Yu Mas Waes—Mekem Ol Samting We Yu Yu Lanem
1 Ol Man oli wantem se laef blong olgeta i kwaet, mo i hapi. Plante taosen buk mo magasin oli tokbaot olsem wanem blong mekem mared blong yumi i hapi, olsem wanem blong trenem pikinini, olsem wanem blong kasem plante vatu, olsem wanem blong mekem bodi i stap strong. Mo i gat buk long plante narafala samting bakegen blong givhan long ol man blong mekem laef blong olgeta i hapi. Sam advaes blong ol buk blong wol oli waes. Be bighaf blong ol man long wol, laef blong olgeta i no hapi mo i no kwaet. ?From wanem i olsem?
2 Yumi save faenemaot kwestin ya long Baebol long Proveb 1:7, we i talem se: “Taem wan man i fraet gud long Jeova, hem i stat blong kasem tru save. Fasin waes mo fasin blong stretem man, ol krangke man nomo oli no tingbaot samting ya.” Sipos wan man i no luksave we Jeova i stampa blong trufala save mo waes mo sipos hem i no ona long hem, man ya i no save hapi mo kwaet.
3 Ol man blong wol oli no gat plante samting long saed blong speret—oli stap hanggri nomo. Sore tumas, be samting ya i fol blong olgeta nomo, from we i gat fulap kakae long saed blong speret long olgeta ples long wol, we oli save tekem, i fri nomo. (Proveb 1:20, 21; Revelesen 22:17) From we ol man blong wol oli sakem waes blong Jeova, taswe oli stap wokbaot krangke long tudak long saed blong speret. (Proveb 1:22-32) Be ol man blong Jeova, oli no olsemia. Yumi stap ona long ol loa blong hem, mo yumi stap folem ol rul blong hem. Taswe yumi no hanggri long saed blong speret, mo yumi hapi tu. (Aesea 65:13, 14) Mo tu, fasin blong laekem ol man i stap fulap long ogenaesesen blong God, mo samting ya i soemaot se olgeta long ogenaesesen ya oli tru disaepol blong Kraes. (Jon 13:35) Yes, ol Wetnes blong Jeova we oli stap olbaot long wol olsem wan bigfala famle, oli soemaot klia se i waes blong folem wan rod nomo: Blong obei long ol tijing blong Baebol.
4 Be i gat sam we oli stap long ogenaesesen blong Jeova we oli no hapi fulwan. Samtaem, oli save spolem glad blong ol narafala raonabaot long olgeta from ol samting we oli talem mo ol samting we oli mekem. ?Olsem wanem samting ya i save kamaot? From we olgeta oli no stap mekem ol samting we God i talem se oli waes long laef blong olgeta. Maet oli kam long ol miting, ol seket asembli, mo ol distrik asembli tu. Maet oli ridim ol buk mo magasin blong Sosaete. Be fasin blong laef blong olgeta mo ol samting we oli mekem long ol narafala man, mo long ol narafala Kristin tu, oli soemaot se oli no stap mekem ol samting we oli lanem. ?Olgeta oli mas mekem wanem? Olgeta oli mas traehad blong “planem fasin we tabu speret i wantem.” Sipos oli mekem olsemia, oli save mekem laef blong olgeta i rili hapi, mo oli save mekem laef blong ol man raonabaot long olgeta i hapi tu.—Galesia 6:7, 8.
Mekem Wanem
5 ?Sipos yumi kam slak long saed blong speret, yumi no stap lukaot long ol samting we yumi save foldaon long hem. Mo sipos yumi letem Setan no wol no bodi blong yumi i winim yumi, yumi save lusum glad we yumi gat taem yumi stap kolosap long Jeova. Nao yumi nidim blong wekap moa, blong mekem ol samting we yumi stap lanem long ol miting mo ol asembli, mo blong harem ol narafala advaes we i kamtru long ogenaesesen blong Jeova tu. Wol ya i nogud, mo hem i stap jenis oltaem. Hem i save mekem yumi foldaon, taswe yumi mas stap rere blong harem ol advaes we Jeova i givim from lav blong hem. Yumi mas luksave se ol advaes ya we “Slef we i stret mo waes” i givim, i olsem kakae long stret taem nomo.—Matyu 24:45-47.
6 Long program blong nekiswan spesel dei blong asembli blong yumi, i gat plante gudfala save blong givhan long yumi blong stanap strong long saed blong speret. Bambae i gat plante gudfala advaes blong givhan long yumi blong winim ol samting we oli save mekem yumi slak: ol samting we i save mekem tingting blong yumi i foldaon, wol ya we i pulum yumi blong mekem ol samting we yumi nomo i wantem, mo ol samting we oli save pulum yumi blong westem taem blong yumi nomo. ?Yumi stap harem ol gudfala advaes blong trastem Jeova mo ol rod blong hem fulwan? ?Yumi luksave tiokratik oda we hem i putumap, mo yumi stap ona long hem? ?Yumi traehad blong mekem tingting blong yumi i stap daon mo kasem kwaet fasin? ?Yumi stap yusum evri jans we yumi kasem blong go moa long saed blong speret? (Maeka 6:8; Efesas 5:15, 16; Hibrus 6:10; 13:17) ?Olgeta long famle, oli stap givhan long olgeta blong wokem ol Kristin fasin long laef blong olgeta? Ol advaes we yumi kasem long Baebol oli mas gat paoa long ol pleplei we yumi jusum, ol fasin blong yumi wanwan, mo ol samting we yumi mekem evri dei. Sipos yumi no traehad blong mekem ol samting we yumi stap lanem, yumi no save gohed long saed blong speret. From samting ya, bambae tingting blong yumi i no save stap kwaet, mo yumi no save hapi fulwan.—Filipae 4:7-9; Jemes 1:22-25.
