Hem i Sapraes Tumas Long Help We i Kam Long Wekap!

MAN BLONG WEKAP! LONG BENIN I RAETEM STORI YA

◼ Taem Noel, we i gat 23 yia, i tekem desisen blong stopem skul blong hem, mo i stat blong prij fultaem olsem wan Witnes blong Jeova, ol famle blong hem oli wari sipos bambae hem i naf blong pem ol samting we hem i nidim blong laef. I tru se i no isi blong Noel i faenem wan ples we hem i save wok haftaem nomo. Taswe, taem Wekap! i tokbaot “Five Keys to Finding a Job” (“Faef Impoten Rod Blong Faenem Wan Wok”), Noel i ridimgud haf ya bakegen mo bakegen.a Wekap! ya i kamaot long stret taem we Noel i nidim. ?Olsem wanem? ?Wekap! ya i givhan long hem? Yes, be i no long rod we hem i ting se bambae i kasem help long hem.

Bos blong wan praevet skul i luk we Noel i stap prij long ol haos wanwan, nao i askem long hem sipos hem i wan Witnes blong Jeova. Bos ya i nidim wan narafala tija long skul blong hem, mo hem i luk se ol Witnes blong Jeova oli gat gudhan blong tijim ol man, ale hem i askem Noel sipos hem i save wan man we i wantem wok ya. Taem Noel i talem no, bos ya i se: “?Be olsem wanem long yu?”

Noel i neva tij long wan skul bifo, mo sam samtaem, hem i no save toktok gud, i olsem se tang blong hem i sot. Long Benin, hemia i wan problem, from we komiti blong edukesen i putum wan rul se ol tija oli mas pasem wan eksam blong meksua se oli toktok gud mo tang blong olgeta i no sot. Bos blong skul ya i talem long Noel se: “Sipos yu kasem setifiket blong yu, wok ya i blong yu.”

Noel i gohed gud long Tiokratik Skul, hemia wan skul we ol Witnes blong Jeova oli mekem evri wik long ol kongregesen blong olgeta, blong trenem ol man blong oli kam nafgud blong toktok long fored blong ol man. Noel i stap mekem ol pablik tok tu long kongregesen blong hem. Nating se i olsem, hem i fraet taem hem i mas mekem eksam ya.

Man we i lukaot long eksam ya, i givim wan buk long Noel, mo i askem long hem blong i ridim wan haf we oli putum red mak long hem. Ae blong Noel i bigbigwan taem hem i luk se haf ya we hem i mas ridim hemia, “Faef Impoten Rod Blong Faenem Wan Wok.” Hem i ridim gud haf ya, mo i kasem setifiket blong hem.

Biaen, man we i lukaot long eksam ya i talem se oltaem nomo hem i stap ridim ol buk blong ol Witnes blong Jeova. Hem i talem se: “Ol buk ya oli givim plante save, mo oli raetem olgeta long fasin we i nambawan, mekem se plante taem mi yusum olgeta long ol eksam.”

Noel i stat blong tij, mo bos blong skul i wantem blong yusum hem wan moa yia, be Noel i gat narafala plan. Oli bin askem long hem blong i go wok long branj ofis blong ol Witnes blong Jeova, mo tede, hem i stap wok yet long ples ya.

[Futnot]