Ol Fastok

Blong Statem Ol Baebol Stadi Long Fas Sarede Blong Manis Julae

“Ating yu yu agri se yumi evriwan i sinman. ?Be, yu ting se God i save fogivim man from wan bigfala sin we hem i mekem?” [Yu letem man i ansa.] Yu soemaot haf we i stap long pej 11 blong Wajtaoa blong Julae–Septemba ya mo yu tokbaot haf we i stap ananit long fas kwestin, mo yu ridim wan long ol vas we i stap. Yu givim magasin long hem, mo yu mekem plan blong gobak blong tokbaot ol narafala haf aninit long seken kwestin.

Makemgud: Fastok ya antap bambae yumi mas yusum long miting blong prij, stat long 6 Julae.

Wajtaoa Julae–Septemba

“Mifala i wantem save tingting blong yu long vas ya. [Yu ridim 1 Jon 4:8.] Plante man oli agri wetem vas ya, be plante long olgeta oli ting se God i stap mekem i strong tumas long ol man, mo oli ting se hem nao i mekem ol disasta oli hapen. ?Wanem tingting blong yu? [Yu letem man i ansa.] Wajtaoa ya i givhan long yumi blong luksave se i no God we i stap mekem ol disasta oli hapen.”

Wekap! Julae–Septemba

“Fasin blong kilim woman hemia wan bigfala problem long fulwol. Sam man oli talem se fasin blong kilim woman i kamaot from kalja blong man, famle we hem i gruap long hem, no from we hem lukluk tumas ol muvi blong faet. Be long tingting blong yu, ?from wanem man i kilim woman? [Yu letem man i ansa.] Baebol i tokbaot fasin we man mo woman i mas soemaot long tufala. [Yu ridim Efesas 5:33.] Wekap! ya i soemaot se taem man mo woman tufala i folem ol advaes we Baebol talem, tufala i save harem gud.”

!Gud Nius We i Kamaot Long God!

“Mifala i kam long eria blong yu tede, blong tokbaot sam vas blong Baebol we i save leftemap tingting blong yu mo famle blong yu. Plante man we mifala i toktok wetem olgeta, oli wantem save se, from wanem God ya we i lavem ol man i letem ol man oli safa. ?Yu yu ting se hemia i plan blong God blong mekem ol man oli safa?” [Yu letem man i ansa.] Afta, yu tanem buklet ya i go long Stadi 5, mo yu ridim tufala paragraf aninit long fas kwestin. Biaen, yu ridim ol vas we oli raetem se “Ridim,” mo yu tokbaot olgeta. Yu givim buklet ya long hem, mo yu mekem plan blong gobak bakegen, blong yutufala i storian long nambatu kwestin.