Wok Wetem Positif Tingting Blong Gohed Moa
1 Ating naoia plante long yumi oli ridim finis Yearbook blong 1992. !Taem yumi kasem save namba blong ripot blong 1991 we i kasem fo mo haf milyan pablisa blong Kingdom long 211 aelan long wol, we i mekem 6.5% antap, samting ya i mekem hat blong yumi i glad tumas! I tru tumas, wok blong Kingdom we i go antap raon long wol, i mekem profet tok blong Aesea 2:2-4 mo Maeka 4:1-4 oli kamtru klia.
2 Nating se ripot blong 1992 servis yia i no kamaot fulwan yet, i gat klia pruf, se Jeova i stap mekem wok i gru bigwan moa long yia ya. Yumi stap gohed blong singaot long ol man blong joen long famle blong ol brata long olgeta ples long wol. Namba blong ol man we oli kam long Memoriol mo long distrik asembli, i soem se plante milyan man oli stat lesin long mesej blong Kingdom. Long olgeta nesen, ol man oli ansa long tok we i singaot olgeta se: “Yufala i kam, blong yumi go antap long bigfala hil blong Jeova, long haos blong God blong Jekob. Mo hem bambae i tijim yumi long ol fasin blong hem, mo bambae yumi wokbaot long ol rod blong hem.”
3 Gat Strong Tingting Blong Gohed: Ogenaesesen blong Jeova i stap gohed. Wetem plante nyuwan we oli stap go antap long hil blong tru wosip blong Jeova, i impoten we olgeta wanwan oli wok wetem positif tingting blong gohed moa long saed long speret mo afta oli save halpem ol nyuwan blong oli mekem sem mak. Blong soem nid blong olgeta oli gohed moa, tok ya we i singaot olgeta blong kam antap long hil blong Jeova i talem se olgeta oli mas talem long ol narafala tu se “Yu kam.” Aposol Jon i tokbaot wan samting we i lelebet sem mak long Revelesen 22:17: “Tabu speret wetem hemia we i olsem Woman blong Kraes, tufala i talem se ‘Yu kam.’ Mo olgeta evriwan we oli harem tok ya, oli mas talem olsem tu, se ‘Yu kam.’
4 Jisas i soemaot olsem wanem oli mas mekem fasin ya blong singaotem ol man. Taem ol man oli lesin long tijing blong hem, hem i invaetem olgeta blong joen long minista wok blong hem mo hem i tijim olgeta olsem wanem blong mekem. (Mat. 4:19; 10:5-7, 11-14) Ol disaepol blong hem oli lanem gudfala fasin we hem i stap yusum taem oli go wetem hem mo oli lukluk olsem wanem hem i mekem ol samting. Afta nao, oli mekem minista wok blong olgta i folemgud hemia blong Jisas. Oli lanemgud ol fasin blong hem mekem se oli no fraet blong prij nao samting ya i pulum tingting blong ol man we oli stap agensem olgeta, nao oli luksave se oli disaepol blong Jisas. Ol Wok 4:13 i talem se: “From we oli luk we Pita mo Jon, tufala i no seksek nating, . . . Nao oli luksave we bifo tufala i stap kampani wetem Jisas.”
5 Bifo hem i go antap long heven, Jisas i givim oda ya se ol disaepol blong hem bambae oli gohed long Kristin minista wok blong mekem ol nyu disaepol, tijim olgeta olsem we olgeta tu oli bin lanem. Long Matyu 28:19, 20, Jisas i givim oda ya: “From samting ya, yufala i mas go long ol man long olgeta ples long wol, blong pulum olgeta oli kam man blong mi. . . . Mo yufala i mas tijim olgeta blong oli folem olgeta tok ya we mi mi givim finis long yufala.” Blong soemaot se samting ya i mas gohed kasem taem blong yumi, Jisas i givim tru promes long olgeta se: “Mo yufala i mas save, bambae mi mi stap wetem yufala oltaem, gogo wol ya i finis.”
6 Ol tru disaepol blong Jisas Kraes oli no slak blong obei long rul ya blong tijim ol nyu disaepol long olgeta tok ya we hem i givim finis long olgeta. Be, namba we i stap kam antap long ol kongregesen blong ol Wetnes blong Jeova long olgeta ples long wol i soem se yumi mas luksave nid blong ol nyu memba blong kongregesen we oli jes baptaes, ol pablisa we oli no baptaes yet mo tu ol man we oli stap stadi Baebol wetem yumi mo we oli stat blong kam long ol miting blong kongregesen.
