?Yu Yu Stap Mekemgud Olgeta Wok Ya Blong God?
“Olgeta samting we yumi mekem, nating we i gud no i nogud, go kasem ol samting we yumi haed nomo blong mekem, be hem bambae i mekem kot long yumi from olgeta evriwan.”—PRIJA 12:14.
1. ?Wanem ol defren rod we Jeova i yusum blong halpem ol man blong hem?
JEOVA i stap givhan long ol man we oli tingbaot hem olsem Bigfala Man ya we i Wokem olgeta. Tok blong hem, we tabu spirit i stamba blong hem, i givim save we ol man ya oli nidim blong mekem hem i glad fulwan. Tabu spirit blong God i lidim ol man ya blong mekem wok blong hem mo blong ‘karem frut long laef blong olgeta.’ (Kolosi 1:9, 10) Mo tu, Jeova i givim ol kakae long saed blong spirit mo i lidim ol man blong hem tru long “slef we i stret mo waes.” (Matiu 24:45-47, NW) Yes, God i yusum plante defren rod blong givim blesing long ol man blong hem we oli stap mekem wok blong hem mo gohed blong talemaot gud nius blong Kingdom.—Mak 13:10.
2. ?Wanem sam kwestin we oli kam antap long saed blong wok we yumi mas mekem i go long Jeova?
2 Ol trufala Kristin oli glad blong stap bisi long wok blong Jeova. Be, maet tingting blong samfala i foldaon mo oli ting se oli stap traehad blong nating nomo. Eksampel, samtaem ol Kristin we oli givim laef blong olgeta finis i go long God, maet oli stap askem long olgeta wan se i rili impoten blong oli wok strong olsemia. Ol hed blong famle we oli tingbaot se oli mas mekem famle stadi mo narafala wok bakegen, maet oli stat askem kwestin olsem se: ‘?Jeova i rili glad wetem samting we mifala i stap mekem? ?Mifala i rili stap mekem olgeta wok ya blong God we yumi mas mekem?’ Toktok blong waes man ya blong bifo i save givhan long yumi blong kasem ansa blong ol kwestin ya.
?Olgeta Samting Blong Laef Oli Rili Blong Nating Nomo?
3. Folem toktok blong Prija 12:8, ?wanem samting we i rili olsem nating nomo?
3 Maet samfala oli ting se tok blong waes man ya blong bifo, i no leftemap tingting blong ol yangfala mo ol olfala nating. “Man ya we i waes gud long ol fasin blong wol ya, hem i talem se, ‘!Laef blong yumi long wol ya, hem i blong nating nomo! !Olgeta samting blong hem i blong nating nomo!’ ” (Prija 12:8) Blong talem stret, olgeta samting oli nating nomo sipos wan man i no tingbaot God long yangtaem blong hem, i no mekem wok blong God taem hem i stap kam olfala, nao samting we hem i kasem hemia nomo se ol yia blong olfala. Long wan man we i olsem, olgeta samting oli nating nomo, laef blong hem i emti. Nating sipos hem i winim plante mane mo i kasem haenem, be taem hem i ded, olgeta samting ya oli nating nomo long wol ya we i stap long paoa blong rabis man ya, Devel Setan.—1 Jon 5:19.
4. ?From wanem yumi save talem se i no olgeta samting evriwan we oli nating nomo?
4 Be, olgeta we oli hivimap ol sas samting blong olgeta long heven from we oli mekem wok blong Jeova, bambae oli no luk olgeta samting blong laef olsem nating nomo. (Matiu 6:19, 20) Oli gat plante samting blong mekem i go long nambawan wok blong Masta, mo ol samting ya oli no blong nating. (1 Korin 15:58) Be, ?olsem wanem long yumi ol Kristin we yumi givim laef blong yumi finis long God? ?Yumi stap bisi long ol wok we God i givim, long ol las dei ya? (2 Timoti 3:1) No, yumi stat folem wan fasin blong laef we i sem mak long laef blong bighaf blong ol man raonabaot long yumi. Ol man ya maet oli memba blong ol defren skul, mo maet sam long olgeta oli strong long skul blong olgeta, oli stap go oltaem long jos, mo oli traehad blong mekem wanem we i stret folem wosip blong olgeta. Be, olgeta ya oli no man blong talemaot mesej blong Kingdom. Oli no gat stret save se naoia hem i “taem blong en” mo oli no gat tingting ya se oli mas wok strong naoia from we yumi stap long wan taem we i impoten tumas.—Daniel 12:4, NW.
