Miting Blong Kingdom Wok Blong Ogis

Wik We i Stat Long Ogis 3

Singsing 92

10 menet: Lokol mesej mo sam Advaes we oli kamaot long Kingdom Wok Blong Yumi. Tokbaot sam poen long ol nyufala magasin. Leftemap tingting blong evriwan blong joen long wok blong prij long wiken ya.

15 menet: “Ol Fastok Blong Wekemap Intres.” Tok wetem kwestin mo ansa. Mekem pleplei long ol bigfala poen long haf 5.

20 menet: “Wok Wetem Positif Tingting Blong Gohed Moa.” Mekem tok long tufala faswan haf. Tokbaot ol narafala haf wetem kwestin mo ansa. Talemaot sam poen we oli save mekem i wok long ples blong yumi. Finisim wetem wan smol tok blong tingtingbak.

Singsing 65 mo laswan prea.

Wik We i Stat Long Ogis 10

Singsing 151

10 menet: Lokol mesej, ripot blong kaon mo tokbaot ol presen mane we ol brata sista oli givim. Talem tangkyu long kongregesen from presen mane we oli givim blong sapotem kongregesen, mo wok blong Sosaeti long olgeta ples long wol.

20 menet: Wokem Intres i Gru Long Ol Visit Bakegen. Elda we i lukaot long wok blong prij i mekem tok ya. Plante oli glad blong toktok wetem ol man mo livim sam buk long olgeta. (om pej 87-88) Yumi gat responsabiliti ya blong wokem intres we i stap long hat blong olgeta man we yumi tok long olgeta i gru. Mekem wan sot pleplei blong soemaot olsem wanem yumi save yusum wan traket blong wokem intres long wan visit bakegen long ples we yumi livim wan buk long hem. Makem wan no tu bigfala poen nomo. Mekem wan smol pleplei blong soemaot olsem wanem ol poen we yumi save faenem long indeks blong Reasoning buk oli gud blong yusum tu. Tokbaot sam stret poen we oli stap insaed long buk we yumi save yusum blong mekem intres long saed blong Baebol i gru. Soem olsem wanem blong mekem plan blong narafala visit bakegen.

15 menet: “Bigfala Babilon.” Tok i stanap long Reasoning buk, pej 49-53 (42-46). Pleplei: Pablisa i toktok wetem Baebol studen blong hem long fasin blong hem blong gohed. Pulum hem blong luksave se hem i mas tabu long ae blong Jeova, we hem i naf blong kasem help mo blesing blong Jeova. (1 Pita 1:​15, 16) Tokbaot from wanem i impoten blong kamaot long Babilon mo joen wetem tabu ogenaesesen blong Jeova. Jeaman i save finisim tok blong hem long wan fasin we i leftemap tingting blong ol brata blong yusum ol buk blong givhan long ol studen blong kam insaed long ogenaesesen mo haremgud tu long help blong ol elda.

Singsing 129 mo laswan prea.

Wik We i Stat Long Ogis 17

Singsing 113

15 menet: Lokol mesej. Tiokratik Nyus. Tokbaot haf ya “Laef Wetem Klia Tingting Mo Stret Fasin.” Mo tu, leftemap tingting blong evriwan blong joen long wok blong prij long wiken.

20 menet: “Wok Strong Blong Mekem Ol Visit Bakegen.” Kwestin mo ansa. Afta we yu tokbaot haf 5 mo 6, mekem tu pleplei. (1) Soem olsem wanem oli save yusum traket blong statem wan Baebol stadi. (2) Jusum sam poen long Reasoning buk mo soemaot olsem wanem oli save yusum ol poen ya blong ansa long kwestin taem oli mekem wan visit bakegen. Soemaot from wanem i impoten blong mekem pleplei long haos blong talem bakegen plante taem fastaem. Leftemap tingting blong evriwan blong lukaot long ol man we oli intres.

