Japta 17

?Taem Kraes i Kambak Ol Man Oli Lukluk Hem Olsem Wanem?

1. (a) ?Wanem promes ya we Kraes i bin mekem? (b) ?Blong wanem i gat nid blong Kraes i kambak?

“BAMBAE MI MAS KAMBAK.” (Jon 14:3) Jisas Kraes i mekem promes ya long ol aposol blong hem, long naet ya bifo we hem i ded. Ating yu yu agri se naoia ol man oli nidim pis, mo gudfala laef ya, we Kraes i save givim taem hem i kambak i kam King long Kingdom blong hem. ?Be Kraes i kambak olsem wanem? Hu ol man ya we oli save lukluk hem, mo oli lukluk hem olsem wanem?

2. (a) ?Taem hem i kambak, Kraes i tekem ol tabu man blong hem, wetem ol aposol tu, oli go stap wea? (b) ?Oli gat wanem kaen bodi long ples ya?

² Taem hem i kambak, Kraes i no kam blong stap long wol ya. Be olgeta ya we bambae oli king oli rul wetem hem, Kraes i tekem olgeta ya oli go stap wetem hem long heven. Jisas i talem long ol aposol blong hem, i se: “Bambae mi mas kambak blong tekem yufala i kam long ples blong mi, blong bambae yufala tu i save stap long ples ya we mi mi stap long hem.” (Jon 14:3) Olsem ya nao, taem Kraes i kambak, olgeta ya we oli go long heven oli kam speret man, nao oli save lukluk Kraes long gudgudfala speret bodi blong hem. (1 Korin 15:44) ?Be weswe long ol narafala man we oli no blong go long heven? ?Oli save lukluk Kraes taem hem i kambak?

BLONG WANEM HEM I NO SAVE KAMBAK OLSEM WAN MAN

3. ?Baebol i talem wanem blong soemaot we neva ol man bambae oli save luk Kraes bakegen?

³ Long sem naet ya Jisas i talem long ol aposol blong hem, i se: “I no longtaem, nao wol ya bambae i no moa save luk mi.” (Jon 14:19) “Wol” ya i minim olgeta man. Ale, Jisas i minim se ol man blong wol ya bambae oli no moa save lukluk hem taem hem i ded. Aposol Pol i raetem se: “Yes, bifo, long taem ya we Kraes i man, maet mifala i save makem hem long fasin blong man nomo, be naoia mifala i no moa save makem hem olsem.”​—2 Korin 5:​16, NTB.

4. ?Wanem i soemaot se taem Kraes i kambak, hem i strong speret man we yumi no save luk?

⁴ Be plante man oli bilif se Kraes bambae i kambak long sem bodi ya we hem i gat taem oli kilim hem i ded, mo we ol man bambae oli save lukluk hem. Be Baebol i talem we Kraes bambae i kambak long glori wetem olgeta enjel, mo hem bambae i sidaon “long gudfala jea blong hem.” (Matyu 25:31) Sipos Jisas i kambak olsem wan man nomo, nao hem i sidaon long wan gudfala jea samples long wol ya, fasin olsem i mekem we hem i daon moa long olgeta enjel. Be taem hem i kambak hem i strong moa, mo i gat moa glori i bitim olgeta speret pikinini ya blong God. Yumi no save lukluk ol enjel ya, mo yumi no save lukluk Jisas tu.​—Filipae 2:​8-11.

5. ?Blong wanem Kraes i no save kambak long wan prapa bodi?

