Kasem Ol Gudfala Samting From Tiokratik Skul Long 1996—Haf 3
1 Aposol Pol i wantem se ol brata oli prea from hem, blong hem i naf blong talemaot gud nyus we hem i no fraet. (Efes. 6:18-20) Yumi wantem wokem sem fasin ya. Blong mekem olsem, yumi glad long help we Tiokratik Skul i givim long yumi. Olgeta we oli stap kam long ol miting, mo we oli naf, oli save joen long skul ya.
2 Yumi ol studen, yumi wanwan i kasem advaes we i givhan long yumi blong kamgud moa long fasin blong toktok mo tij. (Prov. 9:9) Taem ol narafala studen oli kasem advaes, sipos yumi lesin mo traem luksave olsem wanem yumi save folem advaes ya, samting ya i save givhan long yumi tu. Taem yumi mekemrere wan tok, yumi mas stadigud long save we tok ya i stanap long hem, mo mekem sua se yumi eksplenem long fasin we i stret. Ol bigfala poen mo ol vas we yumi yusum, oli mas joengud wetem stampa tok. Taem yu mekem tok wetem narafala, yutufala i mas lanem tugeta, longtaem lelebet bifo we yutufala i mekem long skul. Taem yumi gohed moa, yumi mas traehad blong yusum ol prapa tok blong yumi, mo yusum ol smol not bitim we yumi raetem evri wod.
3 Olgeta we oli gat tok long skul, oli mas kam eli. Oli mas givim pepa ya, Advaes Long Fasin Blong Mekem Tok, long brata we i lukaot long skul, mo sidaon kolosap long fored. Bifo long miting, ol sista oli mas talem long brata we i lukaot long skul, wanem fasin bambae oli yusum blong mekem tok, mo sipos bambae oli sidaon no stanap. Sipos oli mekem ol samting ya, oli givhan blong mekem miting i rongud, mo oli givhan long ol brata we oli lukaot long platfom blong mekemrere evri samting fastaem.
4 Mekemrere Tok N. 2: Baebol riding i blong halpem studen blong kamgud moa long fasin blong rid. ?Wanem beswan rod blong mekem samting ya? Sipos hem i ridim haf blong hem bakegen mo bakegen long bigfala voes, hemia beswan rod blong ridgud. Blong lanem mining mo stret fasin blong talem ol nyufala wod, studen i mas jekem olgeta long wan diksonari. Maet yumi nidim tu blong lanem mining blong ol smol mak long diksonari, we oli givhan long yumi blong talem ol wod long stret fasin.
5 Ol papa mama oli save givhan long ol yangfala pikinini blong olgeta blong mekemrere Baebol riding blong olgeta. Oli save lesin taem pikinini i stap ridim tok blong hem bakegen mo bakegen, mo oli save givim advaes long hem olsem wanem blong kamgud moa. Ol menet we studen i gat, oli naf blong talem wan sot fastok mo wan lastok we i stret, mo blong soem olsem wanem ol stampa poen oli joen long laef blong yumi. Long rod ya nao, studen i save kamgud moa long fasin blong yusum ol prapa toktok blong hem.
6 Long wan prea, man blong raetem Sam i askem se: ‘Jeova, plis yu givhan long mi blong tok, nao bambae mi presem yu.’ (Sam 51:15) Fasin blong yumi blong joen long Tiokratik Skul, bambae i givhan long yumi blong mekem samting ya we yumi wantem tumas.