10 menet: Tok long haf ya “?Yu Yu Rimemba?” we i kamaot long Wajtaoa Epril 15, 1992 (Engglis mo Franis). Leftemap tingting blong evriwan blong gat wan gudfala program blong ridim ol magasin. Talem sam advaes we i save wok.

Singsing 14 mo laswan prea.

Wik We i Stat Long Ogis 24

Singsing 129

5 menet: Lokol mesej.

15 menet: “Gat Gudhan Blong Prij Long Ol Haos Wanwan.” Tok wetem kwestin mo ansa. Leftemap tingting blong evriwan blong tingbaot wok blong haftaem paenia long manis Septemba. Talem se olgeta we oli mekem haftaem paenia oltaem oli stap holem wan fasin blong wok we i antap, long olgeta manis we oli kam biaen.

15 menet: Sanem Ol Pikinini Blong Yufala Long Skul Wetem Tingting Blong God Long Hat Blong Olgeta. Wan elda i mekem tok ya. Yumi stap laef long wan wol we i stap go long wan rod we i kruked mo hem i traem blong pulum yumi blong stap insaed long hem. Mo samting ya i tru moa long ol yangfala blong yumi. Ol papa mama oli nidim blong kasem save long nid mo problem blong olgeta yangfala. (Prov. 20:⁠5) Ol papa mama oli mas soem lav long ol pikinini mo tijim loa mo lav blong God long olgeta. Pleplei: Famle i tokbaot olsem wanem blong yusum buklet ya School. Wan pikinini we fastaem blong hem blong go long skul, be tufala nara pikinini oli bin go long skul sam yia finis. Jusum sam poen we i save wok we i laenap wetem wanwan long olgeta. Letem pikinini i yusum prapa tok blong hem blong toktok long papa mama we long pleplei ya oli stap olsem tija. Mekem sua se ol pikinini oli kasem save long stampa tingting we i laenap wetem hem. Brata we i mekem tok i leftemap tingting blong famle blong mekem famle Baebol stadi mo tokbaot we i nidim blong papa mama i stap kolosap mo gat gudfala fasin fren wetem pikinini.

10 menet: “Yusum Laef Foreva Buk Long Ol Visit Bakegen.” Tokbaot ol poen long tufala fas haf. Mekem wan pleplei long wan visit bakegen we oli askem stret sipos oli wantem Baebol stadi.

Singsing 32 mo laswan prea.

Wik We i Stat Long Ogis 31

Singsing 160

5 menet: Lokol mesej.

15 menet: ?Yu Yu Stap Gohed Long Saed Blong Speret? Wan elda i mekem tok ya. ?Olsem wanem, olgeta long kongregesen oli gat sam stret mak we oli kasem long sevis yia we i pas? ?Sipos no, from wanem? Tokbaot sam mak we oli save kasem. Fasin blong stap gohed hem i givhan blong stapgud long saed blong speret. (Fil. 3:16) Pleplei we i soemaot wan famle, long taem blong famle stadi, oli stap luk bakegen long prapa minista wok blong olgeta blong luksave weples oli save gohed moa long hem long saed blong speret.

10 menet: Lokol nid no wan elda i tokbaot wok blong prij long kongregesen.

15 menet: Givimaot Creation buk long Septemba. Tok wetem pleplei. Tokbaot ol poen we yumi save yusum mo ol pija we yumi save soemaot taem yumi givimaot Creation buk. Ol poen long Reasoning buk aninit long stampa tok ya “Creation” oli gud blong yumi yusum. No ating ol poen long japta 16 mo 19 long Creation buk aninit long stampa tok ya “From Wanem God i Letem Fasin Nogud i Stap?” mo “Wan Wol Olsem Paradaes Bambae i Kam i No Longtaem” oli save givhan long man blong haos. Yusum sam pablisa we oli gat gudhan blong soemaot olsem wanem blong seremaot buk ya, taem oli yusum Proveb 2:​21, 22 mo pija we i stap long pej 197, soemaot ol bigfala poen se plan blong God fastaem blong wokem wol ya i no longtaem bambae i kamtru.

Singsing 218 mo laswan prea.