Presem Jeova “Evri Dei”

¹ Ol Sam 145:​2 i tokbaot wan promes we King Deved i mekem long Jeova, se: “Evri dei, bambae mi talem tangkyu long yu, bambae mi stap presem yu oltaem, gogo i no save finis.” !Yumi tu, yumi gat risen blong presem mo talem tangkyu long Papa blong yumi long heven! ?Be olsem wanem yumi save folem eksampel blong Deved blong leftemap hae rul blong Jeova “evri dei”?

² Fulumap Hat Blong Yumi Wetem Tangkyu Long Jeova: Sipos yumi stadi long Tok blong God oltaem, tangkyu blong yumi long Jeova bambae i kam bigwan moa, from ol samting we hem i mekem long yumi finis, i stap mekem naoia, mo bambae i mekem long fyuja. Taem fasin tangkyu blong yumi i kam bigwan moa from ol nambawan wok blong hem, bambae yumi harem se yumi wantem tokbaot gudfala fasin blong hem oltaem. (Sam 145⁠:⁠7) Bambae yumi wantem tumas blong presem Jeova long evri jans we yumi gat.

³ Presem Jeova Long Ol Tok Blong Yumi Evri Dei: Taem yumi storeyan wetem ol man we oli stap kolosap long haos blong yumi, ol yangfala long skul, olgeta we oli wok wetem yumi mo ol narafala we yumi mitim olgeta evri dei, yumi save faenem sam jans blong serem hop blong yumi wetem olgeta. Maet wan man we i stap kolosap long yumi i talem se i wari long ol fasin blong brekem loa long ples blong yumi. Maet wan yangfala long skul i wari long saed blong fasin blong yusum drag mo rabis fasin long saed blong seks. Maet wan we i wok wetem yumi i talem tingting blong hem long wan problem long saed blong politik. Yumi save tokbaot ol rul mo promes long Tok blong God we oli soem stret rod blong yumi folem naoia, mo oli soem ansa blong ol problem ya long fyuja. !Ol tok olsem long “stret taem” oli save givim blesing long narafala!​—Prov. 15:⁠23.

⁴ Tokbaot Jeova Fultaem: Man we i gat bigfala tangkyu long Jeova, i wantem serem gud nyus wetem ol narafala we hem i mitim. (Sam 40:​8-​10) Long saed ya, yumi mas askem se: ‘?Mi mi stap mekem olgeta samting we mi naf blong mekem?’ Plante man oli faenem se taem oli jenisim sam samting long laef blong olgeta, oli save kam fultaem paenia. Sipos ol samting long laef oli no letem taem long yu blong mekem wok ya, maet yu save mekem wok blong haftaem paenia. Taem blong Memoriol i taem blong mekem moa wok. Taswe, manis Maj mo Epril oli ol gudfala manis blong haftaem paenia mo blong mekem wok blong yumi i kam antap.

⁵ Halpem Ol Nyuwan Blong Joen Wetem Yumi Blong Presem Jeova: Oltaem, Memoriol blong ded blong Jisas i mekem yumi tingbaot ol risen blong talem tangkyu long Jeova mo presem nem blong Hem. Hemia i rili wan gudfala taem blong leftemap tingting blong ol Baebol studen blong joen wetem yumi blong talemaot Jeova olsem king. Talem long olgeta se oli mas tingting dip mo prea long saed blong ol samting long buk ya Save Blong Lidim Yu Long Laef We i No Save Finis, pej 173 kasem 175, haf 7 kasem 9. Sipos oli kasem mak finis we oli naf blong prij, oli no mas slou blong stat long wok ya from we oli ting se oli no gat ekspiryens. Ol pablisa we oli gat gudhan long wok blong talemaot Kingdom, oli save soem long olgeta olsem wanem blong mekem wok ya. Sipos ol nyuwan oli wokem strong tingting mo no fraet blong tokbaot gud nyus, oli save bilif se Jeova bambae i givhan long olgeta.​—Wok 4:​31; 1 Tes. 2:2.

⁶ Bambae yumi kasem ol blesing blong olwe mo yumi givhan long ol narafala blong kasem tu, taem yumi lukaot rod blong presem Jeova evri dei.