Yu Mas Sua Blong Gobak Bakegen
1 “Long tu yia i pas finis, mi bin ridim [Creation buk] fo taem mo mi stap sapraes yet long dip stadi blong hem, gudfala save we mi kasem long hem, mo ol haf we oli yusum blong wokem. Plis yufala i gohed blong prentem sam moa buk olsem. Buk ya evri man long wol i mas gat wan. Sipos i olsem, ol gyaman tok mo ol tok we oli mekem tingting blong man i fasfas long saed blong olsem wanem yumi stat mo bilif we man i talem se i no gat God bambae oli finis kwiktaem nomo.” Hemia nao tok blong wan man blong loa, we i kamaot long Wekap! blong Epril 22, 1992, pej 32.
2 Wetem wan gudfala tok olsem long buk ya, ?olsem wanem, yumi wantem wok wetem fulhat blong yumi blong livim wan Creation buk long han blong ol man we oli intres? Afta yumi sua blong mekem visit bakegen blong gohed blong wekemap intres we ol man oli gat long buk ya.
3 I no evriwan long yumi we i mekem wan dip stadi long ol tijing blong evolusen. Be nating, i no nidim samting ya blong givim sam pruf long ol man we hat blong olgeta i stret se evolusen i wan long ol samting nomo we Setan i stap yusum blong daonem Wan we i Wokem olgeta man, Jeova God. Yu no mas wet blong gobak bakegen; buk ya hem wan i givim fulap pruf long ol haf blong hem.
4 Antap moa, i gat fulap save long hem stat long japta 16 mo i gohed kasem japta 20 we i tokbaot sam strong Baebol tijing long saed blong man mo stat blong hem, plan blong God long saed long wol mo man, mo ol defren jus we man i stap fesem tede. Olsemia nao i gat fulap gudfala save we yumi save yusum blong mekem visit bakegen.
5 Sipos yu harem se yu no naf blong mekem visit bakegen long sam man we yu bin livim wan buk long olgeta, yu save tekem wan man long kongregesen we i gat moa ekspiryens no hem i kasem moa save long tijing blong evolusen. Maet wan yangfala brata no sista we i tekem sam taem long skul blong stadi long poen ya mo hem i savegud ol defren tingting long saed long evolusen. Mo tu maet i gat wan long kongregesen blong yu we i bin bilif long evolusen be afta hem i lanem ol trutok blong Baebol mo naoia hem i save givhan blong soemaot gyaman tijing blong evolusen.
6 Yu no fraet blong pulum tingting i go long japta 19 blong Creation buk mo yusum hop we Baebol i givim long saed long fyuja olsem faondesen blong visit blong yu bakegen. Japta ya i gat plante poen we yu save yusum blong leftemap tingting blong man blong luk promes long fyuja we Baebol i givim. Maet yu wantem yusum haf we i stat long pej 236 aninit long stampa tok ya “Wol Ya i Jenis,” (The Earth Transformed) we biaen i gat “En Blong Fasin Pua” (An End to Poverty) mo “No Moa Gat Sik, No Moa Gat Ded” (No More Sickness, No More Death) long pej 238-239 (F. 236-241).
7 Gudfala buk ya i halpem plante man finis blong faenem rod blong laef. Yumi save gohed yet blong halpem ol narafala mo leftemap tingting blong olgeta blong oli ridim mo luksave wanem nao Creation buk i talem long saed blong laef mo olsem wanem i kamaot.