Tangkyu Tumas From Trufala Sapot Blong Jeova

OLSEM SHARON GASKIN I TALEM

!PARADAES long wol! Mi luk mi wan mi stap pleplei olbaot long ol ples we i gat plante gras, mi stap ronem ol bataflae, mi stap pleplei wetem ol pikinini blong laeon. !Tok ya i gud tumas! Be mi no bilivim. !Plante taem samting we mi putum tingting blong mi long hem i no bin kamtru!

Long taem bifo kasem taem we mi save tingbaot, wiljea i bin stap oltaem olsem fren blong mi. Stat long taem we mi bon, mi bin kasem trabol long bren blong mi we i tekemaot mi long glad we pikinini i gat. Ol narafala pikinini oli pleplei long sket bot mo baskel, be mi sidaon mi wan, mi no save wokbaot tu. Ale taem mama blong mi i tekem mi i go long wan man blong prea blong mekem sik i kamgud afta i go long wan narafala, mifala i gat strong hop blong kasem wan merikel. Be plante plante taem mama blong mi i jes pusum mi i kambak we mi no kamgud. !Mi harem nogud tumas mo tingting blong mama blong mi i trabol tumas!.

Taswe blong kasem trufala hop, mama blong mi i stat blong stadi Baebol wetem Ol Wetnes blong Jeova long stat blong 1964. Long taem ya mi gat kolosap sikis yia haf.

I gud tumas blong save se bifo i bin gat wan naesfala paradaes long wol ya. Sore tumas, faswan man, Adam i mekem se paradaes ya i lus,be mi laekem fasin blong stap kolosap long God we bifo Adam i bin haremgud long hem. ?Bambae i olsem wanem blong mekem wan fasin fren wetem God? ?No blong stap taem stret pikinini blong hem i stap long wol? Ol samting we mi stap tingbaot oltaem i mekem mi tingbaot ol dei long fyuja taem paradaes bambae i stap bakegen. Nating se mi mi yang nomo, mi luksave se mifala i bin faenem trutok.

Mama i stat blong tekem famle i go long Haos Kingdom blong Ol Wetnes blong Jeova. !Ol miting blong olgeta oli defren tumas long ol wanem we mifala i bin luk long ol jyos! Ol man ya mo ol samting we i stap hapen raonabaot long mi oli tajem mi bigwan.

I hadwok long mama blong mi blong tekem mifala i go long Haos Kingdom. Wetem mi, i gat tri pikinini we oli moa yang long mi, mo mifala i nogat trak. Mifala i tekem wan taksi taem mama i gat mane blong pem. Mi tingbaot yet olsem wanem mama blong mi i traehad long wan Sande. Hem i no faenem wan taksi. Biaen, wantaem nomo we mifala i no save, wan man i draev i kam long trak blong hem mo i tekem mifala. Mifala i let long miting, be mifala i no mestem. !Mifala i gat bigfala tangkyu long Jeova from!

I no longtaem, ol gudfala brata mo sista blong mifala oli stap jenis raon blong karem mifala. Strong tingting blong mama blong mi blong no mestem ol miting, nomo sipos mifala i sik tumas i putum long yangfala tingting blong mi se i impoten tumas blong no ‘lego ol miting.’ (Hibrus 10:24, 25) Samting we mama blong mi i bin lanem i pusum hem, mo hem i givim laef blong hem long Jeova mo i tekem baptaes long 1965.

Long taem ya mi kam inaf blong luksave moa ol miting. Long Saepres Hils Kongregesen long Bruklin, Nyu Yok, i gat ol waetman, ol blakman, ol man we oli toktok lanwis Spen, mo ol narafala we oli stap joen blong mekem wosip. I luk se i stret nomo blong ol man we oli fraetgud long God oli mas stap long trufala fasin blong stap wanples olsemia nao.​—Ol Sam 133:1.

Mama blong mi i tijim mi olsem wanem blong rere from ol miting. Hemia i no wan trabol long saed blong tingting, be long saed blong bodi. Sik ya long bren i save mekem wan smol samting i kam wan bigfala wok. Bifo mo naoia i no isi long mi blong raetem wan stret laen blong makem ol ansa long buk blong mifala we i tokbaot Baebol. Be, sloslou mi kamgud long fasin blong mi blong raetem laen.

