Wok Strong Blong Mekem Ol Visit Bakegen
1 Olsem ol minista blong gud nyus, yumi gat oda ya blong mekem disaepol. (Mat. 28:19, 20) Samting ya i joen wetem wok blong mekem ol visit bakegen. ?Yu yu tingting strong long impoten haf ya blong Kristin minista wok blong yumi? Blong gat gudhan blong mekem ol visit bakegen i save kam olsem wan samting we i pusum yumi blong wok strong long hem.—Prov. 22:29.
2 Wanwan Kristin we i givim laef blong hem i go long Jeova finis i mas luksave responsabiliti blong joen long wok blong mekem disaepol. Blong mekem olsem ating yumi mas putumaot sam samting we yumi wan yumi wantem blong yumi save tokbaot Kingdom hop blong yumi wetem ol narafala. Ol visit bakegen oli olsem wan jans blong halpem ol man we oli gat gud hat blong oli save kasem ol samting we oli nidim long saed blong speret.
3 Visitim Bakegen Olgeta We Oli Intres: Yumi mas mekem visit bakegen long olgeta man we oli soem intres long mesej blong Kingdom, nating se oli no karem wan buk blong yumi. I gat plante man we oli intres mo oli wantem tumas blong tokbaot sam samting long saed blong Baebol wetem yumi. Jisas mo ol aposol oli soemaot olsem wanem yumi save pulum ol man blong oli intres long Kingdom mesej taem yumi tokbaot sam stret tok blong Baebol wetem olgeta.—Mak 10:21; Wok 2:37-41.
4 Stret tingting blong gobak bakegen hem i blong statem Baebol stadi. Yumi save soem long man blong haos olsem wanem blong mekem Baebol stadi. Yu save sua se Jeova bambae i ansa long prea blong yu, bambae hem i givhan long yu blong faenem wan man we hat blong hem i stret blong yu save tijim hem. Jeova bambae i blesem fasin blong yu blong traehad long wok blong hem. ?From wanem yu no askem help blong Jeova mo putum mak blong statem wan Baebol stadi?
5 Yusumgud Ol Traket: Yumi save yusumgud ol traket blong statem Baebol stadi. Plante oli statem storeyan blong olgeta taem oli tokbaot ol pija we oli stap long fas pej blong hem. Ridim ol paragraf wanwan wetem man blong haos. Taem yu askem wan kwestin, stop mo askem man blong haos blong talemaot tingting blong hem. Ridim ol vas mo soemaot olsem wanem oli joen wetem haf we yu storeyan long hem. Yu save joenem storeyan i go long buk we bambae yu yusum blong mekem stadi long hem.
6 Yusum Reasoning Buk: Yumi save yusum Reasoning buk blong mekemgud ol visit bakegen. Lukluk bakegen lis blong ol stampa poen no indeks i save halpem yu blong jusum ol stret samting we yu wantem tokbaot we i laenap wetem las storeyan blong yufala. Haf ya “Ol Vas Blong Baebol We Oli Yusum Rong” (Scriptures Often Misapplied) i save givhan bigwan taem i gat tok blong blokem yumi i kamaot. Ol paenia oli talem se oli statem plante Baebol stadi taem oli yusum ol poen we yumi save faenem long Reasoning buk long pej 204 (399) aninit long tok ya “?Olsem wanem ol Wetnes blong Jeova oli faenem ansa long ol kwestin long saed long Baebol?” Oli soem long man we i intres olsem wanem Baebol hem wan i givim prapa ansa blong hem blong eksplenem. Samting ya i wokgud mo frut we i kamaot se, oli statem plante Baebol stadi.
7 Olsem Jisas mo ol aposol, yumi nidim blong soem tru intres long olgeta sipsip blong Jeova. (Luk 9:11) Lav blong yumi long ol man bambae i givhan long yumi blong talemaot ol trutok blong Kingdom long olgeta. (2 Kor. 2:17) Taem yumi tingbaot moa blong givim taem mo paoa blong yumi blong givhan long ol narafala long saed blong speret, bambae yumi save wok strong blong mekem ol visit bakegen.