Gat Gudhan Blong Prij Long Ol Haos Wanwan
1 Tede ol man blong God oli talemaot “gud nyus” long olgeta ples blong wol finis. (Mat. 24:14) Samting ya i kamtru from minista wok we oli mekem long olgeta haos wanwan.—Wok 20:20, 21.
2 Ol tok blong yumi oli mas gat mining long olgeta man we yumi faenem olgeta. Man, woman, mo ol yangfala oli intres long ol defren samting. Taswe i gud blong mekemrere ol defren tok we oli stanap long Baebol, we i stret long olgeta man long teritori blong yumi.
3 Yusumgud Ol Buk Blong Yumi: Laef Foreva buk i gat plante haf insaed long hem we i laenapgud wetem olgeta man long evri ples. Olgeta pijatok, we yumi save luk mo ridim, oli save givhangud long yumi. Buk ya i go stret long hat, mo hem i halpem olgeta man blong luksve se oli mas mekem wan disisin, yes, blong jenisim bilif, fasin blong olgeta, tingting blong olgeta, mo fasin blong laef blong olgeta. From we yumi savegud olgeta haf insaed long Laef Foreva buk, bambae samting ya i givhan bigwan long yumi blong toktokgud wetem olgeta man long ol defren samting. Samting ya bambae i save givhan long yumi blong luksave intres we man blong haos i gat.
4 Blong gat gudhan long wok blong prij yumi wanwan yumi mas soem se yumi intres long ol man. (Fil. 2:4) Tok blong yumi i mas go stret long olgeta samting we Kingdom bambae i mekem we i laenap wetem man mo nid blong hem. Askem defren kwestin long man blong save tingting blong hem. Lesingud long ol ansa blong hem. Ol tok blong hem bambae oli save halpem yu blong luksave wanem poen hem i save intres long hem. Yumi wantem halpem ol man blong oli luksave se mesej long saed blong Kingdom i impoten tumas mo yumi wantem soem long olgeta olsem wanem oli save lanem moa long saed blong Kingdom ya. Wan man wetem woman blong hem tufala i eksplenem se oli akseptem Baebol stadi from we brata we i bin go prij long tufala i soem we hem wan hem i intres long tufala.
5 Long Ol Teritori We Yumi Wok Long Hem Oltaem: I impoten moa blong gat gudhan long wok blong prij long ol teritori we yumi stap wok long olgeta oltaem. Wan minista wok we i gud hem i halpem yumi blong mekem teritori blong yumi i kam bigwan. (w88 7/15 pej 15-20) I nogud blong mekem olsem we yumi neva kam long haos ya bifo, yumi save tingbaot fasin we man blong haos i gat bifo mo yusum save ya blong storeyangud wetem man ya. Yumi save tokbaot visit we yumi mekem long hem bifo mo yumi save gohed long storeyan we yumi mekem wetem hem fastaem. Ol toktok we oli bin kamaot long ol Kingdom Wok Blong Yumi we oli pas finis mo long Reasoning buk, yumi save jenisim olgeta lelebet blong oli save joengud long nid blong ol man long teritori.
6 Jeova i wet mo letem doa i open yet blong moa man oli save haremgud long ol blesing blong Kingdom. Minista wok blong Jisas i karem frut from we hem i gat lav long olgeta man. (Mak 6:34) ?Yumi stap traehad blong folem eksampel blong hem? (1 Pita 2:21) I gud blong yumi no kam slak blong joen fulwan mo gat gudhan long minista wok long ol haos wanwan.—2 Tim. 4:5.