Tingting blong mi i fulap long ol samting blong talem. Be blong talemaot, ol tok ya oli meksap mo oli fasfas. Fasin blong spel i impoten blong mekem se masel blong mi i no kam strong tumas. Mo tu mi mas tingtinggud long fasin blong talemaot ol wanwan tok i klia sipos mi save mekem. Sipos mi no talem stret ansa olsem we mi mas talem no sipos mi save se ol man oli no kasem save long ol tok blong mi, mi mi kros tumas. Be, taem oli save mi, ol brata mo sista long kongregesen oli kasem save lelebet long fasin blong mi blong toktok. Be tede yet i gat sam dei we oli isi long mi mo sam dei we oli no isi nating.

Sikis Manis We Mi Harem Nogud Tumas

Taem mi gat eit yia, mi gat wan ekspiryens blong sikis manis we i bin gat paoa kasem tede. Nating se oli bin givim help long mi long saed blong bodi, long wok we mi mas mekem, mo toktok blong mi, ol dokta oli sanem mi long wan hospetal blong mekem sik blong man i kamgud bakegen long Wes Havestro, hemia long Nyu Yok. Mi wetem mama blong mi i harem nogud tumas. Plante yia bifo, taem ol dokta oli talem rong se sik blong mi hemia we tingting blong mi i haf krangke, mama blong mi i talem long olgeta se bambae neva hem i putum mi long hospetal blong ol krangke man. Mo tu i hadwok long hem blong livim mi mi stap mi wan blong smoltaem nomo. Be, mama blong mi i luk se blong gat wan gudfala laef we mi no dipen oltaem long hem mo papa blong mi, mi mas stap traehad long saed blong bodi.

Hospetal ya i gud, be mi harem olsem se oli lego mi. Oltaem mi krae mo fasin kros blong mi i soemaot klia filing blong mi from ples ya. Wanwan taem nomo papa mama blong mi oli save mekem wan trep blong tri haoa long bas blong kam visitim mi, antap moa taem mama blong mi i gat bel long namba faef pikinini blong hem. Taem oli gobak, mi harem nogud tumas from, mekem se ol dokta oli talem long olgeta blong oli no mas mekem visit plante taem. Oli letem mi tu taem nomo blong gohom.

Mi harem se mi stap mi wan nomo, be ekspiryens ya i givhan long mi. Ol man we oli stap givhan long ol sikman blong kamgud bakegen oli tijim mi olsem blong wokbaot wetem help blong samting we oli fasem long bodi blong mi mo ol wod we oli hevi tumas we mi yusum blong wokbaot wetem. I luk olsem oli hevi tumas. Be hevi blong hem i givhan long mi blong wokbaot stret mo i mekem se mi no foldaon. Hemia faswan samting we i mekem se mi save wokbaot we mi no yusum samting we oli fasem long bodi blong mi blong holemtaet mi.

Fasin blong katkatem kakae, fasem ol baten​—eni samting we i nidim fingga blong mekem​—i bin stap olsem samting we i had tumas mo samtaem mi no save mekem. Be sloslou mi lanem olsem wanem blong tekem kakae mo blong putum klos blong mi wan. Biaen samting ya i givhan long mi long wok we mi stap mekem long God.

Trening blong mi i finis nao, ale mi gobak long haos bakegen. Mama i mekem mi wok blong yusum ol nyufala fasin blong mi. Blong mekem olsem i wan faet long saed blong filing, from nating se mi wantem mekem ol samting blong mi wan nomo, be taem mi traehad blong mekem, mi kam kros, i tekem plante taem, mo i mekem mi mi taed tumas. !Yes blong go long ol miting, mi tekem tu haoa blong jenis!

Taem mifala i muf i go kolosap long Haos Kingdom, long narasaed nomo, plante taem mi wokbaot mi wan i go long Haos Kingdom. !Mi winim wan bigfala samting!

Dei Long Laef Blong Mi We Mi Glad Tumas

Mama blong i lukaotgud se famle ya i gat stret kakae long saed blong speret. Hem i mekem stadi long mi mo hem i askem mi blong ridim olgeta magasin blong mifala, Wajtaoa mo Wekap! I gat ol miting blong mekemrere mo blong go long olgeta. Nating se tingting mo hat blong mi i glad blong kasem save ya, ol strong tingting blong givim laef blong mi long Jeova mo soemaot samting ya long baptaes long wora i stap biaen olgeta. Mama i givhan long mi blong luk se nating we mi no gat fasin blong tingtinggud, long saed blong speret, mi wan mi mas stanap long fes blong God. Mi no save go insaed long nyufala wol from wok we mama blong mi i mekem, mi no save dipen fulwan long mama blong mi blong go insaed.

