Wokem Fastok We i Pulum Man Blong Mekem Wan Samting
1 Tufala tugeta Wajtaoa mo Wekap! oli gud blong yusum blong planem sid blong trutok long tingting mo hat blong olgeta man we oli ridim. Be, yumi wantem wokem sam gudfala rod blong karem magasin i go long haos blong olgeta man we oli save kasem ol gudfala samting long saed blong speret we oli stap insaed long olgeta.
2 ?Olsem wanem yumi save pulum tingting blong man blong haos blong akseptem mo ridim ol magasin blong yumi? Plante taem samting ya i dipen long fastok blong yumi. Sam gudfala tingting long saed blong ol gudfala fastok oli stap long Reasoning buk, pej 9-15.
3 Taem yu soemaot Wajtaoa blong Oktoba 1, ating yu wantem traem yusum namba tri tok we i stap aninit long stampa tok ya “Ol Samting We Oli Stap Hapen Tede” long pej 10-11 long Reasoning buk.
Afta we yu talem nem blong yu finis, yu save talem se:
◼ “?Sipos yu mas jusum, weswan long ol problem we naoia i stap hapen long wol we yu wantem se oli stretem fastaem?” Lesin long ansa blong man blong haos, mo traem kasem save long tingting blong hem. Afta yu save gohed blong talem samting olsem: “Traem luk wanem Baebol i givim olsem ansa blong trabol ya. [Ridim Aesea 9:6, 7.] Taswe trufala ansa blong ol trabol blong man i stap long stret rul blong Mesaea, Jisas Kraes.” Nao openem i go long pej 8 mo pulum tingting blong man i go long las tri haf long poen ya we nem blong hem “?Mesaea—Wan Trufala Hop?”
4 Tu narafala fastok we yu save yusum wetem Oktoba 1 Wajtaoa yu save faenem long pej 11 blong Reasoning buk, aninit long stampa tok ya “Wok/Haos” (Employment/Housing). Yu save talem ol tingting ya mo ol kwestin ya long prapa tok blong yu nomo no yu save talem bakegen wanem we i stap long Reasoning buk. Afta we yu kasem save long ansa blong man, gohed blong toktok wetem hem long gudfala poen ya we i stap long pej 4 aninit long stampa tok ya “?I No Gat Ansa?” Nao, taem yu ridim Aesea 65:21-23, soemaot blesing we rul blong Mesaea bambae i mekem i kamtru.
5 Sipos yu stap yusum Wekap! blong Oktoba 8 long “Yu Save Winim Ol Tingting We oli Mekem Yu Yu Harem Nogud,” yu save traem namba tri fastok we i stap aninit long stampa tok ya “Laef/Glad” long pej 13 blong Reasoning buk. Afta we yu joenem Ol Sam 1:1, 2, yu save pulum tingting blong man i go long wan stret poen long Wekap! magasin.
6 Maet bambae yu toktok wetem wan man we i talem se olgeta tu oli gat ol prapa buk blong skul blong olgeta. Yu save eksplenem long hem se yumi tu yumi gat prapa buk blong yumi we yumi stap yusum (olsem Kingdom Wok Blong Yumi). Be, i gat plante milyan man we oli no Wetnes blong Jeova we oli stap ridim ol magasin blong yumi. Yumi mas gat positif tingting taem yumi seremaot ol magasin blong yumi. Sipos man i no wantem tekem wan long olgeta, yu save yusum wan long ol traket we yu gat.
7 Pol i talem long 1 Korin 3:6 se: “I olsem we mi mi brekem graon, nao Apolos i planem yam, be God nomo i stap mekem ol yam ya oli gru.” Sipos yumi wantem se Jeova bambae i mekem ol sid blong trutok i gru long hat blong ol man we oli intres, yumi mas lukaot blong planemgud ol sid ya taem yumi yusum ol fastok we oli pulum man blong mekem wan samting.