!Tingbaot Bigfala Man Ya We i Wokem Yu!
“God i mekem yumi, . . . oltaem yufala i mas tingbaot hem. I nogud yufala i stap wet go kasem taem ya we evri dei, ol trabol bambae oli stap kam kasem yufala.”—PRIJA 12:1.
1. ?Ol yangfala we oli givim laef blong olgeta long God, oli wantem yusum yangtaem mo paoa blong olgeta olsem wanem?
JEOVA i givim paoa long ol man blong hem blong oli mekem wanem we hem i wantem. (Aesea 40:28-31) Hem i mekem olsem long evri wan, nomata hamas yia oli gat. Be, ol yangfala we oli givim laef blong olgeta long God, oli mas wantem moa blong yusum yangtaem blong olgeta mo paoa blong olgeta long waes fasin. From samting ya, oli tinghevi long advaes blong “wan man we i waes gud,” hemia King Solomon blong Isrel bifo. Man ya i talem se: “God i mekem yumi, mo naoia we yufala i yangfala yet, oltaem yufala i mas tingbaot hem. I no gud yufala i stap wet go kasem taem ya we evri dei, ol trabol bambae oli stap kam kasem yufala, mo evri yia, bambae yufala i stap talem se, ‘Mi mi no glad nating long laef ya.’ ”—Prija 1:1; 12:1.
2. ?Ol pikinini blong ol Kristin we oli givim laef blong olgeta i go long God, oli mas mekem wanem?
2 Advaes ya blong Solomon se yumi mas tingbaot Bigfala Man ya we i Wokem yumi taem yumi yangfala yet, i go fastaem long ol yangfala man mo woman blong Isrel. Olgeta ya oli bon long wan nesen we i blong Jeova finis. ?Olsem wanem long pikinini blong ol Kristin we oli givim laef blong olgeta long Jeova tede? I stret nomo blong ting se olgeta tu oli mas tingbaot Bigfala Man ya we i Wokem yumi. Sipos oli mekem olsem, bambae oli ona long hem mo bambae oli kasem blesing.—Aesea 48:17, 18.
Sam Gudfala Eksampel Blong Bifo
3. ?Josef, Samuel, mo Deved, oli soem wanem eksampel long yumi?
3 Baebol i tokbaot plante yangfala we oli soemaot gudfala eksampel long saed blong fasin ya blong tingbaot Bigfala Man ya we i Wokem olgeta. Josef, pikinini blong Jekob, i tingbaot God nating se hem i smol yet. Taem waef blong Potifa i traem pulum Josef blong slip wetem hem, Josef i no wantem mo i talem se: ‘Sipos mi kam slip wetem yu, bambae mi mekem sin long fes blong God. Hemia i nogud tumas ya.’ (Jenesis 39:9) Samuel we i laen blong ol Livaet, i tingbaot God taem hem i pikinini yet, mo tu long ful laef blong hem. (1 Samuel 1:22-28; 2:18; 3:1-5) Yangfala Deved blong Betlehem i no fogetem Bigfala Man ya we i Wokem hem. Hem i soemaot se hem i trastem God, taem hem i faet agensem jampion blong ol man Filistia, Golaeat. Hem i talem se: “Yu yu kam blong faet long mi long tufala spia mo naef blong faet blong yu, be mi mi kam blong faet long yu long nem blong Hae God. Hem i God blong mifala, mo hem i gat olgeta paoa, be yu yu stap jikim ol soldia blong hem. Tede nomo, hem bambae i putum yu long han blong mi. Bambae mi winim yu, mi katemaot hed blong yu. . . . Nao olgeta man long wol bambae oli save we God blong mifala i stap, mo olgeta man long ples ya bambae oli luk we hem i no nidim naef blong faet mo spia blong sevem ol man blong hem. Hem i gat paoa blong win long faet, mo hem bambae i putum yufala evriwan long han blong mifala.” I no longtaem biaen, Golaeat i ded, mo ol man Filistia oli ronwe.—1 Samuel 17:45-51.