5. ?Sipos ol samting blong laef oli kam olsem impoten samting long tingting blong yumi, yumi mas mekem wanem?
5 Jisas Kraes i tokbaot taem blong yumi se: “Long taem ya we mi, mi Pikinini blong Man mi kamtru, bambae i olsem taem blong Noa bifo, we ol man oli no rere. Long taem ya, taem we wota i no ron bigwan yet, ol man oli stap kakae, mo oli stap dring, mo oli stap mekem mared, go kasem taem we Noa i go insaed long bigfala sip blong hem. Mo olgeta ya oli no save se bambae trabol i kam, gogo wota i ron bigwan, i tekemaot olgeta. Nao long taem ya we mi, mi Pikinini blong Man mi kamtru, bambae i sem mak nomo.” (Matiu 24:37-39) Sipos man i no bitim mak, i no gat samting i rong wetem fasin blong kakae mo dring, mo mared hem i wan plan we God hem wan i bin stanemap fastaem. (Jenesis 2:20-24) Be, sipos yumi luksave se ol samting blong laef oli kam olsem impoten samting long tingting blong yumi, i gud blong tokbaot samting ya long prea blong yumi. Jeova i save halpem yumi blong putum ol wok blong Kingdom fastaem, hem i save halpem yumi blong mekem samting we i stret, mo blong gohed blong mekem gud olgeta wok we yumi mas mekem i go long hem.—Matiu 6:33; Rom 12:12; 2 Korin 13:7.
Fasin Blong Givim Laef Mo Ol Wok We Yumi Mas Mekem i Go Long God
6. ?Long wanem rod, samfala we oli baptaes finis, oli no stap mekem olgeta wok ya we man i mas mekem i go long God?
6 Sam Kristin we oli baptaes finis, oli nidim blong prea oltaem from we oli no stap mekem ol wok ya we oli bin agri blong mekem taem oli givim laef blong olgeta long God. Blong plante yia nao, yumi kaontem se i gat bitim 300,000 man oli stap tekem baptaes evri yia, be bigfala namba blong ol Witnes blong Jeova we oli stap bisi long wok blong prij, i no kam antap bigwan olsem namba ya blong olgeta we oli baptaes. Samfala we oli kam man blong talemaot Kingdom, oli no moa gohed long wok ya. Be, ol man wanwan oli mas joen finis long Kristin minista wok bifo we oli tekem baptaes. Taswe, oli tinghevi long oda ya we Jisas i givim long ol man blong hem se: “Yufala i mas go long ol man long olgeta ples long wol, blong pulum olgeta oli kam man blong mi. Mo yufala i mas baptaesem olgeta long nem blong Papa blong mi, mo long nem blong mi, mi Pikinini blong hem, mo long nem blong Tabu Spirit. Mo yufala i mas tijim olgeta blong oli folem olgeta tok ya we mi mi givim finis long yufala.” (Matiu 28:19, 20) Sipos wan man we i baptaes finis mo i no gat wan bigfala problem long helt no sam narafala hadtaem we i bitim paoa blong hem, be hem i no moa mekem wok olsem wan Witnes blong God mo Jisas Kraes, man ya i no stap mekem olgeta wok we Bigfala Man we i Wokem yumi i wantem hem blong mekem.—Aesea 43:10-12.
7. ?From wanem yumi mas joen tugeta long miting oltaem?