⁵ Be long 1,900 yia bifo i no olsem. Jisas i mas mekem we hem i daon, i kam olsem prapa man nomo. Hem i mas givim gudfala laef ya we hem i gat taem hem i man, blong pemaot yumi. Jisas i eksplenem samting ya, i se: “Bred ya we bambae mi givim, hemia mit blong bodi blong mi, we bambae mi givim blong ol man long wol oli gat laef.” (Jon 6:​51, NTB) Jisas i bin mekem sakrafaes wetem prapa bodi blong hem, blong sevem olgeta man. ?Be sakrafaes ya i gud blong hamas yia? Aposol Pol i ansa i se: “From we Jisas Kraes i givim bodi blong hem wan taem nomo, blong mekem sakrafaes we i blong foreva, taswe naoia yumi kam tabu man.” (Hibrus 10:10) From we Kraes i givim bodi blong hem finis blong sevem olgeta man, hem i neva save tekem bodi ya bakegen, blong hem i kam prapa man bakegen. Hemia nao stampa risen we i mekem i klia, se neva Jisas Kraes i save kambak long prapa bodi ya we hem i givim wantaem finis blong mekem sakrafaes we i blong foreva.

PRAPA BODI I NO SAVE GO LONG HEVEN

6. ?Blong wanem plante man oli ting se Kraes i bin tekem prapa bodi blong hem i go long heven?

⁶ Be plante man oli ting se Kraes i bin tekem prapa bodi blong hem i go long heven. Oli talem we i mas olsem from we taem Kraes i bin stanap i laef bakegen long ded, prapa bodi blong hem i no moa stap long beregraon blong hem. (Mak 16:​5-7) Mo tu, afta long ded blong hem, Jisas i bin soemaot hem long ol man blong hem long wan prapa bodi, blong soemaot we hem i laef bakegen. Wantaem, Hem i letem aposol Tomas i pusum han blong hem i go insaed long hol long saed blong Hem, blong Tomas i save bilif se Hem i rili laef bakegen. (Jon 20:​24-27) ?Yu ting se samting ya i soemaot se taem Kraes i girap i laef bakegen long ded, hem i laef long sem bodi ya we hem i gat taem oli kilim hem i ded?

7. ?Wanem i soemaot se taem Kraes i bin go long heven hem i speret man?

⁷ No, I no olsem ya. Baebol i klia, i se: “Kraes i ded wantaem nomo, naf blong tekemaot sin blong oltaem . . . , hem i prapa man taem oli kilim hem i ded, be naoia [God] i mekem hem i laef long speret.” (1 Pita 3:18) Ol man we oli gat bodi blong mit-mo-blad, oli no save laef long heven. Baebol i tokbaot olgeta ya we oli stanap oli laef bakegen blong go long heven, i se: “Dedbodi ya we oli berem, i prapa bodi ya. Be taem man ya i stanap i laef bakegen, hem i speret bodi. . . . mit mo blad i no save go insaed long kingdom blong God.” (1 Korin 15:​44-50) Ol speret man nomo, we oli gat speret bodi, olgeta ya nomo oli save laef long heven.

8. ?Wanem i hapen long prapa bodi blong Kraes?

⁸ ?Wanem i hapen long bodi ya blong Jisas we oli berem? ?I tru we ol man blong hem oli faenem we beregraon blong hem i emti? Yes i tru ya, from we God i bin tekemaot bodi blong Jisas. ?Blong wanem God i mekem olsem? Blong mekem profet tok blong Baebol i kamtru. (Sam 16:10; Wok 2:31) Jeova i bin tekemaot bodi blong Jisas, olsem hem i mekem bifo wetem bodi blong Moses. (Dutronome 34:​5, 6) Mo tu, sipos Jeova i livim bodi blong Jisas i stap nomo long beregraon, bambae ol man blong Jisas oli konfyus, oli no save we Jisas i girap finis i laef bakegen long ded. ?Blong wanem? From we long taem blong olgeta, oli no savegud tumas yet long ol samting long saed blong speret.

9. ?Be olsem wanem Tomas i save pusum han blong hem i go insaed long hol long saed blong Jisas, long taem ya we hem i laef bakegen finis?

⁹ ?Be olsem wanem long bisnes ya blong Tomas, taem hem i pusum han blong hem i go insaed long saed blong Jisas? ?Samting ya i soemaot we Jisas i stanap i laef bakegen long sem bodi we oli bin nilim long pos? No gat. Jisas i bin putum bodi blong man nomo, olsem samfala enjel oli mekem bifo finis. Be blong mekem Tomas i bilif long Hem, Hem i tekem wan bodi we i gat ol hol, olsem ol hol blong nil, mo olsem hol ya we oli stikim. Long ae blong ol man blong hem, hem i olsem wan prapa man ya. Hem i save kakae mo dring, olsem ol enjel ya oli bin mekem taem oli stap wetem Ebraham.​—Jenesis 18:8; Hibrus 13:2.

