Yu Mas Sakem Han Blong Yu Wetem Waes Fasin
1. ?Fas Korin 9:26 i stret olsem wanem long wok blong prij?
1 Aposol Pol i raetem se: “Fasin blong mi, sipos i olsem we mi resis, be mi mas go blong win nomo, no sipos i olsem we mi boksing, be mi no save sakem han blong mi i go olbaot, we i no kasem man.” (1 Kor. 9:26) Pol i stap talem se hem i putum olgeta tingting blong hem long wan samting nomo, hemia blong mekem ol wok we oli givhan long hem blong fren gud wetem God. Be ol tok ya oli stret tu long wok blong prij. Yumi wantem “sakem han” blong yumi wetem waes fasin. Yes, yumi mas traehad blong prij wetem waes fasin, blong mekem se ol wok blong yumi oli karem gudfala frut. ?Yumi mekem olsem wanem?
2. ?Yumi folem fasin blong Pol mo ol narafala olsem wanem, taem yumi jusum stret taem mo ples blong prij?
2 Yumi Mas Go Long Ol Ples We i Gat Man Long Hem: Pol mo ol narafala man blong talemaot gud nius oli prij long ol ples we i gat man long olgeta. (Wok 5:42; 16:13; 17:17) Sipos plante man long ples blong yumi, oli stap long haos blong olgeta long sapa, maet hemia stret taem blong yumi go prij long ol haos wanwan. ?Olsem wanem? ?Plante man oli tekem bas long eli moning blong go long wok, mo long aftenun blong kambak long haos? ?Plante man oli go long stoa long wanem taem? Sipos yumi prij long rod long taem olsem, maet yumi save kasem plante gudfala frut.
3. ?Yumi sakem han blong yumi wetem waes fasin olsem wanem, taem yumi wok long ol teritori?
3 Yumi Wok Wetem Waes Fasin Long Ol Teritori: Yumi sakem han blong yumi wetem waes fasin, taem yumi lukaot gud long fasin blong yumi blong wok long ol teritori. Olsem nao, i nogud we wan bigfala grup i go prij long wan eria, from we ol brata bambae oli westem plante taem mo paoa blong olgeta blong mekem se grup ya i gat naf wok blong mekem, mo blong oli wok folem oda. I moagud blong seraotem ol pablisa i go long ol smosmol grup. Long sem fasin, taem yumi prij long ol teritori afsaed long taon, i moa gud blong seraotem ol pablisa, blong smol nomo i go long evri trak. Ale, bambae evriwan i gat janis blong storian long ol man, mo bambae yumi finisim teritori kwiktaem. ?Olsem wanem? ?Yumi wanwan i save gat wan prapa teritori blong yumi we i stap klosap long haos blong yumi? Olsemia, bambae yumi no westem plante taem blong wokbaot i go long teritori.
4. ?Wanem bambae i givhan long yumi blong yumi karem gudfala frut olsem “man blong pulum man”?
4 Jisas i talem se ol man blong talemaot gud nius, oli olsem ol “man blong pulum man.” (Mak 1:17) Wan man blong pulum fis, hem i no go long solwota blong sakem net nomo, be hem i go blong kasem fis. Taswe, man we i kasem fis, hem i go long ol ples we i gat fis long hem, hem i go long stret taem we hem i save se i gat fis, mo hem i sakem net blong hem kwiktaem. Yes, hem i wok wetem waes fasin. I gud we yumi tu yumi mekem sem mak long wok blong prij.—Hib. 6:11.