7 Isrel blong bifo hem i wan nesen we i blong God, mo aninit long kontrak blong Loa, i gat sam wok we ol man ya oli mas mekem i go long Jeova. Eksampel, olgeta man long Isrel oli mas kam wanples blong mekem tri bigfala lafet evri yia. Eni man we i no wantem mekem lafet blong Pasova, man ya i mas kasem “panis from sin blong hem,” hemia ded. (Namba 9:13; Levitikas 23:1-43; Dutronome 16:16) Blong mekem gud olgeta samting we God i wantem olgeta blong mekem, ol man Isrel oli mas kam wanples blong wosip. (Dutronome 31:10-13) I no gat wan samting long Loa we i talem se, ‘Yu save mekem samting ya sipos yu luk se i laenap wetem laef blong yu.’ Long tingting blong olgeta we oli givim laef blong olgeta i go finis long Jeova, oda ya blong kam tugeta blong wosip i laenap wetem ol tok ya blong Pol: “I gud yumi stap tingbaot yumi, blong yumi givgivhan long yumi blong mekem yumi strong blong lavem ol man, mo blong mekem ol gudfala fasin. I nogud yumi lego ol miting blong jos, olsem we sam long yumi oli mekem finis. Oltaem yumi mas toktok gud long yumi blong leftemap tingting blong yumi, from we yumi save se Dei ya we Masta blong yumi bambae i jajem olgeta man long hem, hem i kam klosap finis.” (Hibrus 10:24, 25) Yes, fasin blong joen wetem ol narafala Kristin brata sista long ol miting, i wan haf blong ol samting ya we yumi mas mekem blong God.
!Skelemgud Ol Disisen Blong Yu!
8. ?From wanem wan yangfala we i givim laef blong hem finis long God, i mas prea mo tingting gud long wok we hem i stap mekem i go long God?
8 Maet yu yu wan yangfala we yu givim laef blong yu i go long Jeova. Yu save kasem ol sas blesing sipos yu putum ol wok blong Kingdom long fasples long laef blong yu. (Ol Proveb 10:22) Tru long prea mo gudfala plan, bambae yu naf blong spenem yangtaem blong yu long sam haf blong fultaem wok blong prij—hemia wan nambawan rod blong soemaot se yu tingbaot Bigfala Man ya we i Wokem yu. Sipos yu no mekem olsem, bambae yu stat spenem bighaf blong taem mo intres blong yu long ol samting long saed blong bodi. Olsem evri narafala man, maet bambae yu mared taem yu yangfala yet mo yu stat gat plante kaon olbaot from we yu traehad blong kasem plante sas samting. Maet yu stat spenem taem mo paoa blong yu long wan wok we i givim bigfala mane long yu. Sipos yu gat pikinini, bambae yu mas wok had blong lukaot long ol wok blong famle blong plante yia. (1 Timoti 5:8) Maet yu no fogetem Bigfala Man ya we i Wokem yu, be i waes blong luksave se plan we yu mekem taem yu yang yet, no plan we yu no mekem, bambae i makemaot wanem kaen laef we bambae yu gat taem yu kam bigman. Taem yu kam olfala, maet yu luklukbak mo yu tingting se i moagud sipos yu bin spenem moa taem long tabu wok blong Bigfala Man ya we i Wokem yu. ?From wanem yu no tingbaot ol plan blong yu naoia mo prea from? Olsem nao, taem yu kam olfala bambae yu rili glad from we yu bin mekem tabu wok blong Jeova long yangtaem blong yu.
9. ?Wan brata we i kam olfala mo we maet bifo hem i bin holem wan impoten wok insaed long kongregesen, hem i gat jans blong mekem wanem?
9 Nao, tingbaot ol man ya we maet bifo oli bin wok olsem man blong lukaot long ol ‘sipsip blong God.’ (1 Pita 5:2, 3) Be, from sam risen, oli lego long wok ya. I tru se, maet naoia oli no moa yang, mo maet i hadwok moa long olgeta blong mekem plante long wok blong God. Be, oli save gat jans blong kasem sam tiokratik wok bakegen. !Tru ya, wan man olsem, i save givhan bigwan long ol narafala sipos hem i tekem sam wok insaed long kongregesen! Mo from we yumi no moa laef blong mekem samting we yumi nomo i wantem, ol fren mo famle blong yumi bambae oli glad tumas sipos man ya i naf blong mekem moa wok, blong givim ona long God. (Rom 14:7, 8) Antap moa, Jeova bambae i no save fogetem eni man we i mekem wok blong hem. (Hibrus 6:10-12) Taswe, ?wanem samting i save halpem yumi blong tingbaot Bigfala Man ya we i Wokem yumi?
