Julae

Olgeta samting we Jisas i talem mo i mekem, inkludum ol merikel blong hem, oli soemaot gud ol tingting mo filing blong Papa blong hem. (Jon 14:9) ?Yumi lanem wanem from ol merikel blong Jisas? Jisas mo Papa blong hem i lavem yumi tumas. Taem Jisas i stap long wol, hem i soemaot se hem i lavem ol man tumas, taem hem i mekem merikel blong halpem olgeta we oli stap safa. Wan taem, tu blaen man i krae long hem blong i halpem tufala. (Mat. 20:​30-34) Makem se Jisas i “sore tumas” long tufala nao i hilim tufala. Grik tok we oli tanem i kam “sore tumas,” i soemaot dip filing we Jisas i gat, taem hem i luk ol man oli safa. Dip filing ya blong sore we i joen wetem lav, i pulum Jisas tu blong fidim ol man we oli hanggri, mo i mekem wan man we i gat leprosi i kam gud bakegen. (Mat. 15:32; Mak 1:41) Yumi save sua se Jehova, God ya we i gat “bigfala sore,” mo Boe blong hem we i lavem yumi tumas, tufala i stap harem nogud taem yumi safa. (Luk 1:78; 1 Pita 5:7) !Tufala i wantem tumas blong tekemaot ol problem we i stap spolem ol man! w23.04 3 ¶4-5

Yumi mas traehad blong no ridim o lesin nating long ol rong tingting we i fulap long wol blong Setan tede. Yumi save fulumap tingting blong yumi wetem ol gudfala samting, taem yumi ridim mo stadi long Baebol. Taem yumi go long ol miting mo joen long wok blong prij, hemia tu bambae i givhan blong protektem tingting blong yumi. Mo Jehova i promes se bambae hem i no save letem wan samting we i strong tumas i traem yumi. (1 Kor. 10:​12, 13) Long ol las dei ya we laef i kam moa had, yumi wanwan i mas prea strong long Jehova blong yumi save gohed blong holemstrong long hem. Jehova i wantem se yumi prea mo ‘talemaot olgeta samting we i stap long hat blong yumi’ long hem. (Sam 62:8) Presem Jehova mo talem tangkiu long hem from evri samting we hem i mekem. Askem hem blong i halpem yu blong gat strong tingting taem yu prij. Askem hem blong i halpem yu blong dil wetem eni problem, mo stanap strong long ol samting we oli traem yu. Yu no mas letem eni samting o eni man i stopem yu blong prea oltaem long Jehova. w23.05 7 ¶17-18

?From wanem yumi stap go long ol Kristin miting? Faswan risen, hemia blong presem Jehova. (Sam 26:12; 111:1) Mo tu, yumi go long ol miting blong yumi save lefleftemap tingting blong yumi long taem blong ol trabol. (1 Tes. 5:11) Taem yumi leftemap han blong yumi mo givim wan ansa, yumi joen blong mekem tufala samting ya, hemia blong presem Jehova mo leftemap tingting blong narafala. Be samtaem, maet i had blong yumi givim ansa. Maet yumi fraet blong ansa, o maet yumi wantem ansa, be oli no jusum yumi. ?Olsem wanem yumi save dil wetem ol problem ya? Aposol Pol i talem se yumi mas tingbaot moa blong “leftemap tingting blong yumi.” Taem yumi luksave se smol ansa we yumi givim i save leftemap tingting blong ol narafala, bambae yumi glad moa blong givim ansa. Mo sipos oli no jusum yumi oltaem, yumi glad se ol narafala oli gat janis tu blong givim ansa.—1 Pita 3:8. w23.04 20 ¶1-3

!King i talemaot wan mesej! Hemia se ol man Jiu we oli stap kalabus long Babilon blong 70 yia, naoia oli fri blong gobak long ples blong olgeta long Isrel. (Esra 1:​2-4) Jehova nomo i save mekem samting ya i hapen. Babilon i neva letem ol man we hem i winim long faet, oli go fri. (Aes. 14:​4, 17) Be Babilon i lus long faet mo niufala king we i rul, i talem se ol man Jiu oli save gobak long kantri blong olgeta. Evri man Jiu speseli ol hed blong famle, oli mas mekem wan impoten desisen, hemia se bambae oli aot long Babilon o oli stap. Maet hemia i no wan isi desisen blong mekem. Plante long olgeta oli olfala mo oli no save mekem longfala trip ya. Mo from we bighaf blong ol man Jiu oli bon long Babilon, oli neva bin go laef long wan narafala ples. Long lukluk blong olgeta, Isrel i wan ples blong ol olfala blong olgeta bifo. Sam long ol man Jiu ya oli rij, taswe maet oli faenem i had blong lego gudfala haos mo bisnes blong olgeta, mo go laef long wan ples we oli no save. w23.05 14 ¶1-2

