Spesel Wok Blong Singaot Ol Man Oli Kam Long Memoriol, i Stat Long 17 Maj
1. ?Wanem spesel wok we bambae i stat long 17 Maj?
1 Miting blong Memoriol we yumi mekem evri yia, hem i blong soemaot ded blong Jisas. (1 Kor. 11:26) Taswe, yumi wantem se ol narafala oli joen wetem yumi long miting ya, blong oli save moa long ransom sakrefaes blong Jisas. Sakrefaes ya i wan presen we Jehova i givim from we i lavem ol man. (Jon 3:16) Long yia ya, spesel wok ya blong singaot ol man oli kam long Memoriol, bambae i stat long Sarede 17 Maj. ?Olsem wanem? ?Yu yu gat tingting blong joen fulwan long wok ya?
2. ?Yumi save talem wanem taem yumi givim pepa blong singaot man i kam long Memoriol?
2 Samting We Yumi Save Talem: I moa gud yumi mekem storian blong yumi i sot nomo. Maet yumi talem se: “Halo. Mifala i kam blong givim pepa ya long yu mo famle blong yu, blong singaot yufala i kam long wan impoten miting we i stap kamaot evri yia. Long yia ya, miting ya bambae i stap long olgeta ples long wol, long 5 Eprel. Wan tok we i stanap long Baebol, bambae i eksplenem samting we ded blong Jisas i mekem, mo samting we hem i stap mekem naoia. Pepa ya i soemaot ples mo taem we miting ya bambae i stap long hem.” Long wiken, taem yumi seremaot pepa ya, yumi mas seremaot ol magasin tu, sipos yumi luk se i stret blong mekem olsem.
3. ?Yumi mas mekem wanem blong yumi singaot plante moa man?
3 Yumi Traehad Blong Singaot Plante Moa Man: Samting we yumi wantem, hemia blong yumi traehad blong singaot plante moa man. Taswe, yu mas meksua se yu singaot ol Baebol stadi, ol visit, ol famle, ol fren long wok no long skul, ol man we oli stap raonabaot long yu, mo ol narafala we yu yu save olgeta. Ol elda bambae oli talemaot olsem wanem blong wok long ol teritori. Spesel wok ya we yumi mekem evri yia blong singaot ol man oli kam long Memoriol, i karem plante frut. Las yia, taem wan woman i wokbaot i go insaed long ples blong Memoriol, wan man blong welkam i wantem halpem hem blong faenem pablisa we i singaot hem i kam. Be woman ya i talem se hem i no save ol man we oli stap long ples ya. Hem i talem se sam aoa bifo, wan man i kam long haos, i givim pepa blong singaot hem i kam long Memoriol.
4. ?From wanem yumi mas wok strong blong singaot ol man oli kam long Memoriol?
4 Maet wan man we i stap long Memoriol, i kam from we yu yu givim pepa blong singaot hem i kam. Nating sipos ol man oli kam no oli no kam, be traehad blong yu i givim witnes finis. Pepa ya bambae i talemaot se naoia Jisas i wan King we i gat bigfala paoa. Taem yu wok strong blong singaot ol man, bambae yu soemaot long ol man long teritori, long ol pablisa, mo long Jehova, se yu yu tinghae long presen ya ransom.—Kol. 3:15.