riperem bitim 5,600 haos blong ol Witnes, mo 90 Haos Kingdom, hemia ples blong wosip blong ol Witnes blong Jeova. Oli riperem klosap evri haos blong ol Witnes mo evri Haos Kingdom we hariken i spolem. Blong folem tok blong Galesia 6:10, we i pulum ol Kristin blong oli “mekem i gud long olgeta man,” ol Witnes blong Jeova oli givhan tu long plante we oli no Witnes.
BLONG yumi givhan long ol narafala long taem blong disasta, hemia i min se yumi mas lego ol samting we yumi nomo yumi wantem, be ol blesing we oli kamaot biaen oli plante. Tingbaot toktok blong seven Witnes we oli lukaot long ol defren haf blong wok ya blong givhan long ol narafala long taem blong disasta.
“Wan Spesel Taem Long Laef Blong Mi”
Robert: Hemia i wan spesel taem long laef blong mi, taem mi stap wok long komiti we i givhan long ol man we disasta i spolem olgeta. Mi mi gat 67 yia, mo long komiti blong mifala, mi nao mi olfala moa long ol narafala. Mi mi wok wetem wan bigfala grup blong ol volontia, mo plante long olgeta oli ol gudfala yangfala we oli wokhad insaed long kongregesen. !I gud tumas blong luk ol yangfala ya oli lego ol samting we olgeta nomo oli wantem, from we oli lavem Jeova mo ol narafala Kristin!
Waef blong mi, Veronica, hem i givhan bigwan long mi. Blong mekem se mitufala i save joen long wok ya, mi mi tekem desisen blong lego wok we mi mi stap long hem blong 40 yia, mo Veronica i sapotem desisen blong mi. Naoia, long wan wik, mitufala i spenem wan naet blong klinim ol ofis, hemia wok we mitufala i mekem blong kasem mane. Mitufala i lanem blong laef wetem smol mane nomo mo blong glad long wan laef we i no fasfas. Mitufala i wok wetem ol narafala we oli wantem mekem Jeova i glad, mo hemia i mekem mitufala i kasem save moa se i minim wanem blong putum Kingdom blong God long fasples long laef blong yumi. (Matiu 6:33, NW) Bakegen mo bakegen, mitufala i luk se Jeova i lukaotgud long ol man blong hem.
Frank: Long taon blong Baton Rouge, mi mi lukaot long kakae blong ol man we oli wok olsem volontia. Taem mifala i stat long wok ya blong kukum kakae, mifala i wok 10 kasem 12 aoa long wan dei, long seven dei long wan wik. Be ol blesing oli plante, olsem blesing ya we mifala i gat blong luk stret wetem ae blong mifala bigfala paoa blong Kristin lav.
Blong wan wik olsem, sam volontia oli kam givhan blong kukum mo seremaot kakae. Plante long olgeta ya oli askem blong kam givhan bakegen, mo samfala oli sanem ol leta mo oli ring blong talem tangkiu from we oli gat janis ya blong wok smol blong givhan. Olgeta ya oli lego ol samting we olgeta nomo oli wantem, mo samting ya i tajem hat blong mi mo waef blong mi, Veronica.
Skin Blong Hem i Kam Kolkol
Gregory: Mi mo waef blong mi, Kathy, mitufala i salem olfala haos blong mitufala long Las Vegas, Nevada. Biaen, mitufala i pem wan trak, mo wan smol haos we i gat wil blong hem, blong trak i save pulum, mo hemia nao hom blong mitufala. Taem mitufala i mekem se laef blong mitufala i no fasfas, mitufala i naf blong joen long wok ya blong bitim tu yia, blong givhan long ol man long Louisiana. Samting we mitufala i lanem moa long taem ya, i bitim ol narafala taem long laef blong mitufala, hemia olsem wanem ol tok blong Malakae 3:10 (NW) i tru we i tru, taem Jeova i talem se: “Testem mi plis, . . . [mo yufala i] luk bambae mi mi openem doa blong heven blong bambae ol blesing oli kamdaon long yufala mo bambae mi givim olgeta samting ya long yufala gogo yufala i no moa nidim.”