Baebol i enkarejem yumi blong yumi gohed blong wokem fasin blong stanap strong, gat sore, mo lav. Luk 21:19 i talem se: “Sipos yufala i stanap strong, bambae yufala i no lusum laef blong yufala.” Kolosi 3:12 i talem se: “Yufala i mas werem. . . sore” olsem klos blong yufala. Mo 1 Tesalonaeka 4:​9, 10 i talem se: “God i tijim yufala finis, se yufala i mas lavlavem yufala. . . Be ol brata, mifala i stap pulum yufala blong yufala i gohed moa yet long fasin ya.” Ol tok ya oli raetem i go long ol disaepol we oli soemaot finis fasin blong stanap strong, gat sore, mo lav. Be oli mas gohed yet blong wokem ol fasin ya. Mo hemia i sem mak long yumi tede. Blong givhan long yu, tingbaot olsem wanem ol Kristin bifo oli soemaot ol fasin ya. Biaen bambae yu luk olsem wanem yu save folem fasin blong olgeta mo pruvum se yu rere from bigfala trabol. Nao taem bigfala trabol i stat, bambae yu gat strong tingting blong gohed blong stanap strong, from we yu lanem finis blong mekem olsem. w23.07 3 ¶4, 8

Nating se bambae yumi go long heven o yumi ol “narafala sipsip,” yumi evriwan i mas gohed blong wokbaot long “Rod Blong Tabu Fasin.” From hemia bambae i halpem yumi blong gohed blong wosipim Jehova naoia, mo long fiuja, taem Kingdom blong God i karem ol nambawan blesing i kam long wol ya. (Jon 10:16) Stat long 1919 K.T., plante man, woman, mo pikininim, oli lego bigfala Babilon hemia olgeta giaman skul long wol, mo oli stat blong wokbaot long rod ya blong tabu fasin. Taem ol man Jiu oli aot long Babilon, Jehova i meksua se i tekemaot eni samting we i save blokem rod blong olgeta. (Aes. 57:14) ?Be olsem wanem long “Rod Blong Tabu Fasin” tede? Plante handred yia bifo long 1919, Jehova i yusum ol man we oli gat bigfala respek long hem, blong oli halpem ol man blong oli kamaot long Bigfala Babilon. (Skelem wetem Aesea 40:3.) Ol man ya oli mekem bes blong olgeta blong rerem rod long saed blong spirit, blong mekem se olgeta we hat blong i stret, oli save lego Bigfala Babilon mo kam joenem olgeta blong wosipim Jehova. w23.05 15-16 ¶8-9

Jehova i wantem se yumi glad nomo blong mekem wok blong hem mo yumi hapi. (2 Kor. 9:7) Sipos yumi no gat strong tingting ?bambae yumi gohed nomo blong traehad blong kasem mak blong yumi? Tingbaot eksampol blong aposol Pol. Hem i se: “Mi kilim bodi blong mi mo mi fosem hem olsem wan slef.” (1 Kor. 9:​25-27) Pol i fosem hem wan blong mekem samting we i stret, nating se hem i no wantem mekem. ?Olsem wanem? ?Jehova i glad long samting we Pol i mekem? !Yes! Mo Jehova i blesem hem from ol traehad blong hem. (2 Tim. 4:​7, 8) Long sem fasin, Jehova i glad taem hem i luk se yumi traehad blong kasem mak blong yumi, nating se yumi no gat strong tingting. Nomata se yumi no glad blong mekem wan wok, be Jehova i glad from we hem i save se yumi mekem wok ya from yumi lavem hem. Jehova bambae i blesem ol traehad blong yumi olsem we hem i blesem aposol Pol. (Sam 126:5) Taem yumi luk we Jehova i blesem yumi, bambae yumi stat blong gat strong tingting. w23.05 29 ¶9-10

Aposol Pol i komperem ol man we bambae oli no laef tru long dei blong Jehova, se oli olsem ol man we oli slip. Oli no luksave ol samting we oli stap hapen raonabaot long olgeta, o se taem i stap pas. Taswe oli no luksave taem wan impoten samting i hapen, blong oli save tekem aksen folem. Plante man tede oli stap slip long saed blong spirit. (Rom 11:8) Oli no bilivim ol saen we i soemaot se yumi stap laef long “ol las dei,” mo se bigfala trabol bambae i kam i no longtaem. (2 Pita 3:​3, 4) Be yumi luksave se i impoten tumas we evri dei, yumi stap wekap. (1 Tes. 5:6) Tingting blong yumi i mas kwaet mo yumi mas tingting gud. ?From wanem? Hemia blong mekem se yumi no joen long ol bisnes blong politik, o long ol trabol we oli stap hapen long wol tede. Taem dei blong Jehova i stap kam klosap moa, bambae ol man oli traem pulum yumi moa blong joen long ol samting ya. Be yumi no nid blong wari bitim mak se bambae yumi mekem wanem. Tabu spirit blong God i save halpem yumi blong mekem tingting blong yumi i kwaet, yumi tingting gud, mo mekem ol waes desisen.—Luk 12:​11, 12. w23.06 10 ¶6-7

