?Wanem Mak We Yu Wantem Se Ol Pikinini Blong Yu Oli Kasem?
1 Blong karem frut long laef, yumi mas putum mo kasem ol gudfala mak. Olgeta we oli traem kasem ol mak we oli no impoten mo oli no stret, oli harem nogud mo oli harem se laef blong olgeta i no gat mining. Yumi mas waes blong luksave ol stret mak blong traem kasem, blong yumi save gat “laef ya we i prapa wan.” (1 Tim. 6:19) !Yumi talem tangkyu tumas long Jeova, from we Hem i soem tru long Tok mo ogenaesesen blong Hem, stret rod blong folem!—Aes. 30:21.
2 Taem Jeova i soemaot rod ya wetem fasin lav, hem i givim wan gudfala eksampel long ol papa mama. Bitim we oli letem ol pikinini blong olgeta we oli no gat ekspiryens, oli jusum wanem rod oli ting se i gud, ol papa mama we oli waes oli trenem ol pikinini blong olgeta long rod we i stret. Nao taem ol pikinini ya oli kam olfala, oli “no save lego rod ya.” (Prov. 22:6) From ekspiryens we ol Kristin papa mama oli gat, oli save se oli no save trastem fasin blong olgeta wanwan blong jusum rod we i stret. Oli mas dipen long Jeova. (Prov. 3:5, 6) Ol pikinini oli nidim moa blong mekem samting ya, from we oli gat smol save mo ekspiryens nomo.
3 Ol papa mama oli save pulum ol pikinini blong olgeta blong kasem ol gudfala mak, we bambae oli halpem olgeta blong tingbaot ‘ol samting we oli impoten moa.’ (Fil. 1:10) Faswan mak, hemia long saed blong famle stadi. Halpem ol pikinini blong luksave se stadi ya i impoten mo blong lanem plante samting from. I gud we ol pikinini oli lanem fasin blong mekemrere ol miting blong kongregesen, mo rerem sam ansa long ol prapa toktok blong olgeta. I impoten we oli joen oltaem long wok blong prij. Ol smol pikinini oli save joen long wok ya taem oli givimaot ol traket, ridim ol vas blong Baebol mo seremaot ol magasin. Taem oli naf blong rid, oli save joen long Tiokratik Skul, mo samting ya bambae i givhan long olgeta blong gohed kwik long saed blong speret. Wan bigfala samting we i save soem se oli stap gohed gud, hemia taem oli naf blong kam wan pablisa we i no baptaes yet, no oli kam naf blong tekem baptaes.
4 Taem ol pikinini oli kam kolosap long 13 yia, no maet bifo, ol papa mama oli mas toktokgud wetem olgeta long saed blong wok we bambae oli jusum long laef blong olgeta. Ol man blong givim advaes mo ol narafala pikinini long skul, oli save givim ol tingting long olgeta we i pulum olgeta blong ronem ol samting blong wol no ol sas samting. Ol papa mama oli mas givhan long ol pikinini blong olgeta, blong oli jusum ol kos long skul we bambae oli trenem olgeta long ol wok we oli save yusum long laef blong olgeta. Oli save jusum ol kos we oli mekem olgeta oli naf blong lukaot long ol nid blong olgeta long saed blong bodi, be oli no pulum olgeta blong lego wok blong Kingdom. (1 Tim. 6:6-10) Oli save leftemap tingting blong ol pikinini blong traem kasem ‘presen’ ya, blong stap olsem we oli no mared fastaem. Nao biaen, sipos oli mekem disisen blong mared, bambae oli naf blong karem ol hevi responsabiliti blong mared. (Mat. 19:10, 11; 1 Kor. 7:36-38) Ol papa mama oli save toktokgud long saed blong wok blong paenia, prij long ol ples we oli nidim moa man, wok long Betel, mo wok blong misinari. Olsem nao, oli save mekem se nating we ol pikinini blong olgeta oli smol nomo, be oli gat tingting finis se oli wantem yusum laef blong olgeta long fasin we Jeova i glad long hem, we i givhan long ol narafala, mo we i karem blesing long olgeta tu.
5 I gat plante yangfala insaed long ogenaesesen blong Jeova tede we oli folemgud ol hae Kristin fasin mo oli traehad blong kasem ol tiokratik mak. Hemia i no kamaot olsem nomo. Bighaf blong ol wok we i karem frut ya, ol papa mama oli mekem. Sipos yu yu wan papa no mama, ?ol pikinini blong yu oli stap traehad blong kasem wanem mak? ?Oli stap gohed gud blong traem kasem wan mak we oli yusum laef blong olgeta blong mekem ol samting long saed blong Kingdom fastaem? Tingbaot, blong putum trutok long hat blong ol pikinini blong yu, wan samting we i impoten moa long ol narafala samting we yu save mekem, i blong tokbaot trutok evri dei. Maet bambae yu kasem blesing blong gat wan famle we i holemstrong long wosip blong Jeova.—Dut. 6:6, 7; Jos. 24:15.