Halpem Pikinini Blong Mekem Wok Blong Jeova Wetem Hat Blong Hem
1 Solomon i talem se “ol pikinini ya blong yumi, hemia wan presen we Hae God i givim long yumi.” (Sam 127:3-5) Oli wan presen we i sas bitim mak. Ol papa mama oli gat wan responsabiliti we God i givim long olgeta blong tijim, trenem, mo stretem pikinini blong olgeta. Samting ya i laenap tu wetem trening long minista wok, mo blong leftemap tingting blong pikinini blong talemaot wanem i stap long hat blong olgeta long saed blong Jeova mo Kingdom blong hem.—Efes. 6:4.
2 ?Long wanem yia stret papa mama i save statem trening olsem? Ansa blong Baebol i klia nomo: Yu mas stat taem hem i pikinini yet. (2 Tim. 3:14, 15) Trening we oli statem taem pikinini i smol yet i givim bigfala jans long pikinini blong wokem wan strong faondesen long trutok mo mekem minista wok i kam olsem bigfala wok long laef blong olgeta. Trening ya we oli statem taem pikinini i smol yet bambae i givhan tu blong protektem olgeta long ol tingting blong wol mo ol fasin blong hem.
3 Plante pikinini we oli no go long skul yet oli save lanem blong gat gudhan blong mekem sam wok we oli strong. Fasin ya we oli naf blong lanem samting taem oli pikinini yet, yumi save yusum blong trenem olgeta blong gat gudhan long sam wok we Jeova i agri long olgeta. (w88 8/1 pej 15; w89 12/1 pej 31, Eng. mo Fr.) Plante we oli pikinini yet oli gohedgud gogo oli kam olsem ol pablisa we oli no baptaes yet. Sam pikinini oli givim laef blong olgeta long Jeova mo oli tekem baptaes bifo we oli kasem 13 no 14 yia. Samting ya i openem rod blong oli save mekem wok olsem ol haftaem paenia mo fultaem paenia bifo oli finisim skul blong olgeta. Blong kasem ol mak ya, oli nidim blong lanem blong toktok wetem olgeta man long ol defren kaen poen long Baebol.
4 Sam bigman oli tingbaot ol yangfala olsem we oli wantem jikim ol narafala mo we oli no gat respek long ol bigman, taswe oli no intres blong toktok wetem ol yangfala we oli go long haos blong olgeta. ?Wanem samting wan yangfala pablisa i save talem blong winim wan trabol olsem mo pulum tingting blong bigman we i stap long haos ya? Wan yangfala pablisa i yusum wan samting olsem: “Gud moning, nem blong mi ________. Mi stap visitim olgeta man we oli stap raonabaot long mi tede from we plante oli wari long saed blong fyuja. Olsem yu wan bigman finis, mi sua se yu gat moa ekspiryens long ol samting long laef bitim mi. Be, i gat wan vas long Baebol we i save mekem yumi evriwan i haremgud.” Afta we yu ridim Revelesen 21:3, 4, yu save pulum storeyan i go stret long traket ya Laef Long Pis Blong Nyufala Wol.
5 Wan narafala rod i olsem: “Halo, nem blong mi ________. Mi mi stap mekem wan smol visit long olgeta man raonabaot long mi from we mi save se plante bigman oli wari long rod we ol yangfala oli stap wokbaot long hem tede. Samtaem ol yangfala oli soemaot se oli no gat respek nating, no maet oli tingting blong agensem ol narafala. Be mi mi stap soemaot wan vas blong Baebol we i soem olsem wanem wan dei bambae evriwan oli save lanem blong laef tugeta long pis.” Nao, ridim Ol Sam 37:11 mo talemaot sam gudfala poen we i stap long hem. Taem wan bigman blong haos i harem sam gudfala tok olsem we i kamaot long hat blong ol yangfala pablisa, sua se plante long olgeta bambae oli sapraes from.
6 I gat taosen blong ol yangfala pablisa we oli stap gohed blong mekem gudfala wok long saed blong Kingdom mo wok blong mekem disaepol. Yumi save talem tangkyu long olgeta from. Ol yangfala we ol papa mama blong olgeta we oli fasgud long God oli trenem olgeta taem oli pikinini yet, oli rere blong akseptem ol tok blong leftemap tingting blong olgeta we i save givhan long olgeta blong gohed blong joen moa long ol defren haf blong minista wok. Olgeta we oli stap long skul yet oli gat jans blong givim wetnes long ol narafala studen mo ol tija blong olgeta. Plante oli haremgud long ekspiryens we oli kasem taem oli givim wetnes long ol spesel teritori olsem.
7 Halpem ol yangfala pablisa long kongregesen blong yufala blong oli tekem jans blong mekem wok blong Jeova wetem paoa blong olgeta taem oli yang yet, blong presem hem wetem hat blong olgeta.—Ekles. 12:1.