Mi laekem God, be sik blong mi i mekem se mi defren long ol narafala mo samting ya i mekem wan yangfala i harem nogud tumas. I hadwok blong akseptem ol mak blong mi. Plante taem fasin blong kros i winim mi, mo mi mas winim samting ya bifo we mi baptaes (Galesia 5:19, 20) ?Mo olsem wanem sipos mi no save holem promes blong mi taem mi givim finis laef blong mi long Jeova?

From mama blong mi i askem, wan elda long kongregesen i kam toktok wetem mi. Hem i talem kwestin blong profet Elaeja long ol man Isrel se: “?Gogo kasem wetaem bambae yufala i stap soemaot tu tingting?” (1 King 18:21) I klia nomo, Jeova i no glad long tu tingting we mi gat.

Mi wekap long saed blong speret mo prea oltaem blong askem help blong Jeova mo blong mekem wan desisin blong givim laef blong mi long Hem. Wan sista long kongregesen i mekem stadi wetem mi. Hem i moa yang long mi mo mama blong hem i ded taem hem i smol. Nating se i olsem, hem i givim laef blong hem long God taem hem i yang nomo.

Taem mi gat 17 yia, mi mekemap tingting blong mi. Mi wantem mekem wok blong Jeova wetem ful paoa blong mi. Ogis 9, 1974​—taem mi baptaes​—i wan dei long laef blong mi we mi glad moa bitim ol narafala dei.

Glad Long Wok Blong Prij

Fasin blong joen long wok blong prij i mekem mi kasem sam hadtaem we oli olsem wan bigfala hil. Traem we i bigwan olgeta i blong mekem ol man oli kasem save long toktok blong mi. Mi traehad blong toktok klia. Biaen, taem mi nidim help, fren we i joen wetem mi long wok blong prij i talem bakegen ol tok blong mi long man blong haos. Samfala oli no laekem, oli stap tingbaot mi olsem wan man we Ol Wetnes blong Jeova oli stap yusum blong mekem wok. Be wok blong prij i desisin blong mi mo samting we mi laekem blong mekem wetem fulhat blong mi.

Fasin ya blong wokbaot i go long wan doa mo i go long narafala doa blong smoltaem nomo i save mekem mi taed tumas. Plante haos long ples we mifala i prij long hem i gat ol step, mi no save wokbaot long olgeta blong kasem antap. Long koltaem, ol rod we i gat aes i mekem se kolosap mi no save mekem wok blong prij long ol haos wanwan. (Ol Wok 20:20) Be, ol brata blong mi long saed blong speret oli givhan long mi bigwan, mo naoia Jeova i blesem wetem wan wiljea we i wok wetem enjin, we i mekem wok blong prij i isi moa long mi.

Mi stat blong prij wetem leta. Mi no save raetem leta wetem han from raeting blong mi i no klia long plante man. Ale mi yusum wan taepraeta we i wok wetem lektrik blong raetem leta. Fasin blong mi blong taep i slou from han blong mi i no wokgud. Kolosap oltaem, mi wantem kilim wan leta be mi kilim narafala leta. Maet i tekem wan haoa no bitim wan haoa blong taepem wan pej nomo.

Nating se mi no gat naf paoa, plante taem, mi wok olsem haftaem paenia, evri manis mi mekem 60 no bitim 60 haoa long wok blong prij. Samting ya i nidim gudfala plan, plante moa traehad, mo sapot blong ol narafala we oli bilif. Tingting blong olgeta blong mekem wok blong paenia i leftemap tingting blong mi. Mama tu i soemaot wan gudfala eksampel taem hem i stam wok olsem wan fultaem no haftaem paenia, long semtaem hem i fesem hadtaem, sik mo traem blong lukaot long seven pikinini long haos we man blong hem i gat defren bilif.

Mi Wan Nomo

Taem mi kasem 24 yia, mi mekem desisin blong muvaot long haos mo stap mi wan. Mi kasem wan blesing taem mi muf i go long eria blong Bensonhest long Bruklin. Malboro kongregesen i olsem wan famle we i joengud. !Samting ya i mekem bilif blong mi i strong taem mi stap wetem olgeta! Nating se i gat tu no tri trak nomo long kongregesen ya, ol brata blong mi long saed blong speret oli stap tekem mi i go long ol miting. Be mi no stap longtaem long ples ya.