Sam Rod Blong Tingbaot Bigfala Man Ya We i Wokem Yumi
10. ?From wanem i stret nomo we waes man ya blong bifo i givim advaes blong givhan long yumi blong tingbaot Bigfala Man ya we i Wokem yumi?
10 Waes man ya blong bifo i naf blong givim advaes long yumi blong halpem yumi blong tingbaot Bigfala Man ya we i Wokem yumi. Waes man ya i bin prea long Jeova wetem fulhat blong hem, mo Jeova i ansa long ol prea ya taem hem i givim bigfala waes long hem. (1 King 3:6-12) Solomon i stadi gud long evri samting we ol man oli bisi blong mekem long laef blong olgeta. Mo tu, God i pusum hem blong raetemdaon olgeta samting we hem i faenem, blong ol tok ya oli save givhan long narafala man. Hem i raetem se: “Nao from we man ya we i waes gud long ol fasin blong wol ya, mo i save plante samting, hem i gohed, i stap tijim ol man long ol samting ya we hem i save. Hem i stap stadi gud long ol waestok, mo i stap luklukgud blong faenemaot se oli tru no oli no tru. Hem i stap traehad blong faenem ol toktok blong givhan, mo ol tok we hem i raetem long buk ya oli stret gud nomo.”—Prija 12:9, 10.
11. ?From wanem yumi mas akseptem waes advaes blong Solomon?
11 Grik Baebol ya Septuagint i tanem ol tok ya se: “Mo tu, prija hem i waes, hem i tijim man blong oli kam waes; nao bambae sora blong man i save faenem stret mining blong ol parabol, prija ya i mekem dip stadi blong faenem ol tok we oli naes mo hanraet we i stret—hemia ol wod blong trutok.” (The Septuagint Bible, we Charles Thomson i tanem) Solomon i traehad blong kasem hat blong ol man we oli ridim tok blong hem. Hem i yusum ol naesfala wod mo hem i tokbaot ol samting we oli rili pulum intres blong man mo we oli no blong nating. Ol tok blong hem we oli stap long Baebol oli kamaot tru long paoa blong tabu spirit, taswe, yumi save agri long olgeta samting we hem i faenem mo long ol waes advaes blong hem tu.—2 Timoti 3:16, 17.
12. Long prapa tok blong yu, ?olsem wanem yu yu save eksplenem tok blong Solomon long Prija 12:11, 12?
12 Nating se long taem blong Solomon i no gat mesin blong prentem buk, i gat fulap buk we man i save ridim. ?Wanem tingting we ol man long taem ya oli mas gat long saed blong olgeta buk ya? Solomon i talem se: “Ol tok blong ol waes man oli olsem sap stik we man blong lukaot long sipsip i stap karem blong stikim ol sipsip blong hem, mo oli save stap longtaem, olsem nil we man i hamarem i go insaed long wud, we i fas gud long hem. God i stap lukaot long yumi evriwan olsem we man blong lukaot long sipsip i stap lukaot long ol sipsip blong hem, mo hem nao i givim ol waestok ya long man ya. Mo las tok blong hem, hem i talem se, ‘Pikinini blong mi, i gat wan samting i stap we yu mas lukaot gud long hem. Bambae ol man oli stap raetem ol buk gogo i no save finis, mo sipos yu stap stadi tumas long olgeta oltaem, samting ya bambae i mekem yu yu taed gud nomo.”—Prija 12:11, 12.
13. ?Olsem wanem ol tok we oli kamaot long waes blong God, oli olsem stik, mo hu olgeta we oli olsem “nil we man i hamarem i go insaed long wud”?