Plante taem, mifala i wantem laf taem ol man oli talem se: “!Hemia i wan bigfala samting ya we yutufala i mekem, blong lego ol samting we yutufala nomo i wantem!” Toti yia bifo, mi mo Kathy, mitufala i wantem wok long branj ofis blong ol Witnes blong Jeova long Yunaeted Stet, be mitufala i no save mekem olsem from we mitufala i gat pikinini mo mitufala i mas lukaot long olgeta. Wok ya blong givhan long olgeta we disasta i spolem, i givim janis ya long mitufala blong mekem moa long wok blong God. Wan narafala blesing, hemia we mitufala i wok klosap long ol narafala Witnes, mo sam long olgeta oli rili gat gudhan long wok blong olgeta. Wan brata we i kuk blong mifala, i bin wan jif kuk long wan bigfala restoron, mo wan narafala i bin stap kuk blong tu presiden blong Yunaeted Stet.
Wok ya blong givhan long ol man long taem blong disasta, i gat bigfala paoa long plante volontia. Taem wan volontia we i gat 57 yia blong hem, i tokbaot wok we hem i mekem blong givhan long olgeta we oli kasem trabol long hariken, skin blong hem i kam kolkol from. Sam Witnes tu we oli no naf blong kam givhan long taem ya, oli leftemap tingting blong mifala. Wan dei, tu volontia, we wok blong tufala i blong tekemaot ol nalumlum we oli gru long ol haos we wota i bin kam insaed long olgeta, tufala i karem wan bigfala pepa i kam we i gat bigfala raeting long hem. Ol memba blong trifala kongregesen long ples blong tufala volontia ya, hemia Nebraska, oli wokem bigfala saen ya, mo olgeta evriwan, ol pikinini tu, oli saenem nem blong olgeta long hem.
‘Mifala i Luk We God i Keagud Long Ol Man We Oli Safa’
Wendell: Wan dei afta long hariken Katrina, branj ofis blong Yunaeted Stet i askem mi blong mi go jekem ol Haos Kingdom mo ol haos blong ol Witnes blong Jeova long Louisiana mo Mississipi, blong luk se oli nogud olsem wanem. Hemia nao stat blong wan wok we i tijim mi long plante samting. Mi mo waef blong mi, Janine, mitufala i stap 32 yia long wan ples we i nidim plante man blong talemaot Kingdom long hem, mo mitufala i luk klia olsem wanem Jeova i keagud long ol man blong hem. Be naoia, mitufala i luk fasin kea blong God long wan rod we i bigfala moa.
Long taon blong Baton Rouge, mi mi gat janis blong wok olsem jeaman blong komiti ya we i givhan long taem blong disasta. Nating se wok ya i no isi, hem i givim bigfala glad long mi. Taem mifala i stap wok blong givhan long ol narafala, komiti blong mifala i luk we plante taem God i stretem ol problem, i openem sam rod long mifala, mo i keagud long ol man we oli safa, long wan fasin we Haefala Papa blong yumi nomo i save mekem.
Plante man oli askem se: “?Olsem wanem yu mo waef blong yu, yutufala i naf blong mekem wok ya i bitim tu yia finis, blong givhan long ol man we oli kasem disasta?” Hemia i no isi oltaem. I gat plante samting we mitufala i mas jenisim long laef blong mitufala. Be samting we i gud, hemia we mitufala i luk plante gudfala samting i kamaot from we mitufala i mekem we ‘ae blong mitufala i kliagud.’—Matiu 6:22, NW.
Long faswan taem we grup blong mifala i goaot blong lukaot ol man long New Orleans blong sevem olgeta, mifala i no gat plante taem blong spel. Samting we i mekem se i moa had, hemia se ol ami oli kontrolem taon ya, from ol samting oli olbaot mo ol man oli kilim eni man we oli faenem long rod. I isi blong mifala i harem se mifala i no naf taem mifala i luk ol bigbigfala wok we i stap long fored blong mifala.
Mifala i mitim plante taosen Witnes we oli bin lusum olting blong olgeta. Mifala i prea wetem olgeta mo traem blong mekem oli haremgud bakegen long tingting blong olgeta. Biaen, wetem help blong Jeova, mifala i stat blong wok. From olgeta samting we mi bin luk mo mi gotru long hem long tufala yia we mi stap long wok ya, mi harem olsem se mi spenem plante yia finis long ples ya.