From mi harem olsem mi no save mekem wan samting, mi gobak long famle blong mi mo tri ya mi stap harem nogud tumas. Fasin blong kros i kambak bakegen. Biaen mi kasem tingting blong kilim mi wan i ded mo plante taem mi traem blong mekem ol samting ya. Tingting blong ded i kam antap bigwan long mi mo mi fraet from. Be mi dipen bigwan long God mo mi promes blong soem fasin tangkyu from laef we Hem i givim. Ol elda oli givim advaes mo oli leftemap tingting blong mi. Samting ya, wetem prea, stadi mi wan, longfala tingting blong famle blong mi, mo sam narafala help blong ol dokta oli stretem tingting blong mi.

Tru long ol Wajtaoa, wetem kaengud fasin, Jeova i givim ol save we mi nidim blong winim tingting we i foldaon. Yes, hem i keagud long ol man blong hem mo hem i save ol filing blong yumi. (1 Pita 5:6, 7) Biaen tingting blong mi we i foldaon bigwan i kamgud bakegen. Ten yia biaen, Jeova i stap givhan yet long mi blong winim fasin kros mo tingting we i foldaon. Plante taem kolosap tingting ya se mi no stret blong mekem wan samting i winim mi. Nating se i olsem, fasin blong prea, stadi long Baebol, mo famle blong mi long saed blong speret oli nambawan samting blong givhan long mi.

Afta we mi no bin faenem wan narafala ples blong stap long hem, mi tingting se mi mas stap wetem famle blong mi long ful laef blong mi. Biaen Jeova i ansa long ol prea blong mi. Mi faenem wan ples blong stap long Bedfod-Staevesan, wan eria blong Bruklin. Long en blong hot taem long 1984, mi kam long ples ya, mo mi bin stap long ples ya kasem naoia.

Wetem kaen fasin, ol memba blong kongregesen long Lafaet oli tekem mi i go long ol miting. Mi stap tingbaot yet faswan Buk Stadi blong mi long Kongregesen ya. !Mifala i mekem long namba fo store​—mo i no gat samting blong leftemap man i go antap! Nomo wetem help blong Jeova we i mekem se mi go antap mo mi kamdaon long ol step ya. Biaen mi go long wan narafala ples we i moa isi long mi blong joen long miting. Mo naoia Jeova i bin blesem mi wetem jans blong gat wan kongregesen Buk Stadi long haos blong mi.

Wan nambawan tingting blong mekem wok blong paenia i fulap long kongregesen ya. Taem mi kam, i gat kolosap 30 paenia mo kolosap 10 long olgeta oli lukaot long mi. Fasin blong wok strong we oli soemaot i pusum mi blong mekem wok blong haftaem paenia plante taem.

Long Epril 1989, Lafaet mo Prat kongregesen oli bildim wan nyufala Haos Kingdom long rod we i godaon long haos blong mi. Mo tu hemia i stret taem we mi nidim help, from bodi blong mi i kam moa nogud, fasin blong wokbaot i kam wan trabol bakegen. Be wetem wiljea we i wok wetem enjin mo help blong ol brata mo sista blong mi long saed blong speret, mi haremgud tumas long ol trep we oli go mo oli kam long ol miting. !Mi tangkyu tumas long ol gudfala fasin blong givhan olsem.

Tangkyu Tumas Long God From Sapot Blong Hem

Nating se ol leg blong mi oli no strong, hat blong mi i strong. Wan gudfala edukesen i mekem laef i moa isi, be God i bin givhan long mi. Plante taem mi no save weples bambae mi kasem kakae, be Jeova i bin sapotem mi mo i bin kam olsem wan strongfala Man blong Givim ol samting. I tru, ol tok blong oli impoten tumas long mi se: “Naoia mi mi olfala, mi stap longtaem, be neva mi luk wan gudfala man we Hae God i lego hem, no ol pikinini blong ol man olsem we oli stap asaskem kakae olbaot.”​—Ol Sam 37:23​—25.

Plante taem Jeova i mekem se mi save stanap long ol tok blong Baebol blong no agri long fasin blong yusum blad taem oli katem mi. (Ol Wok 15:28, 29) I no longtaem i pas, papa blong mi i ded. Mi harem nogud tumas blong lusum wan man we i bin stap olsem wan gudfala fren blong mi. Paoa blong Jeova nomo i bin tekemaot mi long samting ya mo ol narafala trabol.

Maet bodi blong mi i save gohed blong godaon, be bilif blong mi long God mo fasin fren blong mi wetem hem, ful laef blong mi i dipen long samting ya. !Mi glad tumas blong stap long medel blong ol man blong hem mo blong gat sapot blong Jeova oltaem!