Pulum Tingting i Go Long “Laet Blong Ol Man Long Wol”
1. ?Wanem bigfala laet we Tok blong God i bin tokbaot, mo wanem spesel taem i pulum tingting i go long laet ya?
1 Jeova i yusum profet Aesea blong talem se: “Fastaem, mifala i stap wokbaot long tudak, be naoia, mifala i luk wan bigfala laet. Bifo, mifala i stap long tudak we i blong ded nomo, be naoia, laet i saenaot, i kasem mifala.” (Aes. 9:2) Yumi luk “bigfala laet” ya tru long ol wok we Pikinini blong God, Jisas Kraes, i mekem. Wok blong prij we hem i mekem taem hem i stap long wol mo ol blesing we i kamaot from sakrefaes blong hem, oli givhan long olgeta we oli stap long tudak long saed blong spirit. Ol man oli nidim laet ya tede, long taem we ol man oli stap long tudak. Memoriol i givim spesel janis long yumi blong pulum tingting blong ol man i go long “laet blong ol man long wol.” (Jon 8:12) Long las yia, plante milian man oli soemaot bilif blong olgeta taem oli joen wetem yumi blong folem oda ya: “Oltaem yufala i mas mekem samting ya blong tingbaot mi bakegen.” (Luk 22:19) Memoriol long yia ya i stap kam klosap. ?Olsem wanem yumi save joen blong pulum tingting blong ol man i go long bigfala laet ya we Jeova i mekem i saenaot?—Fil. 2:15.
2. ?Olsem wanem yumi save mekem se yumi gat moa tangkiu long hat blong yumi from ransom sakrefaes, mo wanem samting i save kamaot from?
2 Gat Tangkiu Long Hat: Ol wik bifo long Memoriol i gudfala taem blong tingting dip long bigfala lav we Jeova mo Jisas tufala i soemaot taem tufala i givim ransom sakrefaes blong sevem ol man. (Jon 3:16; 2 Kor. 5:14, 15) Taem yumi tingting dip olsem, hemia bambae i mekem se yumi gat moa tangkiu from tabu taem ya. Olgeta man blong God oli mas spenem taem blong ridim mo tingting dip long ol spesel Baebol riding blong Memoriol, we oli stap long smol buk ya, Ridimgud Ol Tok Blong Baebol Evri Dei. Taem yumi tingbaot ol nambawan fasin blong Jeova we hem i soemaot tru long ransom, yumi praod se hem i God blong yumi. Taem yumi tingting dip long ransom ya se i mekem wanem long yumi wanwan, lav we yumi gat long God mo Pikinini blong hem i kam bigwan moa mo i pusum yumi blong traem bes blong yumi blong mekem samting we Jeova i wantem.—Gal. 2:20.
3. ?Olsem wanem yumi save soemaot tangkiu from Memoriol?
3 Sipos tangkiu blong yumi long Jeova i kam bigwan moa from rod we hem i mekem blong sevem yumi, glad blong yumi long saed blong Memoriol bambae i gat paoa long ol Baebol studen, ol man we yumi stap go visitim olgeta, ol famle, olgeta we oli stap raonabaot long yumi, ol fren blong yumi long skul, long ples blong wok, mo ol narafala we yumi singaot olgeta blong oli kam long spesel taem ya. (Luk 6:45) Taswe, traehad moa blong singaotem olgeta, givim pepa blong Memoriol long olgeta blong mekem se oli no fogetem spesel taem ya. Plante pablisa oli luk se i moagud blong mekem wan lis blong olgeta we oli singaotem olgeta oltaem blong oli kam long Memoriol, mo evri yia oli putum nem blong ol niuwan long lis ya. Olsem nao, oli no fogetem wan man. Taem yumi wok long fasin we i gat oda mo yumi traem bes blong yumi blong invaetem olgeta we oli intres, hemia i wan gudfala rod blong soem tangkiu long Jeova God “from presen ya blong hem we i gud tumas, i bitim mak olgeta.”—2 Kor. 9:15.
4. ?Wanem samting i save givhan long yumi blong spenem moa taem long wok blong prij long manis Maj mo Eprel?
4 Spenem Moa Taem Long Wok Blong Prij: ?Yu yu save spenem moa taem long wok blong prij long manis Maj mo Eprel? Sipos yumi traehad blong serem “gud nius blong Jisas Kraes,” bambae yumi kasem blesing blong God. Jeova, we i Stamba blong olgeta laet long saed blong spirit, i givim oda ya se: “Laet i mas saenaot long tudak ya i kam.” (2 Kor. 4:4-6) Sipos i gat nid, bambae ol elda oli mekem rod blong i gat sam moa miting blong prij long sam spesel taem mo ples, mo bambae oli tekem faswan step blong givhan long ol pablisa we oli wantem spenem moa taem long wok blong prij. Maet long eli moning oli prij long ol rod, mo long aftenun no long sapa oli mekem plan blong prij long ol stoa mo ofis mo blong prij tru long telefon. Wan samting we i save givhan long yu blong spenem moa taem long wok blong prij, hemia blong putum sam aoa olsem mak blong yu mo wok had blong kasem ol aoa ya. Long saed blong plante man, taem oli mekem wok blong haftaem paenia, hemia i olsem we oli givim bes blong olgeta long Jeova.—Kol. 3:23, 24.
