“Stap Rere Oltaem Blong Mekem Ol Gudfala Wok”
1 Taem Jisas i statem wan niufala fasin blong prij, hem i tekem taem blong rerem ol disaepol blong hem. (Mat. 10:5-14) Nating se yumi evriwan i bisi, yumi save karem gudfala frut sipos yumi tekem smoltaem, maet sam minit nomo, blong rere fastaem bifo we yumi go prij long haos wanwan.—2 Kor. 9:6.
2 Olsem Wanem Blong Rere: Yumi save rere gud sipos yumi save ol samting we oli stap insaed long buk no magasin we yumi plan blong seremaot. Mo tu, yumi mas tingbaot ol man long teritori blong yumi. ?Wanem problem we oli stap fesem mo wanem problem we oli gat long komuniti blong olgeta? ?Wanem nao bilif blong olgeta folem jos blong olgeta? Yumi save yusum ol isi fastok we i stap long Kingdom Wok Blong Yumi mo smol buk ya Statem Wan Storian.
3 Fasin blong lesin gud long ol pleplei we oli mekem long Miting Blong Kingdom Wok, hemia tu i save givhan long yumi. Taem yumi yusum fastok blong yumi plante, bambae yumi no moa nidim blong spenem tumas taem blong rere, from we yumi save gud fastok blong yumi finis. Be evri taem, bifo we yumi go long wok blong prij, i gud sipos yumi tingbaot ol samting we bambae yumi tokbaot mo sipos yumi traem mekem fastok blong yumi i kam moa gud, bambae yumi karem gudfala frut. Oltaem yumi mas jekem basket blong yumi blong luk sipos yumi gat evri buk no magasin we yumi nidim.
4 ?Wanem samting we bambae i givhan long yumi blong rimemba bakegen ol toktok we bambae yumi talem? Fasin blong praktis wetem laod voes i save givhan long yumi blong rimemba samting we yumi wantem talem. Samfala oli laekem mekem olsem long taem blong famle stadi. Samfala oli faenem se i gud blong raetem sam haf blong toktok blong olgeta long wan smol pepa mo ridim kwiktaem bifo we oli go long haos blong man.
5 ?Olsem Wanem i Save Givhan Long Yumi?: Fasin blong reregud fastaem i save mekem se yumi karem gudfala frut, mo i save mekem se yumi glad moa long wok blong prij. Fasin ya i save givhan long yumi blong no seksek mo no fraet tumas taem yumi stap long doa blong ol man. Yumi mas intres moa long man blong haos bitim we yumi tingbaot nomo samting we bambae yumi talem. Mo tu sipos yumi save gud samting we i stap long buk, samting ya i save halpem yumi blong glad moa blong seremaot buk ya.
6 Baebol i leftemap tingting blong yumi blong “stap rere oltaem blong mekem ol gudfala wok.” (Taet. 3:1, NW) I no gat narafala wok we i gud moa i bitim wok blong talemaot gud nius. Taem yumi rere gud fastaem, yumi soemaot we yumi respektem man blong haos we i glad blong lesin, mo yumi gat respek long Jeova tu we hem i God we yumi stap mekem wok blong hem.—Aes. 43:10.