Plante taem, taem mi harem se bodi mo tingting blong mi i taed we i taed bitim mak, wan grup blong ol niufala volontia oli kamtru, samfala oli stap blong sam manis, mo sam narafala oli kam blong stap kasem taem we wok i finis. Taem mifala i luk plante volontia olsem we oli wantem mo oli glad blong kam givhan, mo we plante long olgeta oli yangfala, hemia i givim paoa long mifala blong gohed.
Plante taem Jeova i givhan long mifala. Taem mifala i jes kasem ples we hariken i kilim, mifala i faenemaot se ol tri oli foldaon long bitim 1,000 haos blong ol brata blong yumi. Wok ya blong tekemaot ol tri i denja tumas, mo mifala i no gat ol tul mo i no gat naf man blong mekem wok ya, ale mifala i prea long Jeova long saed ya. Long nekis dei nomo, wan brata i kam askem sipos hem i save givhan long mifala. Brata ya i gat wan trak mo ol stret tul we mifala i nidim blong tekemaot ol tri ya. !Wan narafala taem, Jeova i ansa long prea blong mifala afta long 15 minit nomo, mo wan narafala taem bakegen, ol tul we mifala i prea from oli stap kam bifo we mifala i talem amen! Yes, Jeova i pruvum se hem i stap “ansa long ol prea.”—Ol Sam 65:2.
“Mi Mi Tinghae Long Blesing Ya Blong Stap Olsem Wan Witnes Blong Jeova”
Matthew: Wan dei afta long hariken Katrina, mi mi givhan blong mekem plan blong karem 15 tan blong ol presen kakae, wota, mo narafala samting we ol man oli nidim long ples we hariken i spolem. !Ol man blong Jeova oli rili pruvum se oli gat fasin ya blong givim!
Blong givhan moa long ol narafala, mi mo waef blong mi, Darline, mitufala i muv i go long wan ples we i klosap moa long ples blong disasta, mekem se mitufala i save kasem ples ya long tu aoa nomo. Long ples ya we mifala i muv i go long hem, wan brata i givim wan haftaem wok long mitufala, mekem se mitufala i save spenem bighaf blong taem blong mitufala long wok ya blong givhan long ol man long disasta. Wan narafala brata i givim wan smol haos long mitufala blong slip long hem. Mi mi gat bigfala tangkiu long Jeova from we mi joen long bigfala famle ya blong ol brata we oli gat lav, mo hemia i mekem se mi mi tinghae long blesing ya blong stap olsem wan Witnes blong Jeova.
Ted: Smoltaem afta long hariken Katrina, mi mo waef blong mi, Debbie, mitufala i glad blong go givhan long ol narafala. Afta long sam dei nomo, mi faenem wan olfala haos we i gat wil long hem, mo i no hevi tumas blong trak blong mitufala i save pulum. Man we i salem haos ya i putum praes long hem we i haf blong praes we i stret long wan haos olsem. Mitufala i naf blong pem haos ya, mo hem i wan ansa long ol prea blong mitufala. Bitim tu yia nao haos ya i hom blong mitufala.
Long wan taem we mitufala i spel, mitufala i salem haos blong mitufala mo bighaf blong olting blong mitufala. Samting ya i mekem se mitufala i fri blong mekem moa wok long New Orleans, we naoia mi mi lukaot long wok ya blong bildim bakegen ol haos blong ol brata sista mo ol Haos Kingdom. Wan bigfala samting we mitufala i luk long taem ya, hemia olsem wanem Jeova i soemaot long ol man we oli wosipim hem se hem i “stamba blong fasin blong givhan.” Plante oli lusum haos blong olgeta mo Haos Kingdom blong olgeta tu. Antap long hemia, taem oli mas muvaot mo go stap long wan narafala ples, oli mas lego kongregesen mo fulwan teritori blong olgeta we oli bin stap prij long hem blong talemaot gud nius.—2 Korin 1:3.