Taem yu harem nem ya Samson, ?yu tingbaot wanem? Ating yu tingbaot wan man we i strong bitim mak. Hemia i tru, be Samson i mekem wan nogud desisen we i mekem hem i safa. Nating se i olsem, Jehova i tingbaot ol gudfala samting we Samson i mekem blong holemstrong long Hem, mo Hem i mekem se ol man oli raetemdaon stori ya long Baebol blong givhan long yumi. Jehova i yusum Samson blong mekem sam bigfala samting blong givhan long ol man Isrel we hem i jusumaot. Plante handred yia afta we Samson i ded, Jehova i pulum aposol Pol blong raetem nem blong Samson long lis blong ol man we oli gat bigfala bilif. (Hib. 11:​32-34) Eksampol blong Samson i save leftemap tingting blong yumi. Oltaem hem i dipen long Jehova, nating se samtaem hem i fesem hadtaem. Yumi save lanem sam narafala samting tu long eksampol blong Samson, we i save enkarejem yumi. w23.09 2 ¶1-2

Yumi save gohed blong stanap strong moa, sipos yumi prea oltaem mo talemaot ol wari blong yumi long Jehova. (1 Tes. 5:17) Nating se yu no fesem ol bigfala problem tede, be ?yu yu prea mo yu askem help blong Jehova taem yu harem nogud, yu gat tu tingting, mo yu no save wanem blong mekem? Sipos yu prea oltaem long Jehova blong i halpem yu taem yu fesem ol smosmol problem naoia, bambae yu no fraet blong mekem sem mak taem yu fesem ol bigfala problem long fiuja. Bambae yu sua fulwan se hem i savegud wetaem mo olsem wanem blong givhan long yu. (Sam 27:​1, 3) Bambae yumi naf blong stanap strong long bigfala trabol, sipos yumi lanem naoia blong stanap strong long ol trabol we yumi fesem tede. (Rom 5:3) ?From wanem yumi talem olsem? Plante brata mo sista oli talem se evri taem we oli stanap strong long wan trabol, hemia i halpem olgeta blong oli stanap strong long nekiswan. Mo taem Jehova i halpem olgeta blong stanap strong, oli bilif strong moa se Jehova i rere mo i wantem tumas blong halpem olgeta. Mo from we oli bilif long Jehova, oli naf blong stanap strong long nekis trabol.—Jem. 1:​2-4. w23.07 3 ¶7-8

Jehova i gat tingting daon mo i kaen, taswe hem i no mekem i strong long narafala. Eksampol, Jehova i soemaot se hem i gat tingting daon taem hem i rere blong distroem ol rabis man long Sodom. Hem i yusum tu enjel blong talem long gudfala man ya Lot blong i ronwe i go long ol hil. Be Lot i fraet blong go long ples ya, taswe hem i askem long Jehova blong i letem hem mo famle blong hem oli ronwe i go long Joa. Hemia wan smol taon we Jehova i plan finis blong distroem. Jehova i save talem long Lot blong i folem samting we hem i talem finis. Be hem i letem Lot i go long Joa, mo hem i no distroem taon ya. (Jen. 19:​18-22) Plante yia biaen, Jehova i soemaot se hem i kaen long ol man we oli laef long Nineve. Hem i sanem profet Jona blong i go talem long olgeta se bambae hem i distroem olgeta mo taon ya Nineve. Be taem ol man Nineve oli tanem tingting blong olgeta, Jehova i sore long olgeta mo i no distroem Nineve.—Jona 3:​1, 10; 4:​10, 11. w23.07 21 ¶5

?Yumi lanem wanem long eksampol blong Jehoas? Hem i olsem wan tri we rus blong hem i no godaon dip long graon, mo i nidim wan stik blong sapotem hem. Taem stik ya we i sapotem hem hemia Jehoeada, i ded, hem i lesin long ol man we oli tanem baksaed long Jehova, nao hem i foldaon. Eksampol blong hem i soemaot se yumi no mas obei long Jehova nomo from we ol famle blong yumi, mo ol narafala long kongregesen oli soemaot wan eksampol long yumi. Blong yumi gohed blong stanap strong long saed blong spirit, yumi wanwan i mas gohed blong mekem lav mo respek we yumi gat long Jehova i stap strong. Mo yumi mekem olsem, taem yumi stadi, tingting dip, mo prea oltaem. (Jer. 17:​7, 8; Kol. 2:​6, 7) Jehova i no askem yumi blong mekem plante samting. Long Prija 12:​13, Jehova i talem long yumi nomo se: “Yu mas fraet long tru God mo yu holemtaet ol komanmen blong hem, from we hemia nao samting we man i mas mekem.” Taem yumi fraet long Jehova, bambae yumi naf blong fesem ol traem long fiuja, mo bambae yumi naf blong stanap strong. Bambae i no gat wan samting i save spolem frensip blong yumi wetem Jehova. w23.06 19 ¶17-19

