Soemaot Se Yumi Tingbaot Ol Man We Oli Intres
1 Jeova i nambawan long fasin blong tingbaot ol narafala man. Hem i no givim nomo ol samting we yumi nidim long saed blong bodi we i plante tumas be hem i givim ol samting long saed blong speret tu we yumi nidim mo yumi glad long hem. Hem i tingbaot yumi tumas, mekem se hem i go moa blong luk wanem we i stap long hat blong yumi.—Sam 139:23.
2 Taem Jisas i stap long wol, hem i folem eksampel blong Papa blong hem long wan fasin we i stret olgeta blong soemaot se hem i tingbaot ol narafala. Tingbaot man ya we i talem long Jisas, “Plis, Masta, sipos yu yu wantem, yu save mekem mi mi gud bakegen.” Jisas i ansa, “Mi mi wantem.” (Mat. 8:1-3) ?Taem Jisas i luk wan wido we i harem nogud tumas, hem i mekem wanem? Hem i stop blong halpem hem. (Luk 7:11-15) ?Olsem wanem, yu yu rere blong soemaot se yu tingbaot ol man we oli intres?
3 Taem yumi folem fasin blong Papa blong yumi, Jeova, mo Pikinini blong hem, Jisas Kraes, yumi tu yumi mas soem se yumi wanwan yumi intres long ol narafala. Yumi save mekem olsem sipos yumi stap raetemdaon nem blong ol man we oli intres long wok blong prij long ol haos wanwan. Samting ya i min se raetemdaon nem mo stret adres blong ol man we oli intres wetem olgeta poen we yumi bin tokbaot wetem olgeta fastaem. Afta, bifo we yumi mekem visit bakegen, yumi mas mekemrere gud. Sipos yumi givim sam magasin long hem taem yumi mitim hem fastaem ating visit blong yumi i save stanap long wan long olgeta poen we i stap long ol haf blong magasin ya. Makem olsem wanem yumi save mekem samting ya.
4 Sipos yu livim Wajtaoa blong Oktoba 1, 1992, mo yu wantem tokbaot haf ya “?Ol Man Oli Rili Nidim Wan Mesaea?” yu save mekemrere blong tokbaot Revelesen 21:4 mo Jon 17:3 long visit we yu mekem bakegen.
Eksampel, afta we yu ridim Revelesen 21:4, yu save askem se:
◼ “?Olsem wanem yumi save kam haf blong wan wol we i olsem? [Letem man i ansa.] Lesin long wanem Mesaea i talem se yumi nidim blong givhan long yumi blong kasem laef long wan wol olsem.” Nao, ridim Jon 17:3, talemaot klia se ol man oli save kasem laef we i no save finis long wan wol we i gat pis long hem sipos oli kasem save long God mo Kraes. Sipos man ya i gat sam intres, traem blong statem stadi wetem traket ya Laef Long Pis Blong Nyufala Wol.
5 Yu save kasem sam gudfala frut sipos yu jusum sam poen long Oktoba 8, 1992 Wekap! we i tokbaot “Yu Save Winim Ol Tingting We Oli Mekem Yu Yu Harem Nogud.” Taem yu mekem visit bakegen, yu save mekem storeyan i stanap long Filipae 4:6, 7.
Yu save askem:
◼ “?Long bilif blong yu, wanem ansa blong winim ol tingting we oli mekem yu yu harem nogud tede?” Traem kasem save long ansa blong hem nao yu save talem: “I gud blong save se Baebol i givim sam rul, we taem yumi mekem i wok, oli save mekem pis i stap long maen mo hat blong yumi. [Pulum tingting i go long sam stret poen long Filipae 4:6, 7.] Baebol i tokbaot wan taem we olgeta man bambae oli laef wetem ol rul blong Baebol mo bambae i no moa gat sam samting olsem we oli save mekem yumi kasem ol tingting we i foldaon.” Nao, yu save yusum traket ya Laef Long Pis Blong Nyufala Wol blong tokbaot sam moa blesing we bambae oli kamaot long fyuja mo pulum hem blong mekem stadi.
6 ?Olsem wanem sipos man blong haos i gat wan buk blong yumi finis? ?From wanem yu no yusum hem blong statem Baebol stadi? Sipos hemia Laef Foreva buk, openem i go long pej we i tokbaot olgeta nem blong japta mo askem long man blong haos blong jusum wan poen we hem i laekem blong storeyan long hem. Yu save tokbaot wan no tu paragraf blong statem stadi ya.
7 Yumi soemaot se yumi tingbaot ol man we oli intres taem yumi mekemrere gud mo mekem ol gudfala visit bakegen, mo samting ya i soemaot se yumi stap folemgud God mo Kraes, yumi wantem se plante man bambae oli kasem sef.—2 Pita 3:9.