No Fraet Blong Toktok
1 Long ol yia we oli jes pas, ol pablisa long sam ples oli faenem i hadwok blong toktok wetem ol man long haos blong olgeta. Plante ripot oli soem se long sam ples, bitim stret haf blong ol man oli no stap long haos taem ol pablisa oli prij. From samting ya, oli no karem plante frut long bigfala taem we oli spenem long wok blong prij.
2 Bifo, plante man oli stap long haos long Sande, from oli tingbaot dei ya olsem dei blong spel. Be naoia, ol kastom oli jenis. Plante man oli wok blong kasem mane, lukaot long ol nid blong famle olsem go long stoa blong karem kakae, no oli wokbaot blong spel. Ol samting ya i mekem se oli no moa stap long haos. Taswe long Sande tu, i hadwok blong faenem ol man, long wok blong prij long evri haos wanwan.
3 Taem ol man oli no stap long haos, i klia se oli stap long wan narafala ples. Mak blong yumi i blong toktok wetem ol man. Taswe, i gud sipos yumi toktok wetem olgeta man we yumi mitim olgeta—long rod, long maket, mo long wok blong yumi. Kastom blong Pol i blong “toktok wetem ol man olbaot,” blong prij long olgeta. (Wok 17:17) Long taem bifo, fasin ya blong prij i karem plante frut, mo i sem mak tede.
4 Taem yumi stap go long ol haos wanwan, plante taem yumi luk ol man we oli stap wokbaot long rod, no maet oli stap wet long wan man. Sipos i wan gudfala dei, maet oli stap sidaon afsaed, no maet oli stap fiksimap no wasem trak blong olgeta. Blong statem wan storeyan, maet yumi nidim nomo blong smael mo talem halo long kaen fasin. Sipos haos blong olgeta i stap kolosap, yumi save talem se yumi mestem olgeta taem yumi bin go long haos blong olgeta, mo se naoia yumi glad we yumi gat jans blong toktok wetem olgeta. Plante gudfala frut i bin kamaot, taem samfala oli soem moa se oli no fraet blong toktok wetem olgeta man.
5 Fasin No Fraet i Karem Frut: Wan brata i talem se hem i stap go toktok wetem ol man we oli stanap olbaot, oli wet long bas, oli wokbaot blong spel, mo oli sidaon long trak blong olgeta. Hem i smaelgud mo i toktok wetem glad. Hem i mekem olsem we hem i wan man we i stap kolosap long olgeta, mo i jes wantem visitim olgeta. Long rod ya, hem i seremaot plante buk, mo tu, hem i statem plante Baebol stadi.
6 Taem wan narafala brata mo waef blong hem tufala i stap prij long evri haos wanwan, tufala i mitim wan woman we i stap wokbaot wetem wan bigfala basket fulap long kakae. Oli stat storeyan wetem hem, mo oli talem ol gudfala toktok blong presem hem from hadwok blong hem blong lukaot long famle blong hem. Oli askem long hem se: “?Be yu ting se hu nao i save givim olgeta samting we ol man oli nidim?” Kwestin ya i pulum intres blong woman ya. Smol storeyan ya i mekem se woman ya i singaot tufala blong kam long haos blong hem, mo tufala i statem Baebol stadi wetem hem.
7 Ale, long nekis taem we yu stap prij long evri haos wanwan, nating se long Sande no long wan narafala dei bakegen, mo yu luk se plante man oli no stap long haos, ale i gud blong mekem tingting blong yu i strong mo no fraet blong toktok wetem olgeta man we yu mitim olgeta—long rod mo long ol narafala ples. (1 Tes. 2:2) Maet wok blong prij blong yu i karem moa frut, mo bambae yu kasem moa glad long wok blong yu.