Promes blong God i stat wetem ol tok ya se: “Man ya we i sidaon long tron, i talem se.” (Rev. 21:5a) Ol tok ya oli spesel from we long buk blong Revelesen, i gat tri taem we Jehova hem wan i toktok, mo hemia i wan long olgeta. !Yes, ol tok ya oli no kamaot long wan enjel o Jisas, be oli kamaot long Jehova hem wan! Ol samting ya oli pruvum se yumi save trastem fulwan ol tok we hem i talem biaen. ?From wanem yumi talem olsem? From we Jehova i “no save giaman.” (Taet. 1:2) Taswe, yumi sua se ol tok we yumi ridim long Revelesen 21:​5, 6 bambae oli kamtru. Tingbaot tok ya se: “!Yu luk!” Grik tok we oli transletem i kam “!yu luk!” oli yusum plante taem long buk blong Revelesen. ?Wanem ol tok we i kam biaen? God i talem se: “Mi mi stap mekem olgeta samting oli kam niuwan.” I tru, Jehova i stap tokbaot ol samting we bambae oli hapen long fiuja. Be from we hem i sua fulwan se bambae hem i mekem promes ya i kamtru, hem i tokbaot ol samting ya olsem we oli kamtru finis.—Aes. 46:10. w23.11 3-4 ¶7-8

Aposol Pita i mas traehad blong winim ol slak fasin blong hem. Tingbaot sam eksampol: Taem Jisas i eksplenem se bambae hem i safa mo i ded olsem ol profet tok blong Baebol i talem, Pita i talem se hemia i no save hapen. (Mak 8:​31-33) Bakegen mo bakegen, Pita mo ol narafala aposol oli raorao se hu i hae moa. (Mak 9:​33, 34) Long naet bifo we Jisas i ded, Pita i girap mo i katemaot sora blong wan man. (Jon 18:10) Long sem naet ya, Pita i letem fraet long man i winim hem, mo tri taem hem i talem se hem i no save fren blong hem Jisas. (Mak 14:​66-72) Afta long samting ya, Pita i krae we i krae. Be Jisas i no lego aposol ya we tingting blong hem i foldaon. Afta we Jisas i laef bakegen, hem i givim janis long Pita blong soemaot se hem i lavem hem yet. Hem i askem long Pita blong i lukaot gud long ol sipsip blong hem. (Jon 21:​15-17) Pita i glad blong mekem samting ya we Jisas i askem. Mo hem i stap wetem ol faswan man we tabu spirit i makemaot olgeta, long dei blong Pentekos long Jerusalem. w23.09 22 ¶6-7

Aposol Pita i talem long ol elda se: “Yufala i mas lukaot gud long ol sipsip blong God.” (1 Pita 5:​1-4) Sipos yu wan elda, i sua se yu lavem ol brata mo sista mo yu wantem leftemap tingting blong olgeta. Be samtaem, maet yu harem se yu taed o yu bisi tumas, nao yu no save mekem gud wok ya. ?Long taem olsem, yu save mekem wanem? Talemaot ol wari ya blong yu long Jehova. Pita i raetem se: “Sipos wan long yufala i mekem minista wok blong givhan long narafala, i gud hem i mekem wok ya olsem we hem i dipen long paoa we God i givim.” (1 Pita 4:11) Maet sam brata mo sista oli fesem sam problem we oli no save winim long olfala wol ya. Be yu mas tingbaot se “nambawan man blong lukaot long sipsip” Jisas Kraes, i save mekem moa i bitim wanem we yu yu naf blong mekem. Hem i save halpem olgeta naoia mo long niufala wol tu. Jehova i wantem nomo se ol elda oli lavem ol brata mo sista, lukaot gud long olgeta, mo soemaot “gudfala eksampol long ol sipsip.” w23.09 29-30 ¶13-14