13 ?Long wanem rod, tok blong olgeta we oli gat waes blong God i olsem stik we man blong lukaot sipsip i stap yusum blong stikim ol sipsip? Ol tok ya oli pulum ol man blong rid mo lesin blong oli mekem wok we i laenap wetem ol tok ya we oli ridim mo harem. Mo tu, olgeta we oli stap bisi wetem “ol tok blong ol waes man,” hemia ol tok we oli rili waes mo we oli gat mining, oli olsem “nil we man i hamarem i go insaed long wud,” oli strong gud. Hemia i tru from we gudfala tok blong ol man ya i kamaot long waes blong Jeova. Ol tok ya oli naf blong mekem man we i ridim no we i lesin long hem, i strong mo i stanap stret. Sipos yu yu wan papa no mama we i fraetgud long God, ?yu no ting se i impoten blong yu traehad blong putum waes ya long tingting mo hat blong pikinini blong yu?—Dutronome 6:4-9.
14. (a) ?Yumi mas lukaot blong no “stadi tumas” long wanem kaen buk? (b) ?Yumi mas putum tingting blong yumi i stap moa long wanem kaen buk, mo from wanem?
14 Be, ?from wanem Solomon i talem tok ya long saed blong ol buk? Hemia from we taem yu skelem tok blong Jeova wetem olgeta handred buk blong wol ya, ol buk ya oli fulap long waes blong man nomo. Bighaf blong ol tingting ya oli soemaot tingting blong Devel Setan nomo. (2 Korin 4:4) Taswe, sipos man i stap “stadi tumas” long ol buk ya blong wol, bambae oli no save givhan long olgeta blong longtaem. Tru tumas, man we i bitim mak blong ridim ol buk olsem, hem i save kam slak long saed blong spirit. I gud yumi mekem olsem Solomon, yumi mas tingting dip long wanem we Tok blong God i talem long saed blong laef. Samting ya bambae i mekem bilif blong yumi i strong mo bambae i pulum yumi i kam klosap moa long Jeova. Sipos yumi intres bitim mak long ol narafala buk no save blong oli tijim yumi, samting ya i save mekem yumi kam slak. Sipos ol hanraet ya oli kamaot long tingting blong wol we i no laenap wetem waes blong God, oli save spolem yumi mo brekem daon bilif we yumi gat long God mo ol stamba tingting blong hem. Taswe, i gud yumi tingbaot se beswan hanraet long taem blong Solomon mo long taem blong yumi, hemia ol hanraet we oli talemaot waes blong Jeova God, ‘man ya blong lukaot long sipsip.’ Hem i givim olgeta 66 buk blong Tabu Baebol, mo yumi mas tingbaot buk ya moa i winim ol narafala. Baebol wetem ol narafala buk we ‘slef’ i givim long yumi, oli givhan long yumi blong kasem “stret save blong God.”—Ol Proveb 2:1-6.
Olgeta Wok Blong God We Man i Mas Mekem
15. (a) ?Olsem wanem yu save eksplenem toktok blong Solomon long saed blong “olgeta wok we man i mas mekem”? (b) ?Yumi mas mekem wanem sipos yumi wantem mekem olgeta wok ya we man i mas mekem i go long God?
15 Waes man ya Solomon, i finisim toktok blong hem se: “Oraet, taem mi harem finis olgeta toktok, mi mi tok olsem, se: ‘Yu mas fraet gud long trufala God mo yu mas folem ol loa blong hem. From we hemia nao olgeta wok we man i mas mekem.’ From we trufala God hem wan bambae i jajem olkaen wok, mo wanem wok we i stap haed, blong luk sipos hem i gud no i nogud.” (Prija 12:13, 14, NW) Stretfala fasin fraet, no fasin blong tinghae, long Bigfala Man ya we i Wokem yumi, i save protektem yumi, mo ol famle blong yumi tu, blong yumi no ronem wan krangke fasin blong laef we i save karem bigfala trabol mo sore i kam long yumi mo famle blong yumi. Fasin fraetgud long God i klin gud mo hem i stat blong fasin waes mo save. (Ol Sam 19:9; Ol Proveb 1:7) Sipos yumi kasem fasin luksave we i kamaot long Tok we God i raetem tru long paoa blong tabu spirit, mo sipos yumi mekem ol advaes blong hem oli wok long olgeta haf long laef blong yumi, hemia nao yumi stap mekem “olgeta wok” ya blong God we man i mas mekem. Hemia i no minim se i gat wan lis blong olgeta samting we yumi mas mekem. Be, samting we yumi mas mekem hemia blong lukluk i go long Baebol taem yumi wantem winim sam problem long laef mo oltaem yumi mas mekem samting folem rod we God i wantem.