4. (a) ?Wanem i soem se smol gel ya blong Isrel, we i slef long Siria, wetem yangfala King Josaea, tufala i tingbaot Bigfala Man ya we i Wokem yumi? (b) ?Taem Jisas i gat 12 yia, olsem wanem hem i soemaot se hem i tingbaot Bigfala Man ya we i Wokem hem?
4 Wan narafala yangfala we i tingbaot Bigfala Man ya we i Wokem yumi hemia smol gel Isrel we i slef long wan narafala kantri. Smol gel ya i givim gudfala witnes long waef blong Neman, jif blong ol ami blong Siria. Toktok blong hem i pulum Neman blong go long profet blong God nao leprosi blong hem i finis, mo hem i kam wan man blong wosipim Jeova. (2 King 5:1-19) Yangfala King Josaea hem tu i no fraet blong sapotem klin wosip blong Jeova. (2 King 22:1–23:25) Be, Jisas blong Nasaret hem i beswan eksampel blong wan yangfala we i tingbaot Bigfala Man ya we i Wokem hem. Tingbaot wanem i hapen long hem taem hem i gat 12 yia. Papa mama blong hem, tufala i tekem hem i go wetem tufala long Jerusalem blong joen long lafet blong Pasova. Taem tufala i stat wokbaot blong gohom, tufala i luksave se Jisas i no stap. Ale, tufala i kambak long Jerusalem blong traem faenem hem. Long namba tri dei, tufala i faenem hem i stap tokbaot Baebol wetem ol tija long haos prea. Taem mama blong hem i soemaot se hem i bin mekem tufala i wari, Jisas i askem se: “?From wanem yutufala i stap lukaot mi? ?Yutufala i no save se mi mi mas stap long haos blong Papa blong mi?” (Luk 2:49) Long tingting blong Jisas, i impoten blong go long tempel, ‘haos blong Papa blong hem,’ blong kasem ol save long saed blong spirit we oli sas tumas. Tede, Haos Kingdom blong ol Witnes blong Jeova i wan nambawan ples blong kasem stret save long saed blong Bigfala Man ya we i Wokem yumi.
!Tingbaot Jeova Naoia!
5. Long prapa tok blong yu, eksplenem tok we waes man ya blong bifo i raetem long Prija 12:1
5 Wan man we i wosipim Jeova long ful hat blong hem, hem i kwik blong wantem mekem wok blong God mo hem i wantem gohed long wok ya long ful laef blong hem. Be, ?wanem lukluk blong wan man we i spenem yangtaem blong hem blong mekem samting we i olbaot nomo, from we hem i no tingbaot God? Tabu spirit i pulum waes man ya blong bifo, blong raetem se: “God i mekem yumi, mo naoia we yufala i yangfala yet, oltaem yufala i mas tingbaot hem. I nogud yufala i stap wet go kasem taem ya we evri dei, ol trabol bambae oli stap kam kasem yufala, mo evri yia, bambae yufala i stap talem se, ‘Mi mi no glad nating long laef ya.’ ”—Prija 12:1.
6. ?Wanem pruf i soemaot se olfala Simeon mo Ana tufala i tingbaot Bigfala Man ya we i Wokem tufala?
6 I no gat man we i glad blong kam olfala nao ‘evri dei ol trabol oli kam kasem hem.’ Be ol olfala we oli tingbaot God oltaem, oli glad. Eksampel, olfala Simeon we i holem bebi Jisas long han blong hem long tempel, i glad tumas i se: “Hae God, mi mi man blong wok blong yu, mo naoia yu save letem mi mi ded, we tingting blong mi i stap kwaet, from we promes blong yu i kamtru finis. Long ae blong mi nomo, mi mi luk rod ya blong yu blong sevem man. Long fes blong ol man blong olgeta ples, yu yu mekem rod ya i rere finis. Pikinini ya i wan laet blong givim laet long ol hiten man, mo hem bambae i leftemap nem blong mifala ol laen blong Isrel, we mifala i man blong yu.” (Luk 2:25-32) Ana we i gat eiti fo yia blong hem, hem tu i stap tingbaot Bigfala Man ya we i Wokem hem. Hem i stap oltaem long tempel, mo hem i stap tu long taem ya we papa mama blong Jisas oli tekem hem i kam. “Nao hem i pas long ples ya, stret long taem ya we Simeon i stap tokbaot pikinini ya. Nao woman ya i talem tangkiu long God from, mo i stap tokbaot pikinini ya long olgeta we oli stap wet blong Mesaea i mekem Jerusalem i fri bakegen.”—Luk 2:36-38.