10. ?Wanem i soemaot we Jisas i bin putum ol defren kaen bodi?

¹⁰ Bodi ya we Jisas i bin putum taem Tomas i luk hem, i kolosap sem mak long bodi ya we Hem i gat taem oli kilim Hem i ded. Be tu, Hem i bin putum ol defren kaen bodi, taem i soemaot hem long ol man blong Hem. Taswe Meri, woman Magdala fastaem hem i ting se Jisas i man blong lukaot long garen. Long sam narafala taem, fastaem ol man blong hem oli no luksave hem, from we bodi blong hem i defren. Be taem oli harem tok blong hem, mo oli luk fasin blong hem, hemia nao samting ya we i makem hem, nao oli save se man ya, Jisas ya.​—Jon 20:​14-16; 21:​6, 7; Luk 24:​30, 31.

11, 12. (a) ?Jisas i aot long wol long wanem fasin? (b) ?Oraet, bambae hem i kambak long wanem fasin?

¹¹ Blong 40 dei biaen long taem ya we hem i bin stanap i laef bakegen long ded, Jisas i bin soemaot hem long ol man blong hem. (Wok 1:3) Afta, hem i go antap long heven. Be maet samfala man oli askem se: ‘?Be olsem wanem long toktok ya we tufala enjel i bin talem long ol aposol, se Kraes “bambae i mas kam long sem fasin ya we yufala i luk, taem hem i go antap long heven”?’ (Wok 1:11) Yes, tufala i talem olsem ya. Be tufala i talem se “long sem fasin,” tufala i no talem long sem bodi. ?Jisas i aot long olgeta long wanem fasin? I kwaet fasin nomo, hem i no mekem wan bigfala lafet, no wan samting olsem. Ol aposol blong hem nomo, oli save we hem i go. Ol man blong wol oli no save ya.

¹² Baebol i talemgud olsem wanem Jisas i aot long ol aposol blong hem, i go antap long heven: “Nao taem olgeta oli stap lukluk long hem yet, God i leftemap hem, mo wan klaod i kam kavremap hem, nao olgeta oli no moa luk hem bakegen.” (Wok 1:9) Olsem ya nao, taem Jisas i stat blong go antap long skae, wan klaod i haedem hem long ae blong ol ­aposol blong hem. Oli no moa save lukluk Jisas taem hem i stap go. Ale, hem i go long heven long speret bodi blong hem. (1 Pita 3:18) Taem bambae hem i kambak, i sem mak bakegen hem i kambak long wan speret bodi, nao ol man oli no save lukluk hem.

OLSEM WANEM EVRI AE I LUKLUK HEM

13. ?Wanem mining blong tok ya se “olgeta ae bambae oli lukluk” Kraes taem bambae hem i kam wetem ol klaod?

¹³ ?Be wanem mining blong Revelesen 1:7? Aposol Jon i raet long vas ya, i se: “!Luk! Hem i kam wetem ol klaod, mo olgeta ae bambae oli lukluk hem, mo ol man ya we bifo oli sperem hem; mo olgeta man long evri ples long wol bambae oli kilim bodi blong olgeta, from we oli sore tumas taem oli tingbaot hem.” Long vas ya, Baebol i no tokbaot ol man we oli stap lukluk wetem prapa ae blong olgeta, be i tokbaot olgeta we oli stap lukluk wetem maen no tingting blong olgeta. Taem wan man i luksave, no i haremsave long wan samting, i olsem we ol samting i klia nao long ae blong maen blong hem. Baebol tu i tokbaot “ae blong save blong yu.” (Efesas 1:18; King James Version) Ale, taem Baebol i talem se “olgeta ae bambae oli lukluk hem,” hemia i min se evriwan bambae oli luksave we Kraes i stap finis.

