Yumi Mas Kam Ol Tija, i No Ol Man Blong Prij Nomo
1 Plante man oli luksave se “ol Wetnes blong Jeova oli kavremap wol finis wetem wok blong prij blong olgeta.” ?Olsem wanem oli naf blong mekem olsem? Samting ya i no kamaot from paoa blong man, be from tabu speret blong God we i givhan long ol man blong hem, taem oli yusum ol defren samting we Hem i givim long olgeta blong mekem wok ya blong prij mo tij.—Sek. 4:6; Wok 1:8.
2 Ol buk oli givhan bigwan long yumi blong mekem wok blong prij. Long ol yia we oli pas, ol Wetnes blong Jeova oli bin wokem mo seremaot plante bilyan buk, buklet, magasin mo traket, blong mekem gud nyus blong Kingdom i goaot moa. Ripot long 1997 Yearbook i soemaot se namba blong ol buk we oli wokem, i kasem wan nyufala mak we i antap olgeta. Kam kasem naoia, oli bin wokem bitim 91 milyan New World Translation Baebol. Namba blong ol Wajtaoa mo Wekap! we oli stap wokem long Yunaeted Stet i 7.1 pesen antap long namba we oli wokem wan yia bifo. Long Jemani, namba blong ol magasin we oli stap wokem, i go antap 35 pesen. Bitim 33 pesen blong ol magasin we oli wokem long Jemani oli blong seremaot long Rasia.
3 ?From wanem i gat nid blong ol buk ya? Long olgeta ples blong wol, ol Wetnes oli stap obeigud long tok we i pulum olgeta blong wetnes long olgeta man long evri ples. From we plante blong yumi i stap prij moa—long pablik ples, long rod, mo long ol stoa mo ofis—yumi stap seremaot plante moa buk long ol man we oli intres. Plante long ol man ya oli neva gat jans blong harem mesej blong Kingdom bifo, sipos no, oli save smol nomo long saed ya. From samting ya, ol kongregesen oli holem plante defren buk we yumi save yusum, nomata wanem fasin blong prij yumi joen long hem.
4 ?From Wanem Yumi Seremaot Ol Buk? Hemia i no from we yumi wantem seremaot plante buk nomo. No gat. Wok ya blong mekem disaepol i gat tu haf blong hem—wok blong prij mo wok blong tij. Fastaem, yumi mas prij blong talemaot gud nyus blong Kingdom, mo mekem ol man oli save se hemia nomo hop blong olgeta man. (Mat. 10:7; 24:14) Longtaem finis i kam, ol buk blong yumi we oli stanap long Baebol, oli bin stap olsem ol gudfala tul blong pulum intres blong ol man, mo blong givim save long olgeta long saed blong Kingdom.
5 Namba tu samting blong mekem disaepol se, yumi mas tijim ol man long ol tok blong Jisas. (Mat. 11:1; 28:19, 20) Bakegen, ol buk oli givhan bigwan blong mekem trutok i go dip long hat blong ol studen, nao samting ya bambae i pulum olgeta blong kam disapol blong Kraes.
6 Ol man we oli karem ol buk oli ‘stap lesin long tok blong God,’ be ating oli no save mekem ol samting we tok ya i talem sipos yumi no moa givhan long olgeta. (Jem. 1:22-25) Smol man nomo oli save kam disaepol sipos yumi no lidim olgeta. (Wok 8:30, 31) Oli nidim wan tija blong halpem olgeta blong pruvum ol trutok blong Baebol. (Wok 17:2, 3) Wok blong yumi i blong givhan long olgeta blong kasem mak ya we oli givim laef blong olgeta i go long Jeova mo tekem baptaes, mo blong trenem olgeta blong kam naf blong tijim ol narafala man.—2 Tim. 2:2.
7 I Gat Bigfala Nid Blong Moa Tija: Taem yumi prij, yumi talemaot gud nyus long pablik ples. Be, blong tijim wan man, yumi mas gohed sloslou oltaem. Wok blong prij i mekem ol man oli save long mesej blong Kingdom, be wok blong tij i givhan long ol wanwan man blong bilif long gud nyus ya, mo folem long laef blong olgeta. (Luk 8:15) Wan tija i no jes talemaot ol tok. Hem i eksplenem, yusum ol gudfala poen blong mekem narafala i tingtinggud, i givim pruf, mo i pulum man wetem ol tok blong hem.