7. ?Wanem filing blong olgeta we oli mekem wok blong God gogo kasem taem we oli kam olfala?
7 Tede, ol Witnes blong Jeova we oli mekem wok blong God go kasem we oli kam olfala, maet oli safa from soa long bodi mo from we naoia oli no moa naf blong mekem plante samting. !Nating se i olsem, oli hapi tumas, mo yumi rili tangkiu from nambawan wok we oli bin mekem! Oli gat ‘glad blong Masta’ from we oli save se hem i yusum bigfala paoa blong hem long wol ya mo i putumap Jisas Kraes olsem King long heven we i gat bigfala paoa. (Nehemaea 8:10) Naoia i taem blong ol yangfala mo ol olfala blong lesin long tok ya: “Yufala ol gel wetem ol boe, yufala ol ololfala wetem ol pikinini tu, yufala i mas presem hem.”—Ol Sam 148:12, 13.
8, 9. (a) ?Ol ‘dei blong trabol’ oli blong hu, mo from wanem i olsem? (b) Eksplenem Prija 12:2
8 Sipos man i no tingbaot God mo i no gat save long nambawan stamba tingting blong Hem, hem i save harem nogud tumas—we maet tingting blong hem i foldaon—nao ol ‘dei blong trabol’ oli kasem hem taem hem i kam olfala. Ol man ya oli no gat save long saed blong spirit we i save givhan long olgeta blong faet agensem ol hadtaem we oli kamaot taem oli kam olfala mo ol trabol we oli stat long taem we Jisas Kraes i sakemaot Setan long heven. (Revelesen 12:7-12) Taswe, waes man ya blong bifo i pulum yumi blong tingbaot God blong yumi bifo we “san mo mun mo ol sta oli no moa save saen gud, mo ol klaod blong ren oli no moa save gowe long laef blong [yumi].” (Prija 12:2) ?Wanem mining blong ol tok ya?
9 Solomon i tokbaot yangtaem olsem weta long Palestaen long hot taem, we san, mun, mo ol sta oli givim laet blong olgeta long wan skae we i no gat klaod nating. Long taem olsem, ples i klia gud. Be, taem man i kam olfala, laef blong hem i olsem taem blong kolkol, we ol trabol oli stap folfoldaon oltaem olsem ren. (Job 14:1) !Sore tumas long man we i save God be i no bin mekem wok blong hem long hot taem, we i minim taem hem i yang yet! Long kolkol taem, we i minim taem we man i kam olfala, ol samting oli kam tudak, antap moa sipos man ya i no bin tekem jans long yangtaem blong hem blong mekem wok blong Jeova from we hem i bin ronem win nomo. Yes, nomata hamas yia yumi gat, i gud yumi ‘obei long Hae God oltaem.’ Hemia wanem we Keleb i bin mekem, hem i man blong wok wetem profet Moses, we i stap tru oltaem long God.—Josua 14:6-9.
Hadtaem Blong Ol Olfala
10. ?Wanem mining blong (a) “ol man blong lukaot long haos”? (b) “ol strongfala man”?