7 Yumi nidim blong traehad moa blong stadi wanwan, mo long famle tu. Buk ya Watchtower publications Index i save givhan long yumi blong faenemaot olsem wanem blong mekem ol loa blong Baebol oli wok long laef blong yumi. Buk ya, Young People Ask hem i wan nambawan buk we ol papa mama oli save yusum blong givhan long ol pikinini blong olgeta blong winim ol traem we wol blong Setan i stap sakem long olgeta. Sipos yumi traem kasem save ya, yumi save kasem tingting blong Jeova long ol kwestin ya, nao ol stret loa blong hem oli save lidim yumi. Sipos yumi no mekem olsemia, yumi olsem wan man we hem i sik, mo dokta i givim meresin long hem blong winim sik ya, be hem i no dring meresin ya. Nating we hem i save se meresin ya i save winim sik blong hem, be hem i livim i stap nomo. Nao stadi blong yumi wanwan mo stadi blong famle i save mekem bilif blong yumi i kam strong moa, mo i save givim paoa long yumi blong stanap strong longtaem. Long rod ya, sipos yumi kasem sam traem, bilif blong yumi i no save kam slak, mo yumi no save foldaon.—Matyu 13:6; Luk 8:13; Hibrus 2:1.
8 Ol elda mo ol ol man blong givhan oli mas givim gudfala eksampel long saed blong fasin blong lukaot long famle blong olgeta. Hemia i min se oli mas givhan long waef mo ol pikinini blong olgeta blong mekem ol samting we oli stap lanem long Tok blong God mo long ogenaesesen blong hem. Long fasin ya, oli save stap strong long saed blong speret, mo famle blong ol i save soemaot gudfala eksampel long saed blong Kristin fasin. Oli save leftemap tingting blong olgeta man insaed long kongregesen blong gohed, mo pulum samfala afsaed long kongregesen tu.—Efesas 6:4; 1 Timote 3:4, 12, 13.
?Givhan Long Hu?
9 Plante we oli kam long Memoriol evri yia oli nidim we yumi givhan moa long olgeta blong mekem ol samting we oli stap lanem mo blong joen wetem olgeta long ogenaesesen blong Jeova. Yumi save soemaot lav long olgeta we yumi stap stadi wetem olgeta, sipos yumi tijim olgeta long rod blong mekem ol rul blong Baebol oli wok long laef blong olgeta, mo long rod blong folem ol stret loa blong God. Yumi mas soemaot se yumi kea long olgeta we bambae oli kam brata mo sista blong yumi.
10 Sipos i gat sam long kongregesen we oli no prij evri manis no oli no bin prij long ol las sikis manis, yumi mas traem givhan long olgeta blong luksave se i impoten tumas blong joen oltaem long ol samting we ogenaesesen blong Jeova i mekem. Olgeta oli nidim blong kasem bakegen sem glad mo pis we oli holem bifo, taem oli bin wosip long Jeova fulwan. (Jon 13:17) Long fasin kaen gud, yumi save givhan long olgeta blong wokem tangkyu bakegen long hat blong olgeta. Yumi save givhan long olgeta blong “presem God” bakegen, from we taem yumi mekem olsem, “i olsem we yumi givim presen i go long God.” Olsem ya nao, olgeta oli save mekem ol samting we oli stap lanem, mo oli save stap wokbaot long rod ya we i blong go kasem laef.—Hibrus 13:15, NW; Luk long Our Kingdom Service, (Engglis) Jun 1979, pej 7, mo Febuwari 1977, pej 3.
11 Ogenaesesen blong Jeova i stap spid, mo ol man blong God oli mas stap kolosap long ogenaesesen ya. Yumi no mas letem tingting blong yumi i kam slak, we yumi no moa traehad blong go moa long saed blong speret. Yumi mas stap strong long saed blong speret oltaem. Yumi mas stadi long ol nyufala save we ogenaesesen blong God i stap givim long yumi, mo yumi mas mekem olgeta oli wok long laef blong yumi. Blong mekem olsemia, yumi mas traehad, mo samtaem yumi mas rere blong fogetem sam samting we yumi nomo i wantem. Be Jeova i no save askem wan samting long yumi we yumi no naf blong mekem. Hem i wokem yumi, taswe hem i save wanem samting i gud long yumi. Yumi waes sipos yumi letem Jeova i lanem yumi, mo yumi gohed blong mekem ol samting we yumi stap lanem. Samting ya bambae i presem God, mo bambae i givim blesing long yumi blong olwe.—Aesea 48:17; 54:13.