Yumi Mas Putum Wota Long Ol Sid Blong Trutok
1. ?Wanem samting we yumi putum wota long hem blong i gru?
1 Taem yumi planem sid long garen, yumi mas putum wota long hem blong i gru. Hemia i sem mak long sid blong trutok we yumi planem long hat blong ol man long ples blong yumi. (1 Kor. 3:6, NW) Sipos yumi wantem se sid ya i gru gud, yumi mas gobak blong luk olgeta, mo yumi yusum Baebol blong givhan long olgeta. Hemia i olsem we yumi putum wota long ol sid long garen.
2. ?Yu save mekem wanem blong rerem tingting blong man from samting we bambae yu tokbaot nekis taem?
2 Yu Askem Wan Kwestin: Taem yu rerem toktok we bambae yu talem long man, i gud yu tingbaot wan kwestin we i save pulum tingting blong hem. Yu save askem kwestin ya long en blong storian blong yu, mo yu talem stret taem we bambae yu gobak blong ansa long kwestin ya. Plante oli luk se i gud blong askem kwestin we i stanap long wan save long buk ya Baebol Tijim. Long rod ya, bambae i isi blong oli soemaot long man olsem wanem blong stadi long Baebol.
3. ?Wanem sam samting we yu save raetemdaon afta we yu prij long wan man?
3 Yu Raetemdaon Sam Samting: Taem yu lego haos blong man we yu storian wetem hem, yu tekem smol taem blong raetemdaon sam samting, olsem nem mo adres blong hem. I gud tu blong raetem dei mo taem we yu toktok long hem, samting we yutufala i tokbaot, mo buk we yu givim long hem. ?Olsem wanem? ? Hem i talem se hem i gat wan skul finis? ?Hem i gat pikinini? ?Hem i tokbaot sam samting we hem i wantem save moa long olgeta, no sam samting we i wari long olgeta? Ol save ya bambae i givhan long yu blong yu tokbaot ol samting we hem i ting se oli impoten, taem yu gobak blong luk hem. Mo tu, yu raetemdaon wanem dei we yu yu agri blong gobak, mo kwestin we bambae yu ansarem.
4. ?From wanem yumi mas gat strong tingting blong gobak blong visitim ol man we oli wantem save moa?
4 Yu Mas Gat Strong Tingting Blong Gobak: Setan bambae i traehad blong “tekemaot tok ya” we yu putum long hat blong man, mo bambae hem i no spel. (Mak 4:14, 15) Taswe, sipos yu gobak blong luk wan man we i wantem save moa be hem i no stap, yu no mas lego hem. Yu save raetem wan leta long hem, no yu save raetem wan smol not mo putum aninit long doa. Wan paenia i stap prij mo i statem Baebol stadi long wan woman taem tufala i stanap long doa nomo. Be taem hem i gobak blong luk woman ya, hem i no faenem hem. Ale, hem i raetem wan leta long hem. Biaen, paenia ya i faenem woman ya bakegen, mo woman ya i talem se samting we paenia i mekem, i tajem hat blong hem bigwan. Sipos yumi putum wota long sid blong trutok, yumi save glad taem sid ya i gru, i kam bigwan, mo i karem frut. “Sam long olgeta oli gat olsem toti frut, mo sam oli gat olsem sikisti frut, mo sam oli gat olsem handred frut.”—Mak 4:20.