10 Nekis samting, Solomon i tokbaot hadtaem we i kamaot long taem ya we “ol man blong lukaot long haos, oli seksek, mo ol strongfala man oli kam slak. Ol woman we oli graenem sid bambae oli no moa wok from we i no moa gat plante long olgeta. Mo ol woman we oli stanap long windo bambae oli luk se ples i tudak.” (Prija 12:3, NW) “Haos” ya i minim bodi blong man. (Matiu 12:43-45; 2 Korin 5:1-8) Ol “man we oli lukaot” long haos ya i minim ol han blong man, we oli stap protektem bodi mo givim samting we bodi i nidim. Taem man i kam olfala, plante taem ol han ya blong hem oli seksek from we oli no moa gat paoa, oli taed kwik mo oli slak. “Ol strongfala man”—hemia leg blong man—oli no moa strong naf blong holem bodi, nao man i no moa save leftemap olgeta, i stap pulum olgeta nomo i go sloslou. Nating se i olsem, yumi glad tumas blong luk ol olfala Kristin brata sista blong yumi oli kam long ol Kristin miting.
11. Long parabol ya, ?hu ya “ol woman we oli graenem sid” mo “ol woman we oli stanap long windo”?
11 “Ol woman we oli graenem sid bambae oli no moa wok from we i no moa gat plante long olgeta”—?olsem wanem samting ya i kamtru? Maet ol tut blong yumi oli no moa gud, mo yumi mas pulumaot sam long olgeta, mekem se yumi no moa gat plante i stap, no maet i no moa gat wan nating. I no moa isi nao blong graenem ol strongfala kakae. “Ol woman we oli stanap long windo bambae oli luk se ples i tudak”—ae blong yumi wetem tingting blong yumi we i givhan long yumi blong luksave ol samting, naoia oli no moa save luk klia, no maet oli kam tudak olgeta.
12. (a) ?I minim wanem se ‘ol doa we oli stap fored long bigrod, oli sat’? (b) ?Wanem tingting blong yu long saed blong ol olfala we oli stap talemaot Kingdom?
12 Waes man ya blong bifo, i gohed se: “Long dei ya, ol doa we oli stap fored long bigrod bambae oli sat. Bambae yu no moa save harem noes blong ston blong graenem sid, nao bambae yu girap wetem singsing blong ol pijin, mo ol gel blong singsing bambae oli no moa sing strong.” (Prija 12:4, NW) Maot—we i olsem doa ya—i no moa save open plante blong talemaot wanem i stap insaed long “haos” ya, no bodi, blong ol olfala ya we oli no moa mekem wok blong God. Oli no moa joen long ol samting we oli hapen long “bigrod,” hemia laef. Be, ?olsem wanem long ol olfala man blong talemaot Kingdom? (Job 41:14) Maet oli wokbaot sloslou i go long ol haos wanwan mo samfala maet oli faenem i had blong tok klia, be oli gohed blong presem Jeova.—Ol Sam 113:1.
13. ?Waes man ya blong bifo i yusum wanem tok blong eksplenem problem we i stap kasem ol olfala, be olsem wanem long ol olfala Kristin brata sista?
13 “Noes blong ston blong graenem sid i no moa strong” from we naoia i no moa gat tut blong graenem strongfala kakae. Wan man we i kam olfala hem i no moa save gat wan dip slip. Smol noes blong wan pijin i naf blong wekemap hem. Wan olfala i no moa save singsing plante, mo i no moa naf blong singsing stret. “Ol gel blong singsing”—hemia ol not blong myusek—“oli no moa sing strong.” Ol olfala oli no moa save lesin gud long myusek we narafala i mekem. Be, ol olfala tabu Kristin wetem ol fren blong olgeta, we oli no moa yangfala, oli gohed blong yusum voes blong olgeta blong singsing blong presem God long ol Kristin miting. !Yumi glad tumas we ol olfala ya oli stanap wetem yumi blong presem Jeova long kongregesen!—Ol Sam 149:1.
14. ?Ol olfala oli fraet long wanem samting we i mekem laef blong olgeta i had?
