Yusumgud Ol Magasin
1 Taem yu visitim ol ples blong salem buk, yu sapraes long ol defren kaen magasin we oli soemaot evri samting i stat long ol buk we oli tokbaot ol fani store go kasem ol buk long saed blong sayens. Yu neva save ridim olgeta evriwan. Sam long olgeta oli gat sam gudfala save insaed we yumi save yusum, be bighaf blong olgeta oli tokbaot sam samting we oli no impoten. Plante long olgeta oli nogud mo i no stret blong karem.
2 Hem i defren olgeta taem yumi skelem ol magasin ya wetem Wajtaoa mo Wekap! Tufala magasin ya oli gat mak blong faenemaot mo talemaot trutok we i save mekem ol man oli luksave lav blong God mo tanem tingting blong olgeta blong oli save kasem sef.
3 Wekap! i save kasem olgeta defren kaen man from bigfala wok blong hem mo ol defren kaen haf blong hem. Olsem oli eksplenem long pej 4 long evri namba, hem i ‘blong givimaot save we ful famle i save kasem gudfala samting from.’ Hem i gat ol defren haf we oli tokbaot ol defren poen, long saed blong ol man, skul, mo sayens. Hem i lukaot dip mining blong olgeta samting mo soemaot trufala mining blong ol samting we oli stap hapen raonabaot long yumi. Antap moa, hem i ‘bildimap fasin blong trastem promes blong Wan we i Wokem olgeta samting long saed blong wan wol we bambae i gat pis mo seftaem long hem.’
4 Wekap! blong Oktoba 8 i soemaot poen ya “Yu Save Winim Ol Tingting We Oli Mekem Yu Yu Harem Nogud.” Tingting olsem i spolem laef blong fulap man. Taem yumi givimaot magasin ya mo tokbaot ol advaes we Baebol i givim blong mekem man i haremgud, samting ya i save mekem man i glad blong lesin. Long saed blong Wekap! blong Oktoba 22, yumi save faenem sam man we oli lesingud taem yumi tokbaot ol poen we i save mekem man i haremgud long ol haf olsem “Wan Nyufala Wol We i Mekem Evriwan i Haremgud.”
5 Wajtaoa i kam olsem wan magasin we olgeta man long wol oli savegud long hem from hem i talemaot oltaem gud nyus blong Kingdom mo ol blesing long Paradaes we bambae hem i mekem i kamtru. Wajtaoa blong Oktoba 1 bambae hem i ansa long kwestin olsem “?Ol Man Oli Rili Nidim Wan Mesaea?” Samting ya bambae i givim wan gud jans long yumi blong talemaot hop blong yumi long Kingdom. Ol advaes long “Laef Blong Famle Tede—Winim Ol Trabol Blong Hem,” long Wajtaoa blong Oktoba 15, bambae i halpem yumi blong statem storeyan wetem ol memba blong famle we oli wantem tumas blong winim ol trabol long saed blong famle.
6 Yumi wantem se olgeta we oli intres bambae oli kasem ol gudfala magasin ya evritaem. Taem yumi tokbaot ol gudfala samting we magasin ya i givim, yumi mas gat positif tingting mo askem man blong karem magasin long stret praes we yumi askem long olgeta. Yu no mas fraet blong askem sabskripsen long man mo letem man blong haos i mekem disisin blong hem sipos hem i wantem kasem ol magasin blong yumi long bokis blong hem long Postofis no no gat.
7 Yumi save askem olgeta man blong karem magasin blong yumi, from we yumi bilif fulwan se oli save givhan bigwan long ol man. Yumi gat wan gudfala samting, mo yumi save folem fasin blong Kraes blong seremaot samting ya wetem ol narafala man.—Prov. 3:27; Hib. 13:16.