Ansa Long Wan Kwestin

◼ Olsem wanem elda we i lukaot long wok blong prij i save givhan long ol man blong givhan we oli stap lukaot long ol buk mo ol magasin?

Wok blong elda we i lukaot long wok blong prij i no blong visitim olgeta grup wanwan long ol defren manis mo blong putum plan long ol miting blong prij nomo. Elda ya we i wok strong hem i intres tumas long olgeta samting we oli save spolem wok blong prij long teritori blong kongregesen blong i no gohed gud.

Hem i mas mekem sua se evri manis kongregesen i gat ol buk mo ol magasin blong yusum long wok blong prij mo oli luk stretgud. Hem i givhan tu long ol responsabiliti blong ol man blong givhan we oli lukaot long ol buk mo ol magasin.

Elda we i lukaot long wok blong prij i mas luklukgud long ol advaes long Kingdom Wok Blong Yumi long ol buk we bambae yumi seremaot long ol manis we bambae oli kam. Hem wetem brata we i lukaot long ol buk bambae tufala i wok tugeta blong mekem sua se i gat plante buk blong yusum, be oli mas lukaot se oli no mas askem plante tumas. Sipos i gat wan buk we i fastaem blong hem blong seremaot long wok blong prij no sipos i no longtaem kongregesen i mas stadi long hem, oli mas tingbaot samting ya taem oli mekem oda i go long Sosaeti. Sipos oli bin seremaot buk ya bifo, ripot blong wok blong prij long kongregesen bambae i soemaot sipos stok we i stap i naf. I tru, oli mas tingbaot tu namba blong ol pablisa we bambae oli mekem haftaem paenia long manis mo tu namba blong ol pablisa mo ol fultaem paenia we oli bin prij lastaem taem oli seremaot buk ya mo olsem wanem namba ya i gru. Ol brata oli mas rere blong givimaot ol buk bifo mo afta long ol miting blong kongregesen. Oli mas stokemgud ol katon blong buk long ol ples we i klin mo drae blong mekem se oli no save kam nogud.

Elda we i lukaot long wok blong prij bambae i givhan tu long brata we i lukaot long ol magasin. Sam samtaem, elda we i lukaot long wok blong prij mo brata we i lukaot long magasin oli save skelem namba blong ol magasin we kongregesen i stap oda long hem evri manis wetem namba blong ol magasin we oli stap seremaot long wok blong prij. Ating sam pablisa oli mas daonem oda blong olgeta sipos oltaem oli gat plante magasin we oli stap long haos blong olgeta. I gud blong no westem ol magasin.

Wetem sem tingting ya, elda we i lukaot long wok blong prij i mas jekem hamas buk we kongregesen i mekem oda long olgeta we oli stap long Pepa Blong Oda (S-14). Afta nomo bambae hem i save givim pepa blong oda i go long sekretari blong kongregesen, we hem bambae i jekemgud bakegen ol narafala samting long papa ya, mo savegud namba blong ol spesel oda we oli stap long lis.

I tru, i gat sam pepa wok blong mekem long saed blong ol buk mo ol magasin. Sipos ol brata we oli lukaot long ol buk mo ol magasin oli gat sam kwestin long saed long ol pepa we oli mas fulumap, sekretari bambae i glad blong givhan long haf ya long wok blong olgeta.