14 !Yumi sore tumas blong luk hadtaem we ol olfala oli kasem, antap moa olgeta we oli no bin tingbaot God long laef blong olgeta! Waes man ya blong bifo, i talem se: “Bambae oli stap fraet long ples we i hae, mo oli fraet blong wokbaot long rod. Ol flaoa blong tri ya amon bambae oli fulap, grashopa bambae i dragem hem wan i go, mo frut ya beri bambae i brok open, from we man i stap wokbaot i go long haos we i no moa save kamaot long hem bakegen, mo ol man oli stap maj olbaot long rod, oli stap krae bigwan.” (Prija 12:5, NW) Taem wan olfala i stanap antap long ol step, plante taem hem i fraet blong foldaon. Sipos hem i lukluk i go long samting we i stap antap olgeta, samting ya tu i mekem hed blong hem i raon. Taem wan olfala i go long ol rod we i gat fulap man, hem i fraet from we i tingting se maet wan stilman bambae i kilim hem no mekem trabol long hem.
15. ?I minim wanem se “ol flaoa blong tri ya amon bambae oli fulap,” mo olsem wanem grashopa i ‘dragem hem wan i go’?
15 Long saed blong wan olfala man, “ol flaoa blong tri ya amon oli kam fulap,” we maet i minim se hea blong hem i stat kam waet smol, gogo i waet we i waet gud. Ol olfala hea oli folfoldaon olsem waet flaoa blong tri ya amon. Taem wan olfala i ‘dragem hem’ wan i go olbaot, we bodi blong hem i bendaon smol mo ol han blong hem oli slak nomo, hem i luk lelebet olsem wan grashopa. !Tru ya, maet sam long yumi i luk olsem, be ol narafala oli no mas foget se yumi evriwan i joen long bigfala ami blong ol lokis ya blong Jeova we oli stap wok strong mo spid!—Lukluk Wajtaoa blong Mei 1, 1998, pej 8-13.
16. (a) ?Tok ya ‘frut ya beri bambae i brok open’ i soemaot wanem? (b) ?Wanem ya ‘haos we man bambae i no moa save kamaot long hem,’ mo wanem sam saen we oli soemaot se ded i kam klosap?
16 Wan olfala i no moa hanggri bigwan olsem bifo, nating sipos kakae we i stap fored long hem i tesgud tumas olsem frut ya beri. Longtaem bifo, ol man oli bin stap yusum ol smosmol beri ya blong mekem hanggri i kam. ‘Frut ya beri we i brok open’ i minim taem we olfala man i no moa hanggri bigwan, mekem se beri ya tu i no naf blong pulum hanggri i kam long hem. Ol samting ya oli saen we i soemaot se man ya i kam klosap nao long “haos blong hem we i no moa save kamaot long hem,” hemia beregraon. Sipos hem i no bin tingbaot God mo i bin gohed long rabis rod blong hem, ples ya bambae i hom blong hem gogo i no save finis, from we God bambae i no tingbaot hem taem hem i mekem ol dedman oli laef bakegen. Saen se ded i klosap, i kamaot long maot blong wan olfala taem hem i krae mo i komplen oltaem long soa bodi blong hem.
17. ?Wanem mining blong ‘jen blong silva’ we i brok, mo ating “laet ya we oli wokem long gol” i minim wanem?
17 Baebol i leftemap tingting blong yumi blong tingbaot God bifo we ‘jen ya we oli wokem long silva bambae i brok mo laet ya we oli wokem long gol bambae i foldaon, i smas, bifo we rop ya we i stap long wel bambae i brok, mo bigfala botel ya blong wota bambae i brobrok long ol smosmol pis.’ (Prija 12:6) “Jen ya we oli wokem silva” maet i minim bun we i holem baksaed blong yumi. Sipos bun ya i brok man i save ded, from we hem nao i stap protektem olgeta string we oli joenem bren blong yumi wetem ol narafala haf blong bodi blong yumi. “Laet ya we oli wokem long gol” ating i minim bren, we i stap sidaon gud insaed long hed blong yumi mo we i joen wetem bun blong bak. Hem i olsem gol from we hem i sas tumas, mo taem hem i smas, risal se, man i ded.
18. ?Wanem mining blong ‘bigfala botel ya blong wota we i brobrok long ol smosmol pis,’ mo wanem i hapen taem hem i brok?