14. (a) ?Olgeta ya we oli bin “sperem” Jisas, oli pija blong hu? (b) ?Blong wanem bambae plante man oli sore tumas taem oli luksave we Kraes i stap finis?

¹⁴ Olgeta man ya we oli bin “sperem” Jisas, oli ded finis longtaem. Be olgeta ya oli pija blong ol man ya we tede oli stap mekem nogud long ol man blong Kraes. (Matyu 25:​40, 45) I no longtaem, nao Kraes bambae i kilim i ded ol rabis man olsem. Oli kasem woning finis we bambae i mas olsem ya. Taem Kraes bambae i stap kilim i ded olgeta, bambae ol man ya oli “luk,” olsem oli luksave, wanem samting ya we i hapen long olgeta. !Bambae oli sore tumas from!

?KRAES BAMBAE I KAMBAK LONG WOL?

15. ?Wod ya “kambak,” oli save yusum olsem wanem?

¹⁵ Wod ya ‘kambak’ i save minim defren kaen samting. Olsem hemia: Man i save kambak long aelan, ol sik man oli save ‘kambak’ long strong bakegen, mo wan man we bifo hem i stap rul i save ‘kambak’ i tekem paoa bakegen. Sem mak bakegen, God i talem long Ebraham, i se: Nekis yia, long semtaem, mi bambae mi kambak bakegen long yu, nao Sara i gat pikinini boe.” (Jenesis 18:14; 21:1) Jeova i no minim we hem bambae i kambak blong lukluk Ebraham, be i minim we hem bambae i mekem tingting blong hem i kambak long Sara, blong mekem samting ya we hem i promes bifo.

16. (a) ?Kraes bambae i kambak long wol ya olsem wanem? (b) ?Kraes i bin kambak long wanem taem? ?Wanem i hapen long taem ya?

¹⁶ Long sem fasin ya, Baebol i no minim we Kraes bambae i kambak long wol ya long prapa bodi blong hem. Be i min se hem nao i tekem paoa long kingdom blong hem, blong bambae i rulum wol ya, nao i stat blong luklukgud long ol samting we i hapen long wol. Blong mekem olsem, i no nid blong hem i aot long gudfala jea blong hem long heven, i kamdaon long wol ya. No gat. Yumi lanem finis long las japta we Baebol i soemaot se 1914 K.T. i stret taem we God i makem blong Kraes i kambak i statem rul blong hem. Long taem ya nao wan bigfala voes i singaot long heven, i se: “!Naoia God blong yumi i sevem yumi; mo naoia paoa mo kingdom blong hem i kamtru finis, mo naoia Kraes i gat paoa long evri samting.”​—Revelesen 12:10.

17. ?From we yumi no save luk Kraes taem hem i kambak, hem i bin givim wanem blong bambae yumi luksave we hem i kambak finis?

¹⁷ ?From we man i no save luk Kraes taem hem i kambak, olsem wanem yumi save faenemaot sipos hem i kambak finis, no no yet? I gat rod blong hem ya. Kraes i bin talemaot wan “saen” we ae blong yumi i naf blong luk. Nao sipos yumi luk “saen” ya, yumi save se Kraes i stap finis, mo en blong wol ya i kolosap. I gud we naoia yumi luklukgud long “saen” ya we Jisas i bin talemaot.

[Tok blong pija long pej 142]

Kraes i bin givim bodi blong hem olsem wan sakrafaes. Neva hem i save tekembak bodi ya blong hem i kam man bakegen.

[Tok blong pija long pej 144]

?Blong wanem Meri, woman Magdala, i mastik i ting se Jisas i man blong lukaot long garen?

[Tok blong pija long pej 145]

?Taem Jisas i laef bakegen long ded, hem i askem Tomas blong pusum han blong hem i go insaed long wanem bodi?

[Tok blong pija long pej 147]

Kraes bambae i mas kambak long sem fasin ya we oli luk taem hem i aot long wol. ?Hem i aot long wanem fasin?