Mekem Wok Blong Prij Wetem Olgeta Sol Blong Yu
Haf 2: Toktok Blong Yumi i Soemaot We Yumi Glad
1 Taem yumi laekem wan wok, i isi blong glad long hem. Mo tu, i tru se kolosap evritaem man i laekem wok we hem i rere gud long hem fastaem. Samting ya i tru tu taem yumi traehad blong mekem fulwan olgeta wok we God i givim long yumi.—2 Tim. 4:5.
YUMI MAS RERE GUD
2 ?Yumi rere gud long ol toktok blong yumi fastaem? ?Yumi stap go oltaem long wok blong prij? Tufala samting ya i impoten tumas sipos yumi wantem stap glad long wok blong prij. Eksampel: Sipos yumi prij long wan man we hem i talem se hem i Kristin finis, ?bambae yumi talem wanem long hem? Wan pablisa we hem i rere gud fastaem, ating hem i talem olsem: “Mi mi glad blong harem samting ya. From we yu yu Kristin finis, yu yu save we Jisas tu hem i mekem wok olsem we mifala i stap mekem. Hem i visitim ol man long ol haos blong olgeta, mo hem i talemaot long ol disaepol blong hem se olgeta tu oli mas mekem wok ya. ?Yu yu save wanem we oli talem long ol man taem oli prij bifo? [Wet long ansa.] Hemia nao samting we mifala i wantem storebaot wetem yu tede.” Nao yu save ridim Luk 8:1 no Daniel 2:44. Long rod ya nao, yu save statem wan gudfala storeyan.
3 Yumi save yusum haf ya long Reasoning buk we nem blong hem se: “Ol Toktok Blong Blokem Storeyan” (Conversation Stoppers). Ol save long ol pej ya i save givhan long yumi olsem wanem blong ansa long ol man we oli talem se oli gat wan skul finis.
4 Mo tu, long Reasoning buk i gat wan gudfala haf long saed blong ol fas tok. I gud we yumi traem yusum sam. Ating samtaem yumi mas jenisim toktok blong yumi lelebet blong mekem i stret long ol man wanwan. Long plante haf long Reasoning buk, long en blong olgeta i talem se: “Sipos Man i Talem Olsem” (If Someone Says). Hemia i soemaot olsem wanem blong ansa long sam kwestin we man i save askem long ol poen ya. Ol save ya i gud tumas. Be sipos yumi no yusum olgeta taem yumi mekemrere gud ol toktok blong yumi, oli no save givhan.
OLSEM WANEM BLONG RERE GUD
5 Long Miting blong Kingdom Wok, plante taem ol brata oli yusum sam buk long tok blong olgeta. I gud we yumi karem ol buk ya oli go long miting blong folem ol poen long ol tok mo ol pleplei. Long rod ya, taem ol narafala oli mekem wan tok we oli reremgud, yu save kasem moa frut from.
6 I gud yumi spenem sam taem blong rere gud long wok blong prij. Jekemap sipos yu pem finis ol buk we yu nidim. Nao yu save yusum sam menet blong lukluk bakegen long Stampa Tok Blong Prij. Tingbaot ol vas we yu mas yusum, mo lukaot sam poen long ol buk we yu save tokbaot. I gud sipos olgeta evriwan long famle i joen blong mekem samting ya.
7 Mekem sam pleplei. Yu save jusum ol defren taem blong mekem olsem: Biaen long Buk Stadi, taem yu joen wanples wetem sam fren blong yu, taem yu stap ron long trak blong go prij, mo taem yu livim wan haos nao yu wokbaot blong go long nekiswan haos. Taem yumi mekem sam pleplei mo yumi storeyan mo soemaot olsem wanem blong ansa long sam toktok we man i sakem long yumi, yumi save harem gud. Mo samting ya i save mekem se yumi gat gudhan long wok blong prij.
8 Sipos yumi traehad blong rere gud oltaem long wok blong prij, bambae yumi glad long wok blong yumi. Olsem nao, yumi save kam man blong wok we yumi gat gudhan long wok ya. Mo bambae yumi harem gud from.—Jon 2:17.