Wokem Intres Long Mesej Blong Kingdom i Gru
1 Sam taem i pas finis—ating wan no tu dei, no ating wan wik—lastaem yu toktok wetem wan man we i soem intres long mesej blong Kingdom. Nating se hem i karem wan buk we i tokbaot Baebol no no gat, be i impoten se kwiktaem yu wokem intres we i stap long hem i gru.
2 Lukluk bakegen ol poen we yu makem fastaem taem yu toktok wetem hem. Afta, taem yu mekemrere basket blong yu blong go prij, mekem sua se yu karem wan kopi blong buk we yu livim wetem hem blong mekem se yu save luklukbak long hem taem yu mekem visit bakegen.
Sipos yu livim buklet ya “Look!” yu save talem se:
◼ “Mi mi glad blong luk yu bakegen. Lastaem taem yumitu storeyan, mi mi soem pija long yu long fas pej mo las pej blong buklet ya, mo yumitu bin ridim wan vas blong Baebol blong pruvum se tru long Kingdom ya, God bambae i mekem se i gat haos mo wok blong evriwan. Be God i promes tu blong finisim sik, fasin blong kam olfala, mo ded tu. ?Yu ting se i had blong bilivim samting ya? [Letem man blong haos i ansa.] Traem luk poen ya we i stap long haf 4 blong buklet ya we mi bin livim wetem yu.” Ridim haf. Mo jekem wan no tu vas blong Baebol we i stap daon long pej. !Saye yu statem wan Baebol stadi!
3 Blong mekemrere long nekis visit, yu save finisim storeyan blong yutufala olsem:
◼ “I tru tumas, evri samting we yumi luk oli stap insaed long Baebol, be plante man oli wantem faenemaot sipos oli save bilivim ol samting we Baebol i talem. Taem bambae mi kambak bakegen nekis taem, mi laekem blong tekem smoltaem blong tokbaot poen ya wetem yu.” Taem yu gobak bakegen blong wokem intres ya i gru, statem storeyan long stampa tok ya “Buk We i Tokbaot Paradaes,” stat wetem haf 5 blong buklet.
4 Long Ol Teritori We Yumi No Seremaot Plante Buk Long Hem: Yumi save yusum sem toktok taem yumi visitim sam man we oli gat intres be oli no karem buk. Yu save tokbaot bakegen semfala buklet we yu bin yusum taem yu storeyan wetem hem long fastaem. Ating yu mas visitim man ya plante taem bakegen mo yusum Baebol mo prapa buklet blong yu blong storeyan wetem hem, nao bambae hem i glad blong karem wan buklet blong hem. Sipos yu bin seremaot Julae 1 no Julae 15 Wajtaoa, i gud blong yusum sam poen we oli kolosap sem mak long buklet ya “Look!” taem yu gobak blong mekem intres blong man i gru.
5 Yumi save mekem ol gudfala visit we oli lidim yumi blong statem Baebol stadi long buklet ya Gavman sipos yumi mekemrere fastaem ol poen we oli stap long pej 154 kasem 156 (72-76) long Reasoning buk. No yumi save statem Baebol stadi sipos yumi askem kwestin ya: “?Yu yu save se Baebol i stap tokbaot tu hop? Wan hemia blong laef blong olwe long wol ya. Buklet ya i eksplenem olsem wanem bambae samting ya i kamtru.” Afta yu save openem long pej 15 long buklet, mo ridim tri vas blong Baebol we oli stap long hem.
6 Sipos yu seremaot tu magasin, wan buk, no wan buklet no yu yusum Baebol blong toktok wetem wan man we hem i intres, hem i responsabiliti blong yu blong wokem intres blong man ya i gru. Mifala i leftemap tingting blong yufala evriwan blong putum sam taem long manis Julae blong mekem wok ya blong sevem laef blong ol man.—1 Tim. 4:16.