16. ?Wanem jajmen we bambae Jeova i mekem?
16 Yumi mas luksave se i no gat wan samting i haed long fes blong Bigfala Man ya we i Wokem yumi. (Ol Proveb 15:3) Bambae hem i “jajem olkaen wok.” Yes, Haefala God ya bambae i jajem olgeta samting, wetem ol samting ya tu we i haed long fes blong yumi ol man. Sipos yumi tingbaot samting ya oltaem, hemia i naf blong pusum yumi blong stap obei long ol loa blong God oltaem. Be, samting we i save gat moa paoa long yumi, hemia lav we yumi gat long Papa blong yumi long heven, from we aposol Jon i raetem se: “Sipos yumi lavem God, hemia i min se yumi stap folem ol tok blong hem. Mo ol tok blong hem i no strong tumas blong folem.” (1 Jon 5:3) Mo from we ol loa blong God oli blong mekem yumi harem gud oltaem, i stret nomo, mo i waes tu, blong folem olgeta. Hemia i no wan samting we i hadwok blong mekem sipos yumi gat lav long Bigfala Man ya we i Wokem yumi. Olgeta we oli lavem God oli wantem mekem olgeta wok ya we man i mas mekem i go long God.
Finisimgud Ol Wok We Yu Mas Mekem i Go Long God
17. ?Bambae yumi mekem wanem sipos yumi rili wantem finisimgud olgeta wok ya we man i mas mekem i go long God?
17 Sipos yumi waes mo yumi rili wantem mekem olgeta wok ya we man i mas mekem i go long God, bambae yumi no jes folem ol loa blong hem be bambae yumi fraet blong mekem hem i harem nogud. Yes, ‘fasin fraetgud long Jeova hemia stat blong fasin waes,’ mo olgeta we oli obei long loa blong hem oli gat ‘fasin luksave.’ (Ol Sam 111:10; Ol Proveb 1:7) Taswe, i gud yumi mekem ol samting long waes fasin mo yumi obei long Jeova oltaem. Hemia i impoten moa tede, from we King Jisas Kraes i stap finis, mo dei we bambae hem i jajem man long nem blong God, i klosap finis.—Matiu 24:3; 25:31, 32.
18. ?Wanem bambae i hapen long yumi sipos yumi mekem gud olgeta wok ya we yumi mas mekem i go long Jeova God?
18 Naoia God i stap lukluk laef blong yumi wanwan. ?Yumi laekem ol samting long saed blong spirit, no yumi letem ol tingting blong wol oli spolem fasin fren blong yumi wetem God? (1 Korin 2:10-16; 1 Jon 2:15-17) Nating sipos yumi yangfala no olfala, i gud yumi traehad fulwan blong mekem Bigfala Man ya we i Wokem yumi, i glad long yumi. Sipos yumi obei long Jeova mo folem ol loa blong hem, bambae yumi sakemaot olgeta samting blong olfala wol ya we bambae i lus. Nao bambae yumi sua moa blong kasem hop ya blong laef olwe long niufala wol we God i promes long hem. (2 Pita 3:13) !Hemia wan nambawan fiuja blong ol man we oli stap finisimgud olgeta wok ya we oli mas mekem i go long God!
?Bambae Yu Yu Ansa Olsem Wanem?
◻ ?From wanem yu save talem se i no olgeta samting evriwan we oli olsem nating nomo?
◻ ?From wanem wan yangfala Kristin i mas prea mo tingting gud long tabu wok blong God?
◻ ?Wanem kaen buk we bambae i no givhan nating long yumi sipos yumi “stadi tumas” long olgeta?
◻ ?Wanem ya “olgeta samting we man i mas mekem”?
[Tok Blong Pija Long Pej 20]
Ol man we oli mekem wok blong Jeova oli no luk olgeta samting long laef olsem we oli nating nomo
[Tok Blong Pija Long Pej 23]
Tok blong God i no olsem ol narafala buk blong wol ya, hem i givhan long man mo i mekem oli harem gud