Kamgud Moa Long Wok Blong Prij—Yu Raetemdaon Nem Blong Ol Man We Oli Intres
“Yu mas lukaot gud long fasin blong yu, mo long ol tok we yu stap tijim ol man long hem.” (1 Tim. 4:16) Tabu spirit i pulum Pol blong raetem advaes ya i go long Timoti. Advaes ya i pulum yumi blong yumi kamgud moa long wok blong prij, nomata we yumi jes kam long trutok no yumi stap longtaem finis. Blong givhan long yumi blong mekem olsem, i gat wan haf we bambae i kamaot oltaem long Kingdom Wok Blong Yumi, nem blong haf ya “Kamgud Moa Long Wok Blong Prij.” Evri haf i soemaot sam stamba rod blong kamgud moa long wok blong prij. Evri manis, ol pablisa oli mas traehad blong yusum ol save we oli lanem. Taem manis i finis, bambae i gat wan haf long Miting Blong Kingdom Wok, we i pulum evriwan blong oli talemaot ol gudfala stori blong prij, from we oli folem ol save ya. Long manis Februari, yumi wantem traehad blong raetemdaon nem blong ol man we oli intres.
?From Wanem i Impoten?: I no naf we yumi prij nomo. Yumi mas mekem sam moa samting. Yumi mas gobak luk ol man we oli intres mo tijim olgeta. Hemia i olsem we yumi stap putum wota long ol sid blong trutok we yumi planem. (Mat. 28:19, 20; 1 Kor. 3:6-9) Blong mekem olsem, yumi mas faenem man ya bakegen, yumi tokbaot samting we hem i intres long hem, mo yumi storian moa long samting we yumi bin tokbaot wetem hem. Ale, taem yumi luk se hem i intres, yumi raetemdaon nem blong hem.
?Yu Mekem Olsem Wanem?:
• Yu mas meksua se yu gat pen mo pepa blong raetem ol not. Yu mas raet klia mo yu mas putum gud ol pepa blong yu. Yu mas karem ol pepa ya oltaem, blong yu save raetemdaon samting we yu tokbaot long visit blong yu. Yu mas mekem olsem, kwiktaem afta we yu aot long haos.
• Yu raetemdaon nem mo namba blong telefon blong hem. ?Hem i stap wea? ?Wanem sam samting long saed blong hem mo famle blong hem? ?Hem i gat pikinini? ?I gat wan man long haos blong hem we i sik?
• Yu raetemdaon ol samting we yutufala i tokbaot. ?Wanem vas we yutufala i ridim? ?Wanem bilif blong hem? ?Yu givim wanem buk long hem? Yu raetem dei mo taem we yu visitim hem.
• Yu raetemdaon samting we yu plan blong tokbaot long nekis visit. ?Yu talem long hem se bambae yutufala i tokbaot wanem long nekis visit? ?Bambae yu kambak wetaem?
• Evritaem we yu aot long visit, yu mas raetemdaon ol samting we yu tokbaot. I no rong blong raetem plante samting.
Yu Traem Mekem Samting Ya Long Manis Ya:
• Taem yu stap raetemdaon ol save ya, i gud yu talem long pablisa we i prij wetem yu, blong hem tu i save samting we yu stap raetem.