Oli Mekem Samting We Jeova i Wantem

Daniel i Gohed Olwe Blong Mekem Wosip Long God

I NO plante taem we histri i save jenisim rod blong hem long wan naet nomo. Be, hemia nao samting we i hapen long 539 B.K.T.,a taem ol man Midia mo Pesia oli winim rul blong ol man Babilon long sam haoa nomo. Long taem ya, hem i namba 80 yia we Daniel, wan profet blong Jeova, i stap kalabus wetem ol man Jyu long Babilon. Daniel, we i gat samwe 90 yia finis, i kasem wan traem we maet hem i bigwan moa i bitim ol narafala samting we oli bin traem bilif blong hem long God bifo.

Afta we Babilon i foldaon, fastaem i luk olsem we ol samting bambae oli go gud nomo long saed blong Daniel. Nyufala king, hem i Darias blong Midia, we i gat 62 yia. Hem i laekem Daniel. Wan long ol faswan wok we Darias i mekem taem hem i kam king, se hem i putumap 120 satrap mo i leftemap tri man oli kam ol haeman.b Daniel nao i wan long ol trifala man ya we king i givim haenem long olgeta. !From we Darias i luksave se Daniel i waes tumas, hem i wantem mekem Daniel i kam praem minista tu! Be, long taem ya, wan samting i hapen we i jenisim plan blong king ya wantaem nomo.

Wan Rabis Plan

Ol haeman we oli wok wetem Daniel, mo wan bigfala kampani blong ol satrap, oli kam luk king wetem wan bigfala plan. Olgeta ya oli askem strong long Darias, blong hem i stanemap wan loa we i talem se: “Blong tate dei, olgeta man oli no mas prea long wan narafala god no man, be oli mas prea i go long yu nomo, O king. Sipos oli no mekem olsem, bambae ol man oli mas sakem olgeta oli go long hol blong ol laeon.” (Daniel 6:7) Ating Darias i ting se ol man ya oli stap soemaot klia long hem se oli fasgud long hem. Mo tu, from we hem i wan man blong narafala kantri, maet hem i ting se loa ya bambae i halpem hem, bambae i mekem ol man oli luksave moa se hem i gat paoa antap long olgeta olsem king.

Be, ol haeman ya mo ol satrap oli no wantem givhan long king, taem oli putumap loa ya. No gat. Olgeta ya oli “stap traehad blong faenem wan poen agensem Daniel long saed blong kingdom. Be oli no save faenem wan poen no wan kruked fasin, from we Daniel i no gyaman nating, mo oli no save faenem wan rong no kruked fasin nating long hem.” Taswe, ol rabis man ya oli tingting se: “Yumi no save faenem wan poen nating long man ya Daniel. Oraet, yumi mas faenem wan samting agensem hem long saed blong loa blong God blong hem nomo.” (Daniel 6:​4, 5) Oli save se Daniel i stap prea long Jeova evri dei, ale, oli traem mekem olsem we samting ya i wan bigfala rong we man i mas ded from.

Ating ol haeman ya mo ol satrap oli gat tingting we i agensem Daniel, from we “sloslou, Daniel i stap soemaot klia se hem i waes moa long [olgeta ya]. Hemia from we Daniel i gat nambawan fasin we i bitim ol narafala, mo king i wantem putumap hem antap long olgeta kingdom blong hem.” (Daniel 6:3) Maet oli no glad long stret fasin blong Daniel, from we hem i blokem ol kruked mo gyaman fasin. Nating se i olsem wanem, ol man ya oli pulum king blong saenem loa ya. From samting ya, loa ya i kam wan haf blong “loa blong ol man Midia mo Pesia, we i stap oltaem.”​—Daniel 6:​8, 9.

Daniel i Stanap Strong

?Afta we Daniel i harem se nyufala loa ya i stanap, hem i stop blong prea long Jeova? !No gat! Hem i nildaon long rum antap long haos blong hem, mo i prea long God tri taem long wan dei, “olsem we hem i stap mekem oltaem.” (Daniel 6:​10) Taem hem i stap prea, ol enemi blong hem “oli kam insaed mo oli faenem se Daniel i stap prea mo askem God blong lesin long hem.” (Daniel 6:​11) Ale, oli ripotem hem long king Darias. Nao king ya i harem nogud tumas, from we loa ya we hem i bin saenem, i mekem trabol long Daniel. Baebol i talem se: “Gogo kasem we san i godaon, hem i traehad blong mekem wan rod blong sevem Daniel.” Be nating se hem i king, hem i no save karemaot loa ya we hem i bin stanemap. Taswe, oli karem Daniel i go long hol blong ol laeon. I klia se hemia wan bigfala hol long graon no wan hol aninit long graon. King i leftemap tingting blong Daniel, i se: “God ya we yu stap gohed olwe blong mekem wosip long hem, bambae i sevem yu.”​—Daniel 6:​12-​16.

Long fulnaet, Darias i no slip mo i no kakae nating. Ale, long moning, hem i spid i go long hol ya. !Daniel i laef i stap mo i no gat wan kil nating! King i kwik blong tekem aksin. Hem i sakem olgeta enemi blong Daniel wetem ol famle blong olgeta, oli go long hol blong ol laeon blong panisim olgeta. Mo tu, Darias i talemaot olbaot se, “long olgeta ples we mi rul long hem, ol man oli mas seksek mo fraet long fored blong God blong Daniel.”​—Daniel 6:​17-​27.

Wan Lesen Blong Yumi

Daniel i soemaot wan nambawan eksampel long saed blong strong bilif. King tu, we hem i no wosip long Jeova, i luksave se Daniel i “stap gohed olwe” blong mekem wosip long Jeova. (Daniel 6:​16, 20) Aramaek tok we yumi tanem i kam “olwe” i rili minim “tanem i goraon.” Hem i minim wan fasin we i gohed oltaem. !Samting ya i stret nomo blong eksplenem fasin blong Daniel blong fasgud oltaem long Jeova!

Longtaem bifo we oli sakem Daniel i go long hol blong ol laeon, hem i wokem gudfala fasin ya blong gohed olwe blong wosip long Jeova. Taem hem i yangfala nomo mo hem i stap kalabus long Babilon, hem i no wantem tekem kakae mo dring we Loa blong Moses i putum tabu long hem, no we i kam doti from ol hiten kastom. (Daniel 1:8) Biaen, hem i no fraet blong talemaot mesej blong God long king blong Babilon, hemia Nebukadnesa. (Daniel 4:​19-​25) Sam haoa nomo bifo we Babilon i foldaon, Daniel i no fraet blong talemaot jajmen blong God long King Belsasa. (Daniel 5:​22-​28) Taswe, taem Daniel i fesem ol laeon long hol ya, hem i gohed nomo blong bilif strong long Jeova, olsem hem i bin mekem oltaem bifo.

Yu tu, yu save gohed olwe nomo blong mekem wosip long Jeova. ?Yu yu wan yangfala? Ale, tekem aksin naoia blong wokem fasin blong gohed olwe long rod ya. Yu save mekem olsem sipos yu sakemaot olgeta rabis fren blong wol ya wetem ol rabis fasin tu. Sipos yu bin mekem wok blong God longtaem lelebet finis, gohed long rod ya blong stanap strong oltaem long bilif. Yu no mas lego, from we ol wanwan traem we yumi fesem, oli givim jans long yumi blong soem long Jeova se yumi gat strong tingting blong gohed nomo blong mekem wosip long hem.​—Filipae 4:​11-​13.

[Ol futnot]