Mekem Moa Tiokratik Wok Long Taem Blong Spel Blong Yumi
1 Yumi mas plan fastaem sipos yumi wantem se taem we yusum i soem se yumi mekem wan samting. Stat long manis Novemba, yumi kam long taem blong ol holidei, oltaem yumi gat taem blong mekem sam wok blong yumi nomo. ?Wanem plan yumi save mekem naoia blong yusumgud taem blong yumi long wan tiokratik fasin?
2 Wan bigfala namba blong ol man we oli intres oli bin kam long Memoriol. Oli nidim bigwan help blong yumi blong oli gohed long saed blong speret. Bambae i wan blesing blong olgeta sipos yumi visitim olgeta mo mekem plan blong statem baebol stadi wetem olgeta.
3 Plan blong holidei long aelan blong visitim ol fren mo famle i gud tumas. Samting ya i save givim moa jans blong holem jans blong prij. Blong mekem plan fastaem i min se yumi mas askem long Sosaeti weples yumi save go long hem, wanem aelan bambae yumi visitim mo ol narafala samting we yumi wantem lukaot long hem blong mekem visit blong yumi i gudwan. Yumi nidim blong karem plante buk long Bislama maet yumi save tingbaot moa blong seremaot Trutok buk wetem ol olfala magasin long Bislama. Yumi save mekem plan blong wan trep i go long aelan blong yumi wetem sam narafala pablisa. Raetemdaon gud ol frut we yumi kasem mo yumi save raetem wan gudfala ripot long Branj Ofis long wanem wok we yumi bin mekem. Hemia wan gudfala rod blong haremgud long plante ekspiryens.
4 Oltaem ol yangfala oli glad long spel blong olgeta. I tru se taem blong spel blong pleplei i gud long olgeta, ?be sam long ol fri taem ya oli save yusum blong joen moa long wok blong prij? Ol papa mama oli save stat naoia blong halpem ol pikinini blong olgeta blong mekem sam plan. Maet ol pikinini blong ol defren famle oli save mekem plan tugeta blong oli stap prij wanples. Evriwan long famle oli save mekem haftaem paenia taem oli stap visitim ol aelan.
5 Plante oli kamaot long ol defren aelan long Vanuatu taswe i wan gud taem blong plan blong givim wetnes long ol ples olsem we oli stap longwe. Mekem sua blong raet long Sosaeti blong save wanem yu save mekem mo hamas dei no wik yu wantem stap. Maet sam fultaem paenia oli save kam wetem yu blong statem wok long sam eria blong mekem intres blong Kingdom i go moa.
6 Plante yangfala oli jes finis long skul no bambae oli finis skul i no longtaem. From samting ya oli wari bigwan long fyuja blong olgeta. Ol yangfala we oli mekem plan long fyuja blong kasem sam tiokratik mak bambae oli kasem blesing from. (1 Jon 2:15-17) Wan desisin blong mekem fultaem paenia i wan rod blong gat wan gudfala laef mo kasem plante spesel blesing.
7 Plante long yumi bambae oli gat moa fri taem. Yumi mas wok wetem waes fasin, ‘yumi mas yusum evri jans we yumi gat.’ (Efes. 5:15, 16) Ol plan we oli pulum yumi blong bisi long wok blong Jeova bambae oli givim blesing blong olwe long yumi mo long narafala.—1 Tim. 4:15, 16.