‘Bilif Blong Olgeta i Tajem Hat Blong Mifala’
Justin: Long Oktoba 2005, toktok i goaot blong askem ol volontia blong go givhan long ol man we hariken i kilim ples blong olgeta, klosap long solwota blong Galf blong Meksiko. Mi mo waef blong mi, Tiffany, mitufala i kwik blong fulumap pepa blong askem blong go, mo long Februari 2006, branj ofis i singaot mitufala blong givhan long grup we i wok blong putum ruf long ol haos. Grup ya i wok long Kenner, New Orleans.
Evri dei mifala i wok long wan defren haos, ale taem mitufala i mitim ol Witnes blong ples ya, bilif blong olgeta mo fasin blong olgeta blong dipen long God i tajem hat blong mitufala. Mo evri dei mitufala i luk plante samting we oli pruvum gud long mitufala se i krangke nomo blong trastem ol samting long saed bodi. Taem mitufala i luk ol bigfala wok we Jeova i givhan long ol man blong hem blong mekem, mo taem mitufala i givhan long ol Kristin brata sista blong mitufala, glad ya we mitufala i kasem i bigwan tumas.
[Bokis/Foto blong pija long pej 18]
Wan Dei Long Ol Ples We Komiti i Yusum Blong Lidim Wok Ya Blong Givhan
Long ol ples we komiti i yusum blong lidim wok ya blong givhan long olgeta we disasta i kasem olgeta, ol volontia we oli wok long kijin oli stat blong kuk samwe long haf pas fo long moning. Long seven klok moning, olgeta volontia oli joen wanples blong tokbaot wan vas blong Baebol blong ten minit. Long taem olsem, brata we i jeaman i talem welkam long ol niuwan, mo hem i tokbaot sam stori blong ol gudfala samting we i hapen i no longtaem.
Afta long prea blong talem tangkiu long Jeova, evriwan oli haremgud blong dring ti mo kakae, mo biaen, oli go long ol wanwan wok blong olgeta. Samfala oli stap nomo blong wok long ofis, wok long ples blong wasem klos, mo long kijin. Olgeta we oli kuk, oli mekem rere sam kakae we long medel dei bambae ol man we oli lukaot long wanwan tim blong wok, oli kam karem.
Evri mande naet, grup blong ol volontia oli joen wanples blong mekem wan Baebol stadi we i stanap long magasin ya, Wajtaoa, we ol Witnes blong Jeova oli printim. Ol stadi ya oli givhan long olgeta evriwan blong oli holemstrong fasin fren blong olgeta wetem Jeova, from hemia nao stamba samting we i save mekem olgeta oli stanap strong longtaem wetem glad, mo mekem we oli gat stret tingting long wanwan wok we oli kasem.—Matiu 4:4; 5:3.
[Bokis blong pija long pej 19]
“Mi Mi Bin Gat Rong Tingting Long Saed Blong Yufala”
Wan woman long New Orleans, i putum wan notis long doa blong hem we i talem se: “I tabu blong ol Witnes blong Jeova oli kam long ples ya.” Wan dei, wan grup blong ol volontia oli stat blong riperem wan haos we hariken i spolem, we i stap klosap long haos blong woman ya, narasaed rod nomo. Evri dei, woman ya i stap wajem ol man we oli wok, mo hem i luk lav mo kaen fasin blong olgeta. I no longtaem, hem i wantem save moa long saed blong olgeta, ale hem i krosem rod, i go luk olgeta blong faenemaot se oli stap mekem wanem. Taem hem i kasem save se ol volontia ya oli ol Witnes blong Jeova, hem i talem se afta long hariken ya, i no gat wan long jos blong hem we i ring long hem. Woman ya i talem se: “I klia se mi mi bin gat rong tingting long saed blong yufala.” ?Wanem frut i kamaot from? Hem i tekemaot notis long doa blong hem, mo hem i askem long ol Witnes blong oli kam visitim hem.
[Tok blong pija long pej 16, 17]
Robert mo Veronica
[Tok blong pija long pej 16, 17]
Frank mo Veronica
[Tok blong pija long pej 17]
Gregory mo Kathy
[Tok blong pija long pej 17]
Wendell mo Janine
[Tok blong pija long pej 18]
Matthew mo Darline
[Tok blong pija long pej 18]
Ted mo Debbie
[Tok blong pija long pej 18]
Justin mo Tiffany