Yumi mas lukaot gud blong no kasem tingting blong ol man blong wol. Sipos yumi gat tingting olsem ol man blong wol, hemia bambae i mekem yumi gowe long Jehova mo long ol loa blong hem. (1 Kor. 3:19) Plante taem “waes blong wol ya” i pulum ol man blong oli no obei long ol loa blong God. Sam Kristin long Pegamam mo Tuatira oli letem tingting blong ol man we oli stap mekem rabis fasin, mo oli wosipim aedol i gat paoa long olgeta. Jisas i tok strong long tufala kongregesen ya from we oli stap mekem enikaen doti fasin blong seks. (Rev. 2:​14, 20) Tede, ol man raonabaot long yumi oli traem pulum yumi blong gat rong tingting olsem olgeta. Ol famle mo ol fren, maet oli traem mekem yumi gat tingting ya se yumi strik tumas, mo oli traem pulum yumi blong brekem ol loa blong Jehova. Maet oli talem se i no impoten blong yumi mekem ol gudfala fasin, mo se ol rul blong Baebol oli olfala finis. Samtaem yumi save gat tingting ya se ol instraksen we Jehova i givim, oli no klia tumas. Mo samtaem yumi wantem “go bitim mak blong ol tok ya we oli raetem finis.”—1 Kor. 4:6. w23.07 16 ¶10-11

Meri, mama blong Jisas, i nidim paoa. Hem i gat bel nating se hem i no mared yet. Hem i neva lukaot long wan pikinini, be naoia hem i mas lukaot long boe ya we bambae i kam Mesaea. Mo tu, hem i neva mekem seks wetem wan man. ?Olsem wanem hem i save eksplenem long Josef se hem i gat bel? (Luk 1:​26-33) ?Olsem wanem Meri i kasem paoa? Hem i lukaot help long ol narafala. Eksampol, hem i askem long Gabriel blong i givim moa save long saed blong wok ya. (Luk 1:34) Smoltaem afta, hem i travel i go “antap long ol bigfala hil” blong Juda blong visitim famle blong hem, Elisabet. Elisabet i talem ol gudfala toktok long Meri mo Jehova i yusum hem blong i talemaot wan profet tok long saed blong boe ya we i no bon yet. (Luk 1:​39-45) Meri i talem se Jehova i “bin mekem ol strong wok long han blong hem.” (Luk 1:​46-51) Jehova i yusum Gabriel mo Elisabet blong givim paoa long Meri. w23.10 14-15 ¶10-12

I gat wan smol namba blong ol disaepol blong Kraes we tabu spirit i makemaot olgeta, mo oli gat wan spesel frensip wetem Jehova. Ol 144,000 man ya bambae oli mekem wok olsem ol pris long heven wetem Jisas. (Rev. 14:1) Long tabenakel, Rum We i Tabu, i pija blong ol man we God i adoptem olgeta olsem ol spirit pikinini blong hem taem oli stap yet long wol. (Rom 8:​15-17) Mo long tabenakel, Rum We i Tabu We i Tabu, i pijarem heven, hemia ples ya we Jehova i stap long hem. “Bigfala kaliko” we i seraotem Rum We i Tabu, mo Rum We i Tabu We i Tabu, i pijarem bodi blong Jisas long wol ya, we i mekem se hem i no save go antap long heven olsem bigfala Hae Pris long tempol long saed blong spirit. Be taem Jisas i givim bodi blong hem olsem wan sakrefaes, hem i openem rod blong ol tabu Kristin oli save go laef long heven. Ol tabu Kristin ya oli mas lego bodi blong olgeta we i blong wol, blong oli save kasem presen blong olgeta long heven.—Hib. 10:​19, 20; 1 Kor. 15:50. w23.10 28 ¶13

Gideon i stap kwaet nomo taem ol laen blong Efrem oli daonem hem. (Jaj. 8:​1-3) Hem i no tok kros long olgeta, be hem i soemaot tingting daon, taem i lesin gud mo i toktok kaen long olgeta. Mo hemia i mekem se tingting blong olgeta i kam kwaet. Ol elda we oli waes, oli folem fasin blong Gideon taem oli lesin gud mo toktok kaen long man we i daonem olgeta. (Jem. 3:13) Taem oli mekem olsem, hemia i mekem se i gat pis long kongregesen. Taem ol narafala oli leftemap Gideon from i winim ol man Midian, hem i pulum tingting blong olgeta i go long Jehova. (Jaj. 8:​22, 23) ?Olsem wanem ol elda oli save folem fasin blong Gideon? Oli mekem olsem, taem oli pulum ol narafala blong presem Jehova from ol wok we oli mekem. (1 Kor. 4:​6, 7) Eksampol, sipos ol narafala oli talem gudfala toktok long wan elda from we hem i gat gudhan blong tij, hem i save talem long olgeta se, ol save ya oli kamaot long Tok blong God, mo se oganaesesen blong Jehova i stap trenem yumi evriwan. I gud we wanwan taem ol elda oli jekem olgeta wan, blong luk sipos oli tij long fasin we i givim ona long Jehova, o oli stap pulum ol man blong leftemap olgeta wan. w23.06 4 ¶7-8

