Risen From Wanem Yu Mas Stap
LONG hot taem long yia ya long ol taon raonabaot long wol bambae yu kasem plante advaes long saed blong speret long fo dei Distrik Asembli ya, “Tijing Blong God.” Long Amerika nomo, bitim 150 ples we bambae oli hivap long hem long Jun, Julae, mo Ogis. Kolosap evriwan, bambae program ya i stat long Tasde long 1:20 p.m. mo i finis long Sande long 4:15 p.m. Wan bigfala haf long sam asembli bambae ol misinari oli mekem sam ripot, we oli bin kasem help blong kambak long kantri blong olgeta from spesel asembli ya.
Nating se yu olfala no yangfala—wan hasban, waef, papa, mama, yangfala, no pikinini—bambae yu kasem ol tijing we oli kamaot long wan klia fasin, long stret rod we i save givhan long yu. Eksampel, plante man tede oli askem se, ?From wanem yumi stap laef? Long Fraede moning, bambae yu glad blong harem ansa blong kwestin ya mo haremgud long samting we yu kasem blong givhan long ol narafala blong kasem save long poen ya.
Long Fraede aftenun bambae program i tokbaot ol haf blong “Mekem Fasin Blong Mared i Stap Longtaem,” “Wokhad Blong Sevem Famle Blong Yu,” mo “Papa Mama—Ol Pikinini Blong Yufala Oli Nidim Spesel Help.” Stret biaen long ol tok ya, bambae yumi lesingud long wan haf we i soem ol trabol we ol yangfala oli fesem mo olsem wanem oli save winim. Bambae drama long taem blong yumi tede we nem blong hem se Ol Yangfala We Oli Tingbaot Man We i Wokem Olgeta Naoia bambae i leftemap tingting blong olgeta.
Long Sarede bambae program i soemaot profet tok blong Jisas long ol las dei ya mo antap moa ol tok we hem i talem se; “ale nao taem trabol ya bambae i finis, wantaem nomo, san bambae i kam tudak.” (Matyu 24:29) Bambae yu wantem harem tok we i tokbaot wetaem bambae trabol ya i kamaot. Long program long Sarede bambae yumi stadi long ol samting we ol Wetnes blong Jeova oli bin mekem long taem blong yumi mo bambae i soemaot frut we oli bin kasem.
Long Sande wan narafala drama, nem blong hem se Yu No Mastik No Yu Gyaman Long God, bambae i soemaot traem we ol Kristin oli mas stanap strong blong winim from ol video mo ol myusek blong tede. Pablik tok long aftenun bambae i soemaot stampa tok ya “Ol Tijing We Oli Save Givhan Long Taem Blong Yumi Naoia We Laef i Strong Tumas.” Bambae program ya i finis wetem advaes ya se “Gohed Blong Holemstrong Long Tijing Blong God.”
!Tru ya, bambae yu kasem plante samting taem yu stap long ol fo dei ya! Mifala i askem yu blong kam. Blong faenem ples we i kolosap moa long haos blong yu, faenem wan Haos Kingdom blong ol Wetnes blong Jeova no raet long ol pablisa blong magasin ya.