5. Aoa we ol haftaem paenia oli mas kasem i godaon. ?Olsem wanem plante oli kasem blesing from?
5 ?Yu Save Mekem Wok Blong Haftaem Paenia? Seven yia i pas finis we oli daonem aoa we ol haftaem paenia oli mas kasem. Jenis ya i mekem se plante oli save kasem blesing ya blong mekem wok blong haftaem paenia. ?Yu yu bin traem finis? Samfala oli mekem wok ya evri yia, mo hemia i kam wan fasin blong laef blong olgeta. Long fulap kongregesen, plante pablisa oli mekem wok ya tugeta, mo hemia i kam wan taem blong yia we kongregesen i mekem fulap wok. ?Long program blong yu, yu save makemaot wan manis blong mekem wok blong haftaem paenia bifo no afta long Memoriol? Samfala oli luk se manis Eprel i gud from we i gat faef wiken long hem.
6. ?Wanem gudfala plan we oli mekem?
6 ?Olsem wanem? ?Seket elda bambae i visitim kongregesen blong yufala long manis Maj no Eprel? Yu save kasem wan narafala blesing long taem ya. Olsem we oli bin talem finis, long seves yia 2006, olgeta we oli mekem haftaem paenia long manis we seket elda i visitim kongregesen, bambae oli save joen long faswan haf blong miting blong ol paenia long wik blong visit. I tru se ol save long saed blong spirit we i leftemap tingting blong ol haftaem paenia, bambae i givhan long plante blong oli kasem mak ya blong kam fultaem paenia. Mo tu, long manis Maj, bambae yumi glad blong givhan long ol man blong oli kasem laet ya long saed blong spirit, taem oli stadi long niufala buk ya, ?Wanem Samting We Baebol i Rili Tijim? I gud we yu putum mak blong yusum niufala buk ya blong statem wan Baebol stadi.
7, 8. (a) ?Wanem i save givhan long yumi blong gat wan program blong haftaem paenia? (b) ?Olsem wanem famle i save givhan, mo olsem wanem ful famle i kasem blesing from?
7 Taem yu stap tingbaot ol 50 aoa we ol haftaem paenia oli mas kasem, jusum wanem program we i save letem yu blong mekem laet blong trutok i saen blong samwe 12 aoa long wan wik. Tokbaot samting ya wetem ol narafala we oli kasem mak ya finis, mo wetem ol narafala tu. Samting ya i save leftemap tingting blong olgeta blong oli joenem yu long wok ya. Olgeta pablisa we oli baptaes finis, ol yangfala mo ol olfala tu, oli luk se i no had tumas blong kasem mak ya taem oli mekem gudfala plan. Prea long saed ya. !Biaen, mekem ol plan blong yu, mo haremgud long wok blong haftaem paenia!—Mal. 3:10.
8 Plante famle oli luk se taem evriwan long famle oli givhan gud, bambae wan memba blong olgeta i save kasem mak ya. Wan famle i jusum se ol faef memba blong hem we oli baptaes finis, bambae oli mekem wok blong haftaem paenia. Tu narafala pikinini long famle ya we tufala i no baptaes yet, tufala i traehad blong mekem moa long wok blong prij. ?Olsem wanem famle ya i kasem blesing taem oli traehad olsem? Oli raetem se: “Hemia i wan gudfala manis, mo mifala i filim se i givhan long famle blong mifala blong i joengud moa. !Mifala i talem tangkiu long Jeova from nambawan blesing ya!”
9. ?Olsem wanem yumi save letem laet blong yumi i saen long ol manis bifo mo afta long Memoriol?
9 ?Olsem wanem? ?Spesel wok we yumi mekem long Maj mo Eprel bambae i leftemap tingting blong yumi, i mekem we yumi kam klosap moa long Papa blong yumi long heven? Samting ya bambae i dipen long traehad blong yumi blong mekem se lav blong yumi long God mo Pikinini blong hem i kam bigwan moa, mo blong spenem moa taem long wok blong prij. I gud we yumi strong blong mekem olsem man blong raetem Ol Sam we i talem se: “Bambae mi singaot bigwan, mi talem tangkiu tumas long Hae God. Bambae mi presem hem long fes blong olgeta man.” (Sam 109:30) Jeova bambae i blesem strong wok we yumi mekem long ol manis bifo mo afta long Memoriol ya. Taswe, i gud we yumi mekem wan bigfala laet i saen blong plante moa man oli save kamaot long tudak mo oli “gat laet blong laef.”—Jon 8:12.