Sipos yumi no kasem samting we yumi prea from, maet yumi save askem se: ‘?Samting we mi prea from i stret?’ Plante taem, yumi ting se samting we yumi askem i gud long yumi. Be ol samting we yumi askem, maet oli no save givhan long yumi blong longtaem. Sipos yumi prea from wan problem, maet i gat wan rod blong stretem problem ya we i gud moa i bitim wanem we yumi askem. Mo sam long ol samting we yumi askem, maet oli no laenap wetem wil blong Jehova. (1 Jon 5:14) Traem tingbaot eksampol blong ol perens we oli askem long Jehova blong i mekem se pikinini blong tufala i holemstrong long trutok. I luk olsem se samting we tufala i askem i stret nomo. Be Jehova i no save fosem eni man blong i wosipim hem. Hem i wantem se yumi evriwan, inkludum ol pikinini, yumi jusum blong wosipim hem. (Dut. 10:​12, 13; 30:​19, 20) Taswe, i moa gud we ol perens oli askem long Jehova blong i halpem olgeta blong kasem hat blong pikinini, olsem nao bambae pikinini i lavem Jehova mo i wantem kam fren blong Hem.—Prov. 22:6; Efes. 6:4. w23.11 21 ¶5; 23 ¶12

?From wanem fasin blong leftemap tingting i wan impoten rod blong soemaot lav? Wan buk we i eksplenem Baebol i talem se tok ya “leftemap tingting” we Pol i yusum, i min se “stanap klosap long wan man taem hem i fesem wan strong traem.” Taswe, taem yumi leftemap tingting blong wan brata o sista we i safa, yumi halpem hem blong i gohed blong wosipim Jehova. Mo evritaem we yumi mekem olsem, yumi soemaot se yumi lavem hem. (2 Kor. 7:​6, 7, 13) Fasin blong gat sore mo leftemap tingting i joen gud tugeta. ?Olsem wanem oli joen? Taem wan man i gat sore long narafala we i stap safa, hem i wantem leftemap tingting blong hem mo givhan long hem. Taem yumi gat sore long man, bambae yumi leftemap tingting blong hem. Makem olsem wanem Pol i joenem fasin blong Jehova blong gat sore, wetem fasin blong hem blong leftemap tingting. Pol i tokbaot Jehova olsem wan “Papa we i gat sore, mo hem i God ya we i mekem olgeta samting blong leftemap tingting blong man.”—2 Kor. 1:3. w23.11 9-10 ¶8-10

Olgeta man we oli folem Kraes oli save kasem trabol. Traem luk eksampol blong aposol Pol. Hem i talem long ol Kristin long Tesalonaeka se: “Long taem ya we mifala i stap yet wetem yufala, mifala i talemaot se bambae yumi kasem trabol, mo samting ya i hapen.” (1 Tes. 3:4) Mo hem i raet i go long ol Kristin long Korin se: “Ol brata. Mifala i wantem blong yufala i save se mifala i bin kasem bigfala trabol . . . Mifala i no moa save se bambae mifala i laef no nogat.” (2 Kor. 1:8; 11:​23-27) Ol Kristin tede tu oli fesem trabol long plante defren rod. (2 Tim. 3:12) Taem yu bilif long Jisas mo yu folem hem, maet ol famle mo ol fren oli agensem yu. Maet bos blong yu o ol fren long wok oli mekem i nogud long yu from we yu no giaman mo yu no stil. (Hib. 13:18) O maet yu fesem fasin agens long gavman, from yu tokbaot hop blong yu long ol narafala. Nomata wanem kaen trabol yumi fesem, be Pol i talem se yumi mas glad. w23.12 10-11 ¶9-10

Jekob i kasem plante trabol. Tu boe blong Jekob, hemia Simeon mo Livae, tufala i sakem doti long nem blong famle blong olgeta mo long nem blong Jehova tu. Antap long hemia, waef blong Jekob, hemia Rejel, i ded taem hem i bonem seken pikinini blong tufala. Mo from we i gat hadtaem blong kasem kakae, Jekob i mas muv i go long Ijip taem hem i olfala. (Jen. 35:​16-19; 37:28; 45:​9-11, 28) Nating se Jekob i fesem ol problem ya, be hem i neva stop blong bilif long Jehova mo ol promes blong Hem. Mo Jehova i soemaot se hem i glad long Jekob. Eksampol, Jehova i givim plante samting long Jekob long saed blong bodi. !Mo tu, Jekob i talem bigfala tangkiu long Jehova taem hem i luk bakegen boe blong hem Josef, we hem i ting se hem i ded longtaem finis! Jekob i fren gud wetem Jehova, taswe hem i naf blong stanap strong tru long ol trabol ya. (Jen. 30:43; 32:​9, 10; 46:​28-30) Taem yumi fren gud wetem Jehova, yumi tu yumi save stanap strong tru long eni trabol we yumi no ekspektem. w23.04 15 ¶6-7