18 “Bigfala botel ya blong wota,” i minim hat, we i pamem blad i go long olgeta ples blong bodi. Taem man i ded, hat i kam olsem wan bigfala botel wota we i brobrok long smosmol pis, from we hem i no moa save karem, holem, mo pamem blad blong givim paoa long bodi. Nao ‘rop ya we i stap long wel bambae i brok,’ mekem se blad we i karem laef long man, bambae i stop. Tru long ol tok ya, Jeova i soemaot long Solomon se blad i stap goraon long olgeta haf blong bodi, longtaem bifo long ol yia 16 handred taem we dokta ya William Harvey i faenemaot samting ya.
19. ?Olsem wanem ol tok blong Prija 12:7 oli kamtru taem man i ded?
19 Waes man ya blong bifo i gohed se: “Bodi blong yumi bambae i gobak long graon, mo laef ya we God i givim long yumi, bambae i gobak long hem bakegen.” (Prija 12:7) Naoia we “rop ya we i stap long wel” i brok, bodi blong man, we i kamaot long graon, bambae i gobak long graon bakegen. (Jenesis 2:7; 3:19) Sol i ded from we spirit, no paoa blong laef, we God i givim, i gobak mo i stap wetem God we i wokem yumi.—Esikel 18:4, 20; Jemes 2:26.
?Wanem Fiuja Blong Olgeta We Oli Tingbaot God?
20. ?Moses i askem wanem taem hem i prea mo i talem ol tok ya we yumi save ridim long Ol Sam 90:12?
20 Ol tok blong Solomon oli soemaot stret se i impoten tumas blong tingbaot Bigfala Man ya we i Wokem yumi. Olgeta we oli tingbaot Jeova mo oli mekem wok blong hem wetem fulhat blong olgeta, oli sua blong kasem wan laef we i moa gud i winim sotfala laef ya we i stap kasem trabol nomo. Nating sipos ol man ya oli yangfala no olfala, oli gat sem tingting we Moses i gat taem hem i prea se: “Soem long mifala olsem wanem blong kaontem ol dei blong mifala long wan rod we i save karem wan hat we i waes.” Profet ya blong God i gat tingting daon, mo i wantem tumas se Jeova i soem, no i tijim hem wetem ol man Isrel blong oli kam waes taem oli skelem ‘ol yia blong olgeta’ mo yusum olgeta long fasin we God i agri long hem.—Ol Sam 90:10, 12. NW.
21. ?Sipos yumi wantem kaontem ol dei blong yumi blong givim ona long Jeova, yumi mas mekem wanem?
21 Ol Kristin yangfala oli mas gat strong tingting blong folem advaes blong waes man ya blong bifo, we i talem se yumi mas tingbaot Bigfala Man ya we i Wokem yumi. !Ol yangfala oli gat plante nambawan jans blong mekem tabu wok blong God! Be, i tru se, nomata hamas yia yumi gat, sipos yumi lanem blong kaontem ol dei blong yumi blong ona long Jeova long ‘taem ya blong en,’ maet bambae yumi naf blong gohed blong kaontem ol dei ya gogo i no save finis. (Daniel 12:4; Jon 17:3) Blong mekem olsem, yumi mas tingbaot Bigfala Man ya we i Wokem yumi. Mo tu, yumi mas finisimgud olgeta wok ya we God i givim blong yumi mekem.
?Bambae Yu Yu Ansa Olsem Wanem?
◻ ?From wanem i stret we ol yangfala oli tingbaot God?
◻ ?Wanem sam eksampel long Baebol long saed blong olgeta we oli tingbaot Bigfala Man ya we i Wokem olgeta?
◻ ?Wanem sam long ol samting we Solomon i tokbaot se oli stap hapen taem man i kam olfala?
◻ ?Ol man we oli tingbaot Jeova oli save kasem wanem kaen fiuja?
[Tok Blong Pija Long Pej 15]
Deved, smol gel blong Isrel, Ana, mo Simeon, oli tingbaot Jeova
[Tok Blong Pija Long Pej 16]
Ol olfala Witnes blong Jeova oli glad blong mekem tabu wok blong Bigfala Man Ya we i Wokem yumi