Ansa Long Wan Kwestin

■ ?I stret blong prentem bageken ol buk blong Sosaeti mo seremaot long ol narafala?

Long ol yia we i pas, Sosaeti i prentem bageken plante buk we oli tokbaot ol defren save blong Baebol. Ol man we oli kasem trutok long ol yia we oli jes pas maet oli harem se oli mestem sam gudfala buk we Sosaeti i prentem bifo mo naoia oli nomo save kasem tru long Sosaeti. Samfala oli wet longtaem tumas blong kasem sam kopi blong ol olfala buk, mo sam narafala oli prentem ol buk blong Sosaeti olgeta nomo mo givimaot long plante defren rod. Samting ya i min se oli prentem bageken long buk mo tu long komputa. Long sam rod, oli mekem olsem blong kasem mane from.

“Slef” we i stret mo waes i tingbaot nid blong yumi long speret mo i givim kakae ya “long stret taem blong hem.” (Mat. 24:45) Taem i gat nid blong prentem bageken ol buk we oli bin wokem bifo, Sosaeti i mekem plan from ol samting ya. Wan eksampel, oli prentem bageken ol Wajtaoa volyum stat long 1960 kasem 1985 blong evriwan i kasem. Be, taem ol man wanwan oli mekem prapa tingting blong olgeta blong prentem bageken mo seremaot ol buk olsem, trabol we i no nid blong kamaot i save kamaot from.

Bigfala trabol i save kamaot taem oli prentem bageken ol buk olsem mo oli seremaot blong kasem mane from. Ansa long wan kwestin we i kamaot long Kingdom Wok blong Yumi blong Jun 1977 i talem olsem: “I nogud blong yusum ol brata sista insaed long Tiokratik Oganaesesen blong statem no yumi mekem pablisiti long ol samting blong salem blong winim mane long Haos Kingdom, long buk stadi mo long ol asembli blong ol man blong Jeova. Samting ya bambae i halpem yumi blong tingbaot ol samting long speret mo putum long fasin we i fulwan moa mo ol samting blong bisnes long stret ples blong olgeta.” Taswe, i impoten blong yumi blokem tingting blong winim samting long ol narafala taem samting ya i joen long bisnes blong salem tok blong God no ol samting we i laenap wetem hem.