Presem Nem Blong God Fulwan
1 !Yumi glad tumas long ol blesing we Jeova i givim! Long Vanuatu, long sam manis long tiokratik yia ya, yumi kasem nyufala namba blong pablisa, paenia, mo Baebol stadi. Mo tu, i gat 1,126 man oli kam long Memoriol long yia ya. Long sam kantri long wol, plante taosen pablisa oli bin go long sam spesel asembli. Mo yumi evriwan i harem gud long fulap kakae long saed blong speret we yumi kasem long seket asembli mo spesel dei blong yumi. Mo yumi kasem plante narafala blesing tu.
2 ?Olsem wanem yumi save soemaot tangkyu long Jeova from ol samting we hem i mekem long yumi? !Yumi save presem nem blong God fulwan!—Sam 145:21.
GOHED BLONG PRESEM NEM BLONG GOD
3 ?Olsem wanem yumi save presem nem blong Jeova fulwan long manis ya Ogis? Bambae yumi gohed blong seremaot ol buklet. Taem yumi prij yumi mas karem defren kaen buklet wetem yumi, mo yumi mas rere gud fastaem. Olsem nao, bambae yumi gat evri samting we yumi nidim blong presem Jeova. Mo ating yumi save lanem long narafala olsem wanem blong presem hem tu.
4 Stampa Tok blong manis ya se: “Nyufala Wol—?Bambae Hu i Mekem?” I gud we yumi mekemrere sam gudfala fas tok we oli stanap long pej 9 kasem 15 blong Reasoning buk. Sam man oli glad blong storeyan wetem yu olsem wanem ol lida blong wol oli stap mekem plan blong wol i kam moa gud. Bighaf blong ol man long wol oli wantem pis. Be Jeremaea 10:23 i soemaot se man i no naf blong stretem ol trabol blong hem. God i promes finis se bambae hem i mekem wan samting blong stretem ol trabol long wol. Promes ya i stap long Baebol long 2 Pita 3:13. Yumi save se promes ya i no save lus. Mo samting ya i save leftemap tingting blong man.
RERE GUD
5 Blong tijim gud ol man, i impoten tumas we yumi rere gud. Yumi save mekemrere toktok blong yumi wetem ol narafala long famle, wetem hemia we i tijim yumi long trutok, no wetem wan man long buk stadi blong yumi. Sipos yu ripitim Stampa Tok Blong Prij fastaem, bambae yu harem we i isi nomo blong toktok wetem ol man. Mo bambae yu soemaot yu rili bilivim samting we yu stap talem long olgeta.
6 Storeyan blong yumi i mas soemaot long ol man se yumi intres long olgeta. Makem long tingting blong olgeta we Baebol i promes se bambae i gat wan nyufala wol. Samting ya i save givim hop mo leftemap tingting blong ol man we oli harem nogud. Sipos man blong haos i karem wan buklet, yu save soemaot long hem olsem wanem blong mekem Baebol stadi. No maet yu ting se i moa gud blong soemaot samting ya long hem taem yu visitim hem bakegen.
7 Yumi stap kam kolosap nao long en blong impoten tiokratik yia ya. !Mo yumi glad tumas we Jeova i stap givim fulap blesing long yumi! Yumi evriwan i mas yusum ol manis we oli stap yet long 1991 tiokratik yia blong presem nem blong Jeova fulwan. Semtaem, yumi stap wet long nyufala wol blong hem, we bambae yumi save mekem wok blong Jeova foreva.