Karem Laet Long Ol Man Raonabaot Long Yumi
1 Afta we yumi go finis long distrik asembli blong yia ya, yumi luksave moa se naoia i gat nid blong karem laet long ol man raonabaot long yumi. (Mat. 5:14) Taem yumi tingtingbak long ol advaes we yumi kasem long program ya mo traehad blong mekem i wok long laef blong yumi long evri dei, samting ya i halpem yumi blong kam kolosap moa long Jeova long tru wosip mo blong halpem ol narafala blong kasem save long ol promes blong Jeova.
2 Ol jans we yumi gat blong karem laet i kam antap moa, taem oli talemaot wan nyufala traket we nem blong hem ?Wol Ya Bambae i Stap No i Lus? long en blong program blong Fraede moning. Ol pleplei blong Sarede moning oli halpemgud yumi blong soemaot olsem wanem yumi save yusum ol traket ya. Biaen, i gat wan mesej we i talem se i gat tri narafala traket we i no longtaem bambae oli kamaot. Hemia nem blong ol traket ya: Mekem Olgeta We Tingting Blong Olgeta i Foldaon Oli Haremgud Bakegen, Haremgud Long Famle Laef, mo ?Hu i Stap Rulum Wol Ya? I gat ol tok blong leftemap tingting blong yumi blong karem olgeta tul ya blong yusum taem i gat jans blong mekem olsem.
3 Long en blong tok ya “Stap Sef Long Taem We Bambae Jisas i Kamtru” long Sarede aftenun, wan nambawan buklet we nem blong hem ?God i Rili Kea Long Yumi? i kamaot. Buklet ya we i gat gudfala kala long hem, wetem ol naesfala pija bambae i ansa long plante kwestin we plante man oli stap askem, se: ?From wanem God i letem fasin nogud i stap? ?Bambae fasin nogud i finis yet? ?Olsem wanem yumi save se yumi stap long las dei? ?Olsem wanem wol ya bambae i kam wan paradaes? ?Olsem wanem yumi save kasem laef blong olwe long nyufala wol blong God? Buklet ya bambae i kam olsem wan nambawan tul blong statem ol Baebol stadi.
4 !Yumi tangkyu tumas from plante kakae blong speret we yumi kasem long Distrik Asembli “Ol Man Blong Karem Laet”! Olsem ol man blong karem laet blong God long saed blong speret, yumi mas strong blong soemaot fasin tangkyu we i kamaot long hat blong yumi taem yumi strong blong mekem ol samting we yumi lanem i wok long laef blong yumi mo taem yumi waes blong yusum ol nambawan buk we i kamaot blong halpem ol man long evri ples blong oli save mo mekem wok blong Jeova.