8 Yumi evriwan i mas traehad blong kam ol tija, i no ol man blong prij nomo. (Hib. 5:12a) I tru, seremaot ol buk i wan impoten haf blong wok blong yumi. Be blong mekem namba tu samting we yumi mas mekem, yumi mas kam ol gudfala tija. Yumi save glad taem yumi seremaot plante buk mo magasin, be blong finisim olgeta wok we God i givim long yumi, yumi no mas ting se i naf nomo we yumi seremaot ol buk. (2 Tim. 4:5) Seremaot buk i openem rod blong go moa blong tijim ol narafala long trutok.
9 Mekem Visit Mo Statem Baebol Stadi: Ating yumi evriwan i bin seremaot plante buk, buklet mo magasin, mekem se yumi gat wan longfala lis blong ol visit. Yumi mas makemaot taem evri wik blong gobak long ol visit ya mo mekem intres blong olgeta i gru moa. Yumi no gobak nomo blong givim sam moa buk long ol man ya, be blong pulum olgeta blong ridim samting we yumi livim wetem olgeta finis, mo blong givhan long olgeta blong kasem gudfala samting from. ?Yu ting se yumi wanwan i save gat jans blong gohed gud long saed blong speret sipos narafala i no bin kambak plante taem blong givhan long yumi blong kasem stret save?—Jon 17:3.
10 Gobak long olgeta man we oli soem intres, wetem tingting blong statem Baebol stadi long buklet ya ?Wanem Samting We God i Wantem Yumi Blong Mekem? no buk ya, Save Blong Lidim Yu Long Laef We i No Save Finis. Tufala buk ya oli eksplenem mesej blong Kingdom long fasin we i isi blong kasem save long hem. Buklet ya Samting We God i Wantem i wan kos long saed blong ol stampa tijing blong Baebol. Buk ya Save i givhan long yumi blong tijim man long plante moa save long saed blong ol trutok ya, be long fasin we i isi, i klia, mo i no tekem longtaem tumas.
11 Isi fasin ya blong tijim ol man we pepa long medel blong Kingdom Wok Blong Yumi i eksplenem long Jun 1996, i mekem i isi long ol tija blong tijim ol man, mo isi long ol studen blong kasem save. Holem pepa ya i stap wetem yu oltaem, mo luklukbak long ol rod mo fasin blong tij we oli bin karem gudfala frut. Pepa ya i givim advaes olsem wanem blong soem trufala intres long ol studen wanwan, hamas poen blong tokbaot long wan stadi, olsem wanem blong ansarem ol kwestin we oli no joen wetem stadi, olsem wanem tija mo studen tufala wanwan i save rerem stadi fastaem, mo olsem wanem blong lidim studen i go long ogenaesesen blong Jeova. Sipos yumi folem advaes ya, bambae plante moa blong yumi, wetem ol nyuwan long kongregesen tu, oli save kam naf blong lidim ol stadi we oli gohedgud.
12 Ol Ripot Blong Gudfala Frut: Buklet ya Samting We God i Wantem mo buk ya Save oli stap givhan bigwan long ol man, blong oli kam disaepol kwiktaem. Taem wan brata long Bolivia i kasem buklet ya Samting We God i Wantem, wantaem nomo hem i statem stadi wetem wan man. !Long distrik asembli fo manis biaen, studen ya i stap long medel blong ol hapi man we oli tekem baptaes!
13 Plante man oli givim laef blong olgeta i go long Jeova afta we oli stadi long fulwan Save buk. Long wan kongregesen long Angola, fastaem i gat 190 Baebol stadi mo 180 man oli stap kam long miting. Fo manis nomo afta we oli stat blong yusum Save buk, namba blong ol Baebol stadi i go antap kasem 260, mo namba blong ol man we oli kam long miting i kasem 360. Smoltaem biaen, oli mas stanemap wan nyufala kongregesen.
14 Wan brata we i statem faswan stadi blong hem long Save buk, i talem se i “isi blong lidim wan stadi long buk ya sipos yu jes askem kwestin, ridim sam vas we oli stret long poen ya, mo mekem sua se studen i kasem save gud.” Oltaem hem i bin tingting se ol pablisa we oli nafgud nomo oli save mekem ol Baebol stadi we oli gohedgud, mo se neva hem i save mekem olsem. Be hem i luksave se samting ya i no tru, mo se hem tu i save mekem. Hem i se: “Sipos mi mi save mekem, eniwan i save mekem.”
15 Taem yumi mekem ol Baebol stadi, yumi kasem mak we yumi mekem ol disaepol. Olgeta we oli kam naf blong joen long wok ya, oli faenem se oli haremgud tumas long hem, mo oli karem plante frut. I gud we ol narafala oli luk se yumi ‘stap prij long saed blong kingdom blong God . . . mo yumi tijim ol man long Jisas Kraes, Masta blong yumi, we i no gat samting i save blokem yumi.’—Wok 28:31.