Long Ol Sam 23, Deved i talemaot se hem i trastem se Jehova i lavem hem mo i lukaot gud long hem. Deved i tokbaot gudfala frensip we hem i gat wetem Jehova, we i Man Blong Lukaot Long Sipsip. Deved i harem se hem i sef, taem hem i letem Jehova i lidim hem, mo hem i dipen fulwan long Jehova. Deved i save se long ful laef blong hem, Jehova bambae i soemaot se i lavem hem. ?Wanem i mekem Deved i sua olsem? Deved i haremsave se Jehova i lukaot gud long hem, from we oltaem Jehova i givim samting we hem i nidim. Mo tu, Deved i save se Jehova i fren blong hem mo se Jehova i glad long hem. From samting ya, hem i sua se nomata wanem i save hapen long hem long fiuja, Jehova bambae i gohed blong lukaot gud long hem mo givim samting we hem i nidim. Deved i trastem se Jehova i lavem hem mo bambae i lukaot gud long hem. Hemia i mekem se hem i no wari, be hem i hapi mo i glad long samting we hem i gat.—Sam 16:11. w24.01 29 ¶12-13

Stat long Wol Wo II, ol man blong Jehova oli glad from we long plante kantri oli fri blong talemaot gud nius. From samting ya, wok blong prij i kasem olgeta ples long wol, mo plante man oli save Jehova. Tede, ol memba blong Hed Kampani oli gohed blong letem Kraes i lidim olgeta. Oli wantem se ol advaes we oli givim long ol brata long saed long ol samting, i mas laenap wetem tingting blong Jehova. Biaen, oli yusum ol eria elda mo ol elda blong talemaot long ol kongregesen. Ol elda we Jehova i putumap, oli stap long “raethan” blong Kraes. (Rev. 2:1) Be ol elda ya oli no stret gud mo oli save mekem mastik. Samtaem Moses mo Josua tu i mekem sam mastik, sem mak olsem ol aposol. (Nam. 20:12; Jos. 9:​14, 15; Rom 3:23) Be yumi luksave klia se Kraes i stap lidim gudfala slef mo ol elda, mo bambae hem i gohed blong mekem olsem. Taswe, yumi gat evri risen blong trastem ol tok we yumi kasem tru long ol man ya we Jehova i putumap blong lidim yumi. w24.02 23-24 ¶13-14

Tede, yumi save mekem Jehova i glad taem yumi tokbaot hem, yumi soemaot se yumi glad long hem, mo yumi lavem hem. Taem yumi prij, yumi mas tingbaot oltaem se mak blong yumi i blong pulum ol man oli kam klosap long Jehova, mo halpem olgeta blong gat sem tingting olsem yumi, hemia blong tingbaot se, Jehova i lavem yumi. (Jem. 4:8) Yumi glad blong soemaot long ol man, samting we Baebol i talem long saed blong Jehova, se hem i wan God we i gat lav, jastis, waes, paoa, mo plante moa gudfala fasin. Mo tu, yumi presem Jehova mo mekem hem i glad, taem yumi traehad blong folem ol fasin blong hem. Taem yumi mekem olsem, maet ol narafala bambae oli luksave se yumi defren long ol man blong rabis wol ya. (Mat. 5:​14-16) Taem yumi joen wetem olgeta, maet yumi save eksplenem from wanem yumi defren long ol narafala. Long rod ya, yumi save pulum ol man we hat blong olgeta i stret blong oli kam klosap long Jehova. Yes, taem yumi presem Jehova olsem, yumi stap mekem hem i glad tumas.—1 Tim. 2:​3, 4. w24.02 10 ¶7

Blong kam bigman long spirit, yu mas lanem ol samting we i save halpem yu evri dei. Hemia bambae i halpem yu blong akseptem wan wok long kongregesen, holem wan wok we i save sapotem yu o famle, mo fren gud wetem ol narafala. Wan samting we i save halpem yu, i blong lanem blong rid mo raet gud. Baebol i talem se man we i glad mo i win long laef blong hem, hem i ridim Tok blong God evri dei mo i tingting dip long hem. (Sam 1:​1-3) Taem hem i ridim Baebol evri dei bambae hem i save gud ol tingting blong Jehova, mo hemia bambae i halpem hem blong i tingting gud mo i lanem blong folem ol samting we hem i ridim. (Prov. 1:​3, 4) Ol brata mo sista oli nidim help blong ol man we oli naf blong tij mo givim advaes we i stanap long Baebol. Sipos yu save rid mo raet gud, bambae yu naf blong givim ol tok mo ansa we i leftemap tingting mo i mekem bilif blong ol narafala i kam strong. Mo tu, bambae yu naf blong raetemdaon ol poen we oli halpem yu blong mekem bilif blong yu i kam strong mo blong yu enkarejem ol narafala. w23.12 26-27 ¶9-11

Taem yu fraet, tingbaot samting we Jehova bambae i mekem long fiuja, taem Setan i no moa stap. Long wan pleplei long bigfala asembli blong 2014, wan papa i stap ridim vas blong 2 Timoti 3:​1-5 long famle blong hem, mo i mekem oli tingbaot se laef long Paradaes bambae i olsem wanem. Hem i ridim vas ya olsem: “Long niufala wol, laef bambae i gud tumas. Bambae ol man oli tingbaot ol narafala, mo bambae oli laekem trutok, oli no tok flas, tingting blong olgeta i stap daon, oli no tok nogud long ol man, oli obei long papa mo mama blong olgeta, oli gat tangkiu, oli holemstrong long ol narafala, oli lavem famle blong olgeta, oli gat wan tingting, oli no spolem nem blong narafala, oli bos long tingting, oli kwaet man, mo oli laekem ol gudfala fasin. Narafala i save trastem olgeta, oli kea, oli rere blong lego prapa tingting blong olgeta, tingting i no go antap, oli lavem God i bitim ol samting we oli save harem gud long olgeta, mo God i gat paoa long laef blong olgeta. Bambae yu mas go klosap long ol man olsem.” ?Yu yu tokbaot wetem famle blong yu o ol brata mo sista se laef bambae i olsem wanem long niufala wol? w24.01 6 ¶13-14

!I gud tumas blong save se Jehova i glad long ol man blong hem olsem wan grup! Baebol i talem se: “Jehova i glad long ol man blong hem.” (Sam 149:4) Be samtaem, tingting blong samfala i save foldaon, nao oli stap askem se: ‘?I tru se Jehova i glad long mi?’ I gat plante gudfala man blong Jehova long Baebol, we samtaem oli no sua sipos Jehova i glad long olgeta o nogat. (1 Saml. 1:​6-10; Job 29:​2, 4; Sam 51:11) Baebol i soemaot klia se yumi ol sinman, yumi save mekem Jehova i glad. ?Olsem wanem yumi mekem hem i glad? Yumi mas soemaot se yumi bilif long Jisas Kraes mo yumi baptaes. (Jon 3:16) Olsem nao, yumi soemaot long olgeta man se yumi tanem tingting blong yumi from ol sin blong yumi, mo yumi mekem wan promes long God se bambae yumi mekem samting we hem i wantem. (Wok 2:38; 3:19) Jehova i glad tumas taem yumi mekem ol samting ya blong yumi save kam fren blong hem. Sipos yumi gohed blong mekem bes blong yumi blong holemtaet promes ya, bambae hem i glad long yumi mo i luk yumi olsem ol gudfala fren blong hem.—Sam 25:14. w24.03 26 ¶1-2

Yumi save folem eksampol blong ol disaepol, taem yumi gohed nomo blong prij nating se gavman i stopem yumi. Yumi save trastem se Jehova bambae i halpem yumi blong finisim minista wok blong yumi. Taswe, yumi mas prea blong gat strong tingting mo waes. Askem Jehova blong i halpem yu blong dil wetem ol problem. Plante long yumi oli stap fesem problem long saed blong bodi mo filing, oli lusum wan we oli lavem long ded, oli gat problem long famle, ol man oli agensem olgeta, o sam narafala problem bakegen. Mo ol samting olsem pandemik mo ol faet, oli mekem se i had moa blong stanap strong long ol problem ya. Talemaot stret long Jehova olgeta filing blong yu. Yu talemaot long hem ol samting we yu stap fesem, sem mak olsem we yu talem long wan gudfala fren blong yu. Mo yu trastem se Jehova “bambae i mekem samting long bihaf blong yu.” (Sam 37:​3, 5) Taem yumi stap gohed blong prea, hemia bambae i halpem yumi blong “stanap strong long taem blong trabol.” (Rom 12:12) Jehova i save ol samting we ol man blong hem oli stap fesem, mo “hem i harem we oli krae from help.”—Sam 145:​18, 19. w23.05 5-6 ¶12-15

Taem yumi gat ol impoten desisen blong mekem, yumi mas faenemaot fastaem “samting we Jehova i wantem,” mo biaen yumi folem. (Efes. 5:17) Taem yumi traehad blong faenemaot ol stamba trutok blong Baebol long saed blong desisen ya, yumi soemaot se yumi wantem save tingting blong Jehova. Mo sipos yumi folem ol stamba trutok ya, bambae yumi mekem ol gudfala desisen. “Man ya we i rabis,” enemi blong yumi Setan, i wantem se yumi bisi long ol samting blong wol, nao yumi no moa gat taem blong mekem wok blong Jehova. (1 Jon 5:19) I isi nomo blong wan Kristin i tingbaot mane, edukesen, o wok, i bitim we hem i tekem janis blong mekem moa long wok blong Jehova. Sipos samting olsem i hapen, hemia i soemaot se tingting blong wol i gat paoa long hem. I tru se ol samting ya oli no rong, be yumi mas lukaot se oli no stap long fasples long laef blong yumi. w24.03 24 ¶16-17