7 Long stat blong 1992 sevis yia, i gat samting olsem: long 9 pablisa i gat 1 nomo we i bin joen long minista wok long wan yia nomo. Antap moa, 1 long evri 6 pablisa i bin prij long tri yia no daon moa; mo 1 long evri 4 pablisa i bin stap joen long minista wok i no bitim faef yia. Nating se i gat plante nyuwan we oli stap gohedgud stat taem oli kam memba blong kongregesen, fasin blong givhan long olgeta, bambae i halpem olgeta blong gohed kwik moa long saed long speret.
8 Hibrus 6:1 i leftemap tingting blong evriwan blong “i gud yumi stap gohed kwik blong yumi kam bigman.” (NW) Kristin fasin blong kam bigman long saed long speret i go moa bitim we yumi jes putum nomo ripot long wok blong prij. Hem i minim tu yumi mas gohed long stadi wanwan, go oltaem long ol miting mo tu joen oltaem long wok blong prij. Hem i minim tu fasin blong halpem ol narafala blong kasem save long trutok we i save sevem laef blong man. Yumi mas traehad blong gat gudhan moa blong yusum ‘ol tok blong Baebol’ blong storeyan wetem ol man. Gru blong kam bigman long saed long speret i nidim taem, mo i dipen long fasin blong yumi blong fasgud long God mo ekspiryens we yumi kasem long wok blong prij. Nating se yumi save jusum se fasin fasgud blong yumi long God i dip olsem wanem, be hem i waes blong letem ol narafala brata sista we oli bigman long saed long speret, oli halpem yumi blong kasem ekspiryens we i wok. Yumi save lanem sam samting from ekspiryens blong olgeta, i tru moa long wok blong prij. Yumi no nidim blong lanem evri samting from ol mastik we yumi mekem nomo.
9 Halpem Olgeta We Oli No Gat Ekspiryens: Eksampel blong halpem ol narafala i stanap long stat blong Kristin kongregesen. Jisas i bin tijim ol disaepol blong hem. (Mak 3:14; Luk 9:1; 10:1) Biaen nao, olgeta i tijim ol narafala. Timote i kasem ol tok blong leftemap tingting blong hem long aposol Pol, mo disaepol Apolos i gohed from Akwila mo Prisila we tufala i gat moa ekspiryens oli givhan long hem. (Wok 18:24-27; 1 Kor. 4:17) Ol memba blong Kristin kongregesen we oli bigman long saed long speret oli stap folem ol eksampel ya tede, oli tijim mo leftemap tingting blong olgeta we oli no gat tumas ekspiryens, antap moa ol nyuwan mo ol yangfala. Olsem Rom 15:1, 2 i talem se, “Yumi ya we yumi strong long fasin ya blong bilif, yumi mas givhangud long olgeta we bilif blong olgeta i no strong.”
10 Ol papa mama oli gat responsabiliti blong wok strong blong halpem ol pikinini blong olgeta blong gohed long saed long speret. Samting ya i min se oli mas mekem famle stadi, tijim ol pikinini olsem wanem blong stadi wanwan, go oltaem long ol miting mo joen long hem, mo ekspiryens we oli kasem taem oli mekem ol samting we oli lanem i wok long laef blong olgeta. (Efes. 6:4; 1 Tim. 5:8) Olgeta we oli lidim wan Buk Stadi blong kongregesen, oli mas mekem plan blong halpem olgeta long buk stadi blong ol mo ol grup blong wok blong prij blong oli gohed long saed long speret. Brata we i lukaot long wok blong prij, ol narafala elda, ol man blong givhan mo ol narafala memba blong kongregesen oli save givhan tu.
11 Givim Samting We Oli Nidim: Samtaem oli nidim help long wan haf nomo long Kristin minista wok blong yumi, olsem stadi wanwan. Wan man ating i nidim sam advaes long saed blong mekem wan gud program blong stadi. Wan narafala ating i nidim help blong rere long ol ansa no long wan tok. Sam narafala maet oli nidim blong lanem olsem wanem blong lukaotem mo faenem ol poen long Baebol.
12 Plante nyuwan oli nidim help long wok blong prij. Wan pablisa ating i wantem kamgud moa long wok blong prij long ol haos wanwan, mekem ol visit bakegen, no statem mo mekem wan Baebol stadi. Ating i naf we hem i talem bakegen plante taem lelebet long yu sam fastok mo sam tok we oli stap long Reasoning buk no long Kingdom Wok Blong Yumi. Long wan narafala taem, sam advaes blong mekem wan gud program blong wok blong prij mo givhan long hem blong folemgud, ating samting ya nomo hem i nidim. Mekem plan blong wok wetem wan we i nidim help, samting ya bambae i givhan long man no woman ya blong gohed kasem sam stret mak we hem i wantem kasem.
13 Tok blong God i leftemap tingting blong yumi blong letem ol narafala oli luksave se yumi stap gohed long saed long speret. Hemia nao advaes we Pol i raetem long Timote. (1 Tim. 4:15) Blong laenapgud wetem ol tok ya, aposol Pol i talem strong long yumi blong trengud olsem we bambae yumi ron long wan resis no blong faetgud long faet blong yumi long saed long speret. (1 Kor. 9:24-27; 2 Kor. 10:5, 6) Yumi mas kwik blong mekem ol samting we yumi lanem long saed long wil blong God, i wok long laef blong yumi blong mekem se ol man we oli stap lukluk yumi oli save luk yumi olsem wan gud eksampel long saed long trufala Kristin bilif. Long semtaem, yumi mas gohed long fasin blong tijim ol narafala blong oli kam ol trufala disaepol blong Jisas Kraes.—Jem. 1:22-25; 1 Tim. 4:12-16.
14 Fasin Blong Gohed i Joen Long Fasin Blong Winim Ol Traem Tu: Jisas i lanem plante gud lesen long ol samting we hem i harem nogud long olgeta. (Hib. 5:8) Yumi tu yumi save mekem olsem. Olsem ya yumi save gohed kwik long saed long speret taem yumi folem positif tingting we i stap long Jemes 1:2, 3: “Ol brata mo sista, taem plante samting oli stap kam blong traem yufala, bambae yufala i save luk olgeta olsem samting blong harem gud from. From we yufala i save, taem bilif blong yufala i strong, nao yufala i winim ol samting ya blong traem yufala, bambae yufala i save kam strong moa blong stanap longtaem.” Nao, ating yumi mas faet agens wan sik we i stap long yumi longtaem finis, trabol long mane, laef long wan haos we sam long olgeta oli no bilif, trabol long teritori, no ol narafala samting, be Jeova i stap blong givhan long yumi blong winim ol trabol ya mo gohed blong wosip long hem. (1 Kor. 10:13; 2 Kor. 12:9; 1 Pita 5:8-11) Sipos yumi stanap strong bambae yumi winim ol trabol ya, “Sipos yufala i stap prij, yufala i mas talemaot ol tok we God i givim. Sipos yufala i stap givhan long ol man, yufala i mas mekem long paoa we God i givim long yufala. Nao long olgeta fasin ya, nem blong God bambae i save go antap moa, from Jisas Kraes ya.”—1 Pita 4:11.
15 Akseptem Help Blong Stap Gohed Oltaem: Sipos yu wan we yu nidim help blong gohed long saed long speret, yu mas rere blong akseptem help long wan memba blong kongregesen we i gat moa ekspiryens. Sipos yu no kasem help yet, yu no mas letem fasin sem i blokem jans blong yu blong kasem help. Askem help long narafala. Yu mas harem se yu fri blong askem help long eniwan we i gat ekspiryens long kongregesen. No yu save askem brata we i lidim Buk Stadi blong yufala, elda we i lukaot long wok blong prij, no wan long ol narafala elda blong halpem yu.—Skelem wetem Jenesis 32:26; Matyu 7:7, 8.
16 I tru tumas, i wan gudfala blesing blong stap long medel blong intenasnal “hif blong man” we i stap gru oltaem we oli stap go antap long hil blong klin wosip blong Jeova. (Rev. 7:9) I wan blesing tu blong askem ol narafala blong kam wetem yumi blong go long hil ya blong Jeova. Wetem fasin tangkyu long hat blong yumi, oltaem yumi mas wok wetem positif tingting blong gohed, bildimap yumi long saed long speret mo mekem samting we yumi save mekem blong halpem ol narafala blong gohed